गणपतीपुळे मंदिरात दर्शनासाठी जाताय? आधी वस्त्रसंहितेची ही बातमी वाचा
रत्नागिरी जिल्ह्यातील गणपतीपुळे मंदिरात 1 जानेवारीपासून वस्त्रसंहिता म्हणजेच ड्रेस कोड सक्तीचा होणार आहे.
रत्नागिरी जिल्ह्यातील गणपतीपुळे मंदिरात दर्शनासाठी येणाऱ्या भाविक आणि पर्यटकांसाठी वस्त्रसंहिता म्हणजेच ड्रेस कोड लागू करण्याचा निर्णय मंदिर प्रशासनाने घेतला आहे. या निर्णयाची अंमलबजावणी 1 जानेवारीपासून कडक आणि काटेकोरपणे केली जाणार आहे.
अरबी समुद्रकिनाऱ्यालगत वसलेले गणपतीपुळे हे स्वयंभू देवस्थान असून देशभरातील लाखो भाविकांचे श्रद्धास्थान आहे. अष्टविनायकांप्रमाणेच हे मंदिरही स्वयंभू आणि जागृत म्हणून ओळखले जाते. कोकणच्या समुद्रकिनाऱ्यावरील पश्चिमद्वार देवता म्हणूनही या क्षेत्राची ओळख आहे. पश्चिमेला अथांग समुद्र आणि पूर्वेला हिरव्यागार डोंगराच्या पायथ्याशी निसर्गसमृद्ध परिसरात हे देवस्थान वसलेले असल्याने इथे भाविकांची मोठी गर्दी असते. या मंदिराला भेट देण्यासाठी दरवर्षी देशभरातून लाखो भाविक गणपतीपुळेत येत असतात.
मंदिराचे पावित्र्य आणि धार्मिक स्थळाची मर्यादा लक्षात घेऊन योग्य पेहराव करूनच दर्शनाला यावे, असे आवाहन याआधीपासूनच केले जात होते. मंदिर परिसरात वस्त्रसंहितेबाबत जनजागृती करणारे फलकही लावण्यात आले होते. मात्र आता नव्या वर्षाच्या पहिल्या दिवसापासून ही वस्त्रसंहिता सक्तीची करण्यात येणार असल्याचे संस्थानाने स्पष्ट केले आहे. म्हणजेच आतापर्यंत जे आवाहन होते, तेच आता नियम म्हणून लागू केले जाणार आहे.
गणपतीपुळे हे धार्मिक स्थळ असण्याबरोबरच लोकप्रिय पर्यटनस्थळही आहे. समुद्रकिनाऱ्यावर फिरायला येणारे अनेक पर्यटक मंदिरातही दर्शनासाठी जातात. मात्र समुद्रकिनाऱ्यासाठी वापरला जाणारा तोकडा पेहराव किंवा ट्रिप मूडमधले कमी कपडे घालून आता मंदिरात प्रवेश मिळणार नाही. यामुळे किनाऱ्यावर फिरायला जाणाऱ्या पर्यटकांनाही मंदिरात जाण्यापूर्वी आपला पेहराव बदलावा लागू शकतो.
गुडघ्याच्या वर असणारे स्कर्ट किंवा ड्रेस, तसेच असभ्य भाषा, आक्षेपार्ह मजकूर किंवा चित्रे छापलेले कपडे घालून येणाऱ्या भाविक आणि पर्यटकांना मंदिरात प्रवेश दिला जाणार नाही. त्यामुळे दर्शनासाठी येताना धार्मिक स्थळाला साजेसा आणि सभ्य पेहराव करणे गरजेचे असणार आहे.
या वस्त्रसंहितेत लहान मुलांसाठी मात्र सूट देण्यात आली आहे. दहा वर्षांपेक्षा कमी वयाच्या मुलांना ड्रेस कोडच्या नियमातून वगळण्यात आले असून त्यांच्यासाठी ही सक्ती लागू असणार नाही.
याआधी जनजागृतीच्या माध्यमातून भाविकांना योग्य पेहराव करण्याचे आवाहन केले जात होते. मात्र आता 1 जानेवारीपासून नियमांची प्रत्यक्ष अंमलबजावणी सुरू होणार असल्याने गणपतीपुळेला जाण्याचे नियोजन करणाऱ्या पर्यटक आणि भाविकांनी नव्या वस्त्रसंहितेची काळजी घ्यावी लागणार आहे.
