E20 इंधनाविरोधातील विरोध हे 'पेड कॅम्पेन' होते, नितीन गडकरी यांचा थेट आरोप

केंद्रीय रस्ते वाहतूक आणि महामार्ग मंत्री नितीन गडकरी यांनी E20 इंधनावरून सुरू असलेल्या वादावर अगदी स्पष्ट शब्दांत आपली भूमिका मांडली आहे. सीआयआयच्या (CII) एका कार्यक्रमात बोलताना त्यांनी हे सांगितले. काही महिन्यांपूर्वी E20 इंधनाच्या विरोधात जो विरोध झाला, तो नैसर्गिक नव्हता, तर पैसे देऊन चालवलेले 'पेड कॅम्पेन' होते, असे गडकरी यांनी स्पष्ट केले.

आता हा सगळा विरोध शांत झाला आहे, असेही त्यांनी सांगितले. देशाच्या हितासाठी आणि विदेशी मुद्रा वाचवण्यासाठी इथेनॉलचा वापर अत्यंत गरजेचा आहे, हे गडकरी यांनी ठासून सांगितले.

दरम्यान, रस्ते वाहतूक आणि महामार्ग मंत्रालयाने केंद्रीय मोटर वाहन नियम, 1989 मध्ये नुकतीच एक महत्त्वाची दुरुस्ती केली आहे. 26 ऑक्टोबर 2026 रोजी प्रसिद्ध झालेल्या नव्या अधिसूचनेनुसार वाहन उत्सर्जन मानकांमध्ये E100 इंधनाचा, म्हणजे शुद्ध इथेनॉलचा, अधिकृतपणे समावेश करण्यात आला आहे. या नव्या नियमांमुळे वाहन उत्पादक कंपन्यांना (OEMs) E85 आणि E100 यांसारख्या जास्त इथेनॉल असलेल्या मिश्रणावर चालणाऱ्या फ्लेक्स-फ्यूल वाहनांना कायदेशीररीत्या प्रमाणित करून घेण्याचा मार्ग मोकळा झाला आहे. म्हणजेच अशा वाहनांना आता नियमांच्या चौकटीत प्रमाणपत्र मिळू शकेल.

E85 आणि E100 म्हणजे नेमके काय? E85 या इंधनात 85 टक्क्यांपर्यंत इथेनॉलचे प्रमाण असते. E100 हे जवळपास पूर्णपणे शुद्ध इथेनॉल असलेले इंधन आहे. फ्लेक्स-फ्यूल वाहने ही विशेष प्रकारची वाहने असतात. त्यांचे इंजिन आणि फ्युएल सिस्टीम पेट्रोल आणि इथेनॉल यांच्या वेगवेगळ्या प्रमाणांवर चालेल अशा पद्धतीने बनवलेली असते.

मात्र नवे नियम आले म्हणजे आता जुन्या किंवा सध्याच्या सगळ्या पेट्रोल गाड्यांमध्ये E100 किंवा E85 इंधन भरता येईल, असा गैरसमज करून घेऊ नये. सध्या बाजारात असलेल्या बहुतेक गाड्या E10 किंवा जास्तीत जास्त E20 (20 टक्के इथेनॉल) इंधनासाठी योग्य असतात. त्यामुळे ज्या गाड्या उत्पादक कंपनीने फ्लेक्स-फ्यूल तंत्रज्ञानासह बनवल्या आहेत आणि प्रमाणित केल्या आहेत, फक्त त्याच गाड्यांमध्ये जास्त इथेनॉल असलेले इंधन वापरता येईल.

त्याच कार्यक्रमात बोलताना गडकरी यांनी राष्ट्रीय महामार्गांच्या दर्जावरही भाष्य केले. सोशल मीडियावर रस्त्यांच्या खराब स्थितीबद्दल येणाऱ्या तक्रारींची दखल घेऊन त्यांनी सुमारे 700 ते 800 प्रकल्पांचा आढावा घेतल्याचे सांगितले.

महामार्गांच्या दर्जाशी कोणतीही तडजोड केली जाणार नाही, असा कडक इशारा गडकरी यांनी यावेळी दिला. त्यासोबतच पुढच्या दोन वर्षांत देशातील महामार्गांवरून प्रवास करताना प्रवाशांना कोणत्याही प्रकारच्या खड्ड्यांचा किंवा गैरसोयीचा सामना करावा लागणार नाही, असे आश्वासनही त्यांनी दिले.