एथर कोनार्क स्कूटर दिल्लीत लॉन्च, 200 किमी रेंज, किंमत फक्त 79,999 रुपये
एथर एनर्जीने नवी फॅमिली इलेक्ट्रिक स्कूटर कोनार्क दिल्लीत लॉन्च केली असून सहा व्हेरियंट्समध्ये ती उपलब्ध आहे.
इलेक्ट्रिक टू-व्हीलरच्या भारतीय बाजारपेठेत नवनवीन गाड्या रोज दाखल होत असून ग्राहकांचा कल इलेक्ट्रिक स्कूटरकडे झपाट्याने वाढतोय. टीव्हीएस आणि बजाज या मोठ्या कंपन्यांना टक्कर देण्यासाठी एथर एनर्जीने आपली नवी फॅमिली इलेक्ट्रिक स्कूटर कोनार्क अधिकृतपणे राष्ट्रीय राजधानी दिल्लीत लॉन्च केली आहे.
दिल्लीत मिळणाऱ्या आकर्षक सबसिडीमुळे या स्कूटरची सुरुवातीची एक्स-शोरूम किंमत फक्त 79,999 रुपये ठेवण्यात आली असून त्यामुळे ग्राहकांमध्ये उत्सुकता निर्माण झाली आहे.
ही स्कूटर एथरच्या नव्या EL प्लॅटफॉर्मवर तयार केली गेली असून रोजच्या प्रवासासाठी ती अधिक आरामदायक आणि सुलभ राहावी अशा पद्धतीने तिची रचना करण्यात आली आहे. ग्राहकांच्या गरजेनुसार S आणि Z या दोन प्रोडक्ट लाईनखाली एकूण सहा वेगवेगळ्या व्हेरियंट्समध्ये कोनार्क उपलब्ध करण्यात आली आहे. यातील IDC रेंज पर्यायांमुळे ही स्कूटर एका चार्जमध्ये तब्बल 200 किलोमीटरपर्यंत रेंज देऊ शकते. दिल्ली-एनसीआरमध्ये वाढत्या मागणीमुळे कंपनीने आपले नेटवर्क वाढवत 11 एक्सपिरियन्स सेंटर आणि 273 हून जास्त लेक्स (LECCS) फास्ट चार्जिंग पॉईंट्स उभे केले आहेत.
या स्कूटरचे सर्वात मोठे वैशिष्ट्य म्हणजे तिच्यात वापरलेली बॅटरी. सर्व व्हेरियंट्समध्ये पाचव्या पिढीचा Bedrock बॅटरी पॅक बसवण्यात आला असून कंपनी या बॅटरीवर 10 वर्षे किंवा 1,00,000 किलोमीटर, यापैकी जे आधी पूर्ण होईल तोपर्यंत सर्वसमावेशक वॉरंटी देत आहे. या काळात बॅटरी हेल्थ 70 टक्क्यांपेक्षा खाली जाणार नाही, अशी हमी कंपनीने दिली आहे. सर्व्हिस इंटरवल वाढवून 10,000 किलोमीटर करण्यात आल्यामुळे मेंटेनन्सचा खर्च मोठ्या प्रमाणात कमी होणार आहे.
भारतीय रस्त्यांची अवस्था लक्षात घेऊन या स्कूटरची बांधणी करण्यात आली आहे. यात 14 इंचाचे पुढचे अलॉय व्हील, 12 इंचाचे मागचे व्हील आणि लांब पल्ल्याचे सस्पेंशन देण्यात आले आहे. मागील बाजूस मेटल पॅनेल आणि स्टील युनिबॉडी चेसिस वापरल्यामुळे स्कूटर अधिक भक्कम बनते.
सुरक्षित आणि स्मार्ट प्रवासासाठी यात अनेक अॅडव्हान्स फीचर्स देण्यात आले आहेत. AeBS म्हणजे अॅडव्हान्स इलेक्ट्रॉनिक ब्रेकिंग सिस्टम रस्त्याच्या परिस्थितीनुसार ब्रेक फोर्स आपोआप नियंत्रित करते. MagicKey फीचरमुळे की-लेस अनुभव आणि ऑटोमॅटिक लॉकिंगची सुविधा मिळते. AutoPop आणि AirWalk ही सेगमेंट-फर्स्ट फीचर्स सीटखालील स्टोरेज सहज उपलब्ध करण्यासाठी आणि अरुंद जागेत पार्किंगमध्ये स्कूटर सहज हाताळण्यासाठी देण्यात आली आहेत. चार्जिंगसाठी यात इंटिग्रेटेड ऑनबोर्ड चार्जर आणि पर्यायी 450W ऑफबोर्ड चार्जर मिळतो, ज्यामुळे चार्जिंगचा वेळ जवळपास अर्ध्यावर येतो.
