आशियाई क्रीडा स्पर्धा: सात्विक-चिराग पहिल्याच फेरीत बाद, थायलंडच्या जोडीने ३ सेटमध्ये नमवले

आशियाई क्रीडा स्पर्धा २०२६ मधील पुरुष दुहेरी बॅडमिंटन प्रकारात भारताला मोठा धक्का बसला आहे. गतविजेती जोडी सात्विकसाईराज रंकीरेड्डी आणि चिराग शेट्टी शुक्रवारी पहिल्याच फेरीत स्पर्धेबाहेर पडली. थायलंडच्या पीराचाई सुकफुन आणि पक्कापॉन तीरतसाकुल या जोडीने त्यांना नमवले.

जागतिक क्रमवारीत पाचव्या स्थानावर असलेल्या भारतीय जोडीचा हा सामना इचिनोमिया सिटी म्युनिसिपल जिम्नॅशियममध्ये झाला. प्रतिस्पर्धी थाई जोडी जागतिक क्रमवारीत ३६ व्या क्रमांकावर असूनही त्यांनी सात्विक-चिराग यांना २१-१२, १९-२१, १४-२१ अशा फरकाने हरवले. या निकालामुळे भारताच्या या स्टार जोडीचे आव्हान स्पर्धेच्या पहिल्याच टप्प्यात संपुष्टात आले.

याआधी सात्विक आणि चिराग यांनी चायना मास्टर्स स्पर्धा जिंकली होती आणि त्याच फॉर्मसह ते आशियाई क्रीडा स्पर्धेत उतरले होते. चायना मास्टर्सच्या अंतिम सामन्यात एक सेट गमावूनही या जोडीने पुनरागमन करत ७० मिनिटे चाललेल्या लढतीत चीनच्या हे जितिंग आणि रेन शियांग्यू यांना ११-२१, २१-१३, २१-१७ असे हरवले होते.

आशियाई क्रीडा स्पर्धेतील थायलंडविरुद्धच्या सामन्यात मात्र सात्विक-चिराग यांची सुरुवात दमदार झाली होती. त्यांनी पहिला सेट २१-१२ असा सहज जिंकत सामन्यावर पकड मिळवली होती. पण दुसऱ्या सेटमध्ये सुकफुन आणि तीरतसाकुल या जोडीने जोरदार पुनरागमन करत भारतीय जोडीला नमवले. थाई खेळाडूंनी हा सेट २४ मिनिटांत २१-१९ असा जिंकला आणि सामन्याचे पारडे स्वतःकडे वळवले.

निर्णायक तिसऱ्या सेटमध्येही सात्विक-चिराग यांना अपयश आले. थाई जोडीने अवघ्या १९ मिनिटांत हा सेट २१-१४ असा जिंकत सामना आपल्या नावे केला. अशा प्रकारे पक्कापॉन तीरतसाकुल आणि पीराचाई सुकफुन यांनी भारताच्या गतविजेत्या जोडीला पहिल्याच फेरीतून बाहेरचा रस्ता दाखवला.

दुसरीकडे मिश्र दुहेरी प्रकारात भारताला दिलासादायक कामगिरी पाहायला मिळाली. तनिषा क्रास्टो आणि ध्रुव कपिला या जोडीने सलग दोन विजय मिळवत उपांत्यपूर्व फेरी गाठली आहे. पहिल्या फेरीत त्यांनी मालदीवच्या निबाल अहमद आणि अमिनाथ नबीहा अब्दुल रझ्झाक यांना २१-८, २१-७ असे हरवले. त्यानंतर मलेशियाच्या शेवॉन जेनी लाई आणि सून हुआत गोह या जोडीविरुद्ध एका तासाच्या चुरशीच्या सामन्यात तनिषा-ध्रुव यांनी २२-२०, २४-२२ असा विजय मिळवत अंतिम आठ जोड्यांमध्ये स्थान पक्के केले. आता उपांत्यपूर्व फेरीत त्यांची गाठ चीनच्या यान झे फेंग आणि डोंगपिंग हुआंग यांच्याशी पडणार आहे.

याशिवाय महिला एकेरीत उन्नती हुडा हिनेही दुसऱ्या फेरीत प्रवेश केला आहे. तिने उत्तर कोरियाच्या मी सॉन्ग यू हिला ३० मिनिटांच्या सामन्यात २१-९, २१-१० असे हरवले.