दिनेश ठक्कर यांची मुंबईत 711 कोटींना टॉवर खरेदी, देशातील सर्वात मोठा घर व्यवहार

देशातील सर्वात मोठ्या रिटेल स्टॉकब्रोकर्सपैकी एक असलेल्या Angel One Ltd चे संस्थापक दिनेश ठक्कर यांनी मुंबईत एक आलिशान निवासी टॉवर तब्बल 711 कोटी रुपये (74.3 दशलक्ष डॉलर) मोजून खरेदी केला आहे. देशातील एका स्वतंत्र निवासी घरासाठी झालेला हा आतापर्यंतचा सर्वात मोठा व्यवहार असल्याचे समोर आले आहे.

ठक्कर यांनी खरेदी केलेल्या या Embassy Tower चे मुख्य प्रवेशद्वार समुद्राच्या दिशेने आहे. या टॉवरला आठ मजले असून, तो एकूण 63,000 चौरस फूट म्हणजेच 5,853 चौरस मीटर एवढ्या क्षेत्रफळात उभा आहे. आपल्या स्वप्नातील घरासाठी ठक्कर यांनी हा मोठा व्यवहार केल्याचे सांगितले जात आहे.

या व्यवहाराची अधिकृत माहिती टॉवरचे विकासक Embassy Developments Ltd आणि दिनेश ठक्कर यांनी मंगळवारी एका संयुक्त निवेदनातून दिली. या घोषणेनंतर Embassy Developments च्या शेअरच्या किमतीत सुरुवातीच्या व्यवहारात 8.3 टक्क्यांपर्यंत वाढ नोंदवली गेली.

दिनेश ठक्कर यांचा ब्रोकिंग व्यवसाय 2020 मध्ये मुंबई शेअर बाजारात सूचीबद्ध झाला होता. कोविड-19 महामारीच्या काळात लॉकडाऊन लागू असताना ऑनलाइन ट्रेडिंगला मोठी चालना मिळाली, आणि याचाच फायदा Angel One सारख्या कंपन्यांना झाला.

ठक्कर यांनी केलेला हा व्यवहार भारतातील लक्झरी रिअल इस्टेट बाजारातील चढता आलेख दाखवतो. देशातील वाढती संपत्ती आणि छोट्या शहरांमधून उदयास आलेल्या कंपन्यांच्या शेअर बाजारातील लिस्टिंगमुळे अतिश्रीमंत भारतीय नागरिकांच्या संख्येत लक्षणीय वाढ होत असल्याचे नमूद करण्यात आले आहे.

याआधी गेल्या वर्षी USV Pvt Ltd च्या अध्यक्षा लीना गांधी तिवारी यांनी 639 कोटी रुपयांना एक अपार्टमेंट खरेदी केले होते. तसेच बँकर उदय कोटक आणि त्यांच्या कुटुंबाने समुद्रकिनाऱ्यालगतचा एक टॉवर 400 कोटी रुपयांपेक्षा अधिक किमतीला खरेदी केला होता.

भारतातील काही शहरांमध्ये लक्झरी अपार्टमेंट्सची विक्री काही तासांतच पूर्ण झाल्याची उदाहरणे समोर आली आहेत. प्रीमियम अपार्टमेंट्सच्या किमती आता न्यूयॉर्कमधील काही भागांतील घरांच्या किमतींशीही स्पर्धा करू लागल्या आहेत.

Embassy Developments ने जानेवारी महिन्यात मुंबईच्या रिअल इस्टेट बाजारात प्रवेश केला होता. मुंबईत निवासी टॉवर्स उभारण्यासाठी 4,500 कोटी रुपयांची गुंतवणूक करण्याची योजना कंपनीने त्यावेळी जाहीर केली होती.

ठक्कर यांनी घर खरेदी केलेल्या त्याच परिसरात Embassy च्या एका प्रकल्पाची एकूण विकास क्षमता म्हणजेच Gross Development Value ही 3000 कोटी रुपयांपेक्षा जास्त असल्याचे सांगण्यात आले आहे. या प्रकल्पात प्रत्येक मजल्यावर केवळ एकच निवासस्थान असून, तेथून समुद्राचे नयनरम्य दृश्य दिसते.