AIIMS INI-CET जानेवारी २०२७ पीजी मेडिकल प्रवेशासाठी अर्ज सुरू, १ नोव्हेंबरला परीक्षा
एम्स दिल्लीने पदव्युत्तर वैद्यकीय अभ्यासक्रमांच्या प्रवेशासाठी अर्ज प्रक्रिया सुरू केली असून १३ ऑक्टोबरपर्यंत नोंदणी करता येणार आहे.
पदव्युत्तर वैद्यकीय अभ्यासक्रमाला प्रवेश घेऊ इच्छिणाऱ्या विद्यार्थ्यांसाठी महत्त्वाची बातमी आहे. अखिल भारतीय आयुर्विज्ञान संस्था म्हणजेच एम्स, नवी दिल्ली यांनी INI-CET जानेवारी २०२७ सत्रासाठीची ऑनलाइन अर्ज प्रक्रिया सुरू केली आहे. नवी दिल्लीसह देशभरातील विविध राष्ट्रीय महत्त्वाच्या संस्थांमध्ये एमडी, एमएस, एम.सी.एच., डीएम आणि एमडीएस या पदव्युत्तर अभ्यासक्रमांच्या प्रवेशासाठी ही परीक्षा घेतली जाते.
इच्छुक आणि पात्र उमेदवारांना एम्सच्या aiimsexams.ac.in या वेबसाइटवरून अर्ज करता येईल. अर्ज करण्याची शेवटची तारीख १३ ऑक्टोबर २०२६ आहे. उमेदवारांनी नोंदणी प्रक्रिया याच तारखेपर्यंत पूर्ण करणे बंधनकारक आहे. अर्ज प्रक्रिया पूर्ण झाल्यानंतर १७ ते १९ ऑक्टोबर दरम्यान उमेदवारांना त्यांच्या अर्जाची स्थिती तपासता येईल. त्यानंतर अंतिम ऑनलाइन नोंदणीची स्थिती आणि प्रवेशपत्र २६ ऑक्टोबर २०२६ रोजी जाहीर होणार आहे.
ही परीक्षा १ नोव्हेंबर २०२६ रोजी होणार असून ती संगणकावर म्हणजे सीबीटी पद्धतीने घेतली जाईल. परीक्षेत उमेदवारांना एकूण २०० वस्तुनिष्ठ स्वरूपाचे प्रश्न विचारले जातील आणि हे सगळे प्रश्न सोडवण्यासाठी त्यांना ३ तास म्हणजेच १८० मिनिटांचा वेळ दिला जाईल. मार्किंग स्कीमनुसार प्रत्येक बरोबर उत्तराला १ गुण मिळेल, तर प्रत्येक चुकीच्या उत्तरासाठी एक तृतीयांश गुण कापले जातील. न सोडवलेल्या प्रश्नांसाठी मात्र कोणतेही गुण दिले जाणार नाहीत किंवा कापले जाणार नाहीत. त्यामुळे उमेदवारांनी उत्तरं देताना जपून द्यावी लागतील, कारण चुकीच्या उत्तरामुळे गुण कमी होऊ शकतात.
अर्ज शुल्काबाबत बोलायचं झालं तर, सर्वसाधारण आणि ओबीसी उमेदवारांना ४,००० रुपये भरावे लागतील, तर एससी, एसटी आणि ईडब्ल्यूएस उमेदवारांसाठी हे शुल्क ३,२०० रुपये इतकं आहे. हे शुल्क क्रेडिट कार्ड, डेबिट कार्ड किंवा नेट बँकिंगच्या माध्यमातून ऑनलाइन भरता येईल.
अर्ज करण्यासाठी उमेदवारांनी सर्वात आधी एम्सच्या aiimsexams.ac.in या अधिकृत वेबसाइटवर जायचं आहे. तिथे INI-CET नोंदणी लिंकवर क्लिक करून संबंधित कोर्स निवडावा लागेल. जन्मतारीख, प्रवर्ग, ईमेल आयडी अशी माहिती भरून नोंदणी करावी लागेल, त्यानंतर नोंदणीचा तपशील नोंदणीकृत ईमेल आयडीवर पाठवला जाईल. पुढे अर्जात विचारलेली सगळी माहिती भरून आवश्यक छायाचित्रं ठरलेल्या फॉरमॅटमध्ये अपलोड करावी लागतील. त्यानंतर ऑनलाइन पद्धतीने अर्ज शुल्क भरून फॉर्म सबमिट करायचा आहे. अर्ज पूर्ण झाल्यावर कन्फर्मेशन पेज डाउनलोड करून पुढील संदर्भासाठी जपून ठेवण्याचा सल्लाही उमेदवारांना देण्यात आला आहे.
