एलपीजी पुरवठ्यात अमेरिका भारताचा सर्वात मोठा पार्टनर बनला, अमेरिकन अधिकाऱ्याचं मोठं विधान

जागतिक बाजारात सध्या मोठा ताणतणाव असताना भारत आणि अमेरिका यांच्यातील संबंध मात्र गेल्या वर्षभरात अधिकच घट्ट झाले आहेत. दोन्ही देशांमधला व्यापार वाढतो आहे आणि खास करून ऊर्जा क्षेत्रात मोठी प्रगती दिसते आहे. अमेरिकेच्या परराष्ट्र विभागातील वरिष्ठ अधिकारी बेथनी मॉरिसन यांनी सांगितले की, अमेरिका आता भारताला एलपीजीचा सर्वात मोठा पुरवठा करणारा देश बनला आहे.

न्यूयॉर्कमधील फॉरेन प्रेस सेंटरमध्ये झालेल्या एका कार्यक्रमात मॉरिसन बोलत होत्या. या कार्यक्रमादरम्यान त्यांनी भारत आणि अमेरिका यांच्यातील संबंधांविषयी सविस्तर भाष्य केलं. त्यांनी सांगितले की, गेल्या वर्षभरात भारत आणि अमेरिका यांच्यातील भागीदारीची व्याप्ती बरीच वाढली आहे. दोन्ही देश आता ऊर्जा, संरक्षण, व्यापार आणि राजनैतिक संबंध अशा अनेक क्षेत्रांत एकत्र काम करत आहेत. भारत आपली ऊर्जेची गरज भागवण्यासाठी वेगवेगळ्या देशांकडून आणि वेगवेगळ्या स्रोतांकडून पुरवठा वाढवत असल्याचंही त्यांनी नमूद केलं, म्हणजे भारत आता एकाच देशावर अवलंबून न राहता आपले ऊर्जा स्रोत वाढवत आहे.

अमेरिका भारतासाठी एक महत्त्वाचा ऊर्जा पुरवठादार म्हणून पुढे आला आहे, असं सांगत मॉरिसन म्हणाल्या, "आम्हाला अभिमान आहे की अमेरिका आता भारताला एलपीजीचा सर्वात मोठा निर्यातदार देश आहे. भारत आपल्या ऊर्जा स्रोतांमध्ये विविधता आणत असताना अमेरिका देखील त्याचा एक पुरवठादार बनतो आहे, याचा आम्हाला आनंद आहे."

मॉरिसन यांनी भारत आणि अमेरिका यांच्यातील १० वर्षांच्या संरक्षण आराखडा कराराचाही उल्लेख केला. संरक्षण क्षेत्रासोबतच दोन्ही देश अणुऊर्जा क्षेत्रातही प्रगती करत असल्याचं त्यांनी सांगितलं. भारताने जवळपास २० वर्षांनंतर आपल्या अणुऊर्जा नियमांमध्ये सुधारणा करणारा 'शांती कायदा' मंजूर केला असून, हा कायदा भारताच्या अणुऊर्जा नियमांमध्ये मोठी सुधारणा घडवणारा आहे. यामुळे नागरी अणुऊर्जा क्षेत्रात भारत-अमेरिका सहकार्य वाढेल अशी अपेक्षा त्यांनी व्यक्त केली.

अमेरिकन अधिकाऱ्याने पुढे सांगितले की, भारत आणि अमेरिका यांच्यातील सहकार्य फक्त ऊर्जा आणि संरक्षण क्षेत्रापुरतं मर्यादित नाही. दोन्ही देशांमध्ये मोठे व्यापारी करारही होत आहेत. याशिवाय दोन्ही देश 'क्वाड'सारख्या मंचांवरही एकत्र काम करत आहेत. संपूर्ण दक्षिण आशिया ट्रम्प प्रशासनासाठी महत्त्वाचा असल्याचं मॉरिसन यांनी सांगितलं. त्यांच्या मते, आधी जगाच्या इतर भागांतील घडामोडींमुळे दक्षिण आशियात संकट निर्माण झालं की तेव्हाच त्याकडे विशेष लक्ष दिलं जायचं, म्हणजे दक्षिण आशियाकडे लक्ष देण्यामागचं कारण इतरत्र घडणाऱ्या घटना असायच्या. मात्र आता ट्रम्प प्रशासन दक्षिण आशियाला जगातील एक अत्यंत महत्त्वाचा प्रदेश मानत असून, अमेरिका या प्रदेशाकडे आता स्वतंत्रपणे आणि अधिक लक्ष देत असल्याचं त्यांनी नमूद केलं.