एका वर्षात दोनदा नोकरी गेली, सॉफ्टवेअर इंजिनिअरचा AI मुळे करिअरबाबत सवाल
Redditवर एका सॉफ्टवेअर इंजिनिअरने आपली व्यथा मांडली असून, एकाच वर्षात दोनदा नोकरी गेल्यानंतर तो पूर्णपणे खचून गेला आहे.
सॉफ्टवेअर इंजिनिअर म्हणजे भारी पगार आणि चांगलं आयुष्य, असं आतापर्यंत सगळ्यांना वाटायचं. पण आता हे चित्र पूर्णपणे बदललं आहे. AI म्हणजेच कृत्रिम बुद्धिमत्ता आल्यापासून IT क्षेत्रातल्या लोकांच्या नोकऱ्या धोक्यात आल्या आहेत. याच पार्श्वभूमीवर एका सॉफ्टवेअर इंजिनिअरची कहाणी सध्या Reddit वर व्हायरल होत आहे.
विशीच्या शेवटच्या वर्षात असणाऱ्या या तरुणाने आपली व्यथा पोस्टमधून मांडली आहे. एकाच वर्षात त्याला दोन वेळा नोकरीवरून काढून टाकण्यात आलं आहे. सॉफ्टवेअर क्षेत्रातच राहायचं की दुसरं काही करायचं, असा प्रश्न त्याला आता पडला आहे.
त्याने Reddit वर टाकलेल्या पोस्टचं टायटलच होतं, आज परत नोकरी गेली. एका वर्षात दुसऱ्यांदा. मी आता माझ्या भविष्याचा विचार करतोय. गेल्या वर्षाच्या शेवटी पहिल्या कंपनीतून त्याला काढण्यात आलं होतं. त्यानंतर अनेक महिने तो नोकरी शोधत होता. सहा महिन्यांनंतर कसंतरी त्याला चांगल्या पगाराची नोकरी मिळाली. सगळं आता ठीक होईल असं त्याला वाटलं. नवीन कंपनीत तो चांगलं काम करत होता, पण अडीच महिन्यातच त्याला परत काढून टाकलं. त्याच्यासोबत अजून बऱ्याच लोकांनाही काढण्यात आलं.
कंपनीने यासाठी कारण दिलं की, त्याच्या कामात काही गडबड नव्हती, तर खर्च कमी करायचा आहे आणि टीमची रचना बदलायची आहे म्हणून त्याला काढलं. म्हणजे त्याची काहीही चूक नसताना त्याची नोकरी गेली. या दोन्ही धक्क्यांमुळे तो पूर्णपणे खचून गेला असून त्याचा आत्मविश्वास तुटला आहे. सॉफ्टवेअर इंजिनिअरिंगमध्ये आता काही भविष्य आहे का, असा प्रश्न त्याला पडला आहे.
तो पुढे लिहितो की, तो काही श्रीमंत घरातला नाही. महिनाभर घरी बसणं किंवा वेगवेगळ्या करिअरमध्ये ट्राय करणं त्याला परवडणार नाही. पोटासाठी आणि करिअरसाठी त्याला आपलं गाव सोडून जिथे नोकरी मिळेल तिथे जावं लागलं होतं. आता परत नोकरी गेल्यावर याच रस्त्यावर चालत राहायचं का, असा विचार त्याच्या मनात येतो आहे.
AI चा परिणाम आपल्याला खूप जवळून जाणवत असल्याचं तो म्हणतो. AI ने सगळ्या डेव्हलपरची जागा घेतली आहे असं नाही, पण कंपन्या आता फक्त AI, प्रोडक्टिव्हिटी आणि खर्च कमी करण्याचाच विचार करत आहेत. यामुळे आधीच नोकरी टिकवण्यासाठी धडपडणाऱ्या लोकांना खूप टेन्शन आलं आहे. शेवटी तो लिहितो की, त्याला सहानुभूती नको आहे, फक्त सल्ला हवा आहे. असा अनुभव घेतलेल्यांनी त्याला पुढे काय करावं हे सांगावं, अशी विनंती त्याने केली आहे.
या पोस्टवर अनेकांनी कमेंट करत आपले अनुभव शेअर केले. एक जण म्हणाला की, गेल्या सहा वर्षात त्याला तीन वेळा काढण्यात आलं, त्यापैकी दोन वेळा त्याला चांगले पैसे मिळाले होते. नोकरीवरून काढणं आता खूप कॉमन झालं असल्याचं तो म्हणाला. दुसऱ्याने विशीत असल्याने सरकारी नोकरीचा विचार करण्याचा सल्ला दिला आणि सध्या मार्केट खराब असल्यामुळे सगळे फ्रीलान्सिंगकडे वळत असल्याचं सांगितलं. तिसऱ्याने दोन कंपन्यांच्या निर्णयावरून करिअर न ठरवता रेझ्युमे अपडेट करून परत नोकऱ्या शोधण्याचा सल्ला दिला. एका व्यक्तीने फक्त एवढंच लिहिलं की, त्याने हे आधीही केलं आहे आणि परत करेलही, शुभेच्छा.
