वर्षभरात सुमारे ७५ लाख ग्राहकांनी तोडले डीटीएच कनेक्शन, चार मोठ्या ऑपरेटर्सना फटका

गेल्या एका वर्षात देशातील पेड डीटीएच टीव्ही ऑपरेटर्सचे सुमारे 75 लाख (7.51 मिलियन) ग्राहक कमी झाले आहेत. म्हणजेच एवढ्या लोकांनी वर्षभरात आपले डीटीएच कनेक्शन बंद करण्याचा निर्णय घेतला. छतावरच्या छत्रीतून टीव्ही पाहण्याचा कल हळूहळू ओसरत चालल्याचे यातून दिसते.

टेलीकॉम रेग्युलेटरी अथॉरिटी ऑफ इंडिया म्हणजेच ट्राय हिच्या नव्या अहवालानुसार, देशातील चार प्रमुख डीटीएच ऑपरेटर्सच्या ग्राहकसंख्येत 13.4 टक्क्यांची घट झाली आहे. एका वर्षापूर्वी या ऑपरेटर्सचे ग्राहक सुमारे 5.6 कोटींहून अधिक होते. ती संख्या 30 जून 2026 पर्यंत सुमारे 4.85 कोटींपर्यंत खाली आली. ही घट अजूनही सुरूच आहे.

एप्रिल ते जूनच्या तिमाहीत वैयक्तिक एफएम रेडिओला जाहिरातींमधून मिळणाऱ्या कमाईतही घट झाली आहे.

डीटीएच कनेक्शन कमी होण्याचे सर्वात मोठे कारण म्हणजे स्वस्त हाय-स्पीड ब्रॉडबँड इंटरनेट आणि ओटीटी प्लॅटफॉर्म्सची वाढती लोकप्रियता. आजकाल लोकांना आपल्या आवडीचा कंटेंट हवा तेव्हा आणि हवा तिथे पाहायला आवडतो. डीटीएचमध्ये मात्र ठरावीक वेळीच ठरावीक शो पाहावा लागतो. शिवाय स्मार्ट टीव्ही आणि स्मार्ट स्टिकमुळे लोक इंटरनेटवर चालणाऱ्या आयपीटीव्ही आणि स्मार्ट ॲप पॅकेजकडे वळत आहेत. त्यांचा खर्च डीटीएच रिचार्जच्या तुलनेत बजेटला जास्त परवडणारा आहे. फक्त मोफत चॅनेल्स पाहायचे असलेले लोक डीडी फ्री डिशकडे जात असल्याचेही दिसत आहे.

ऑपरेटर्सनुसार आकडेवारी अशी आहे. टाटा प्ले 1.48 कोटी सबस्क्राइबर्ससह सर्वात मोठा ऑपरेटर बनण्याच्या दिशेने जात आहे. भारती टेलिमीडिया 1.35 कोटी सबस्क्राइबर्ससह दुसऱ्या स्थानी, सन डायरेक्ट 1.09 कोटी सबस्क्राइबर्ससह तिसऱ्या स्थानी, तर डिश टीव्ही इंडिया 2 लाख 10 हजार सबस्क्राइबर्ससह चौथ्या स्थानी आहे.

या आकड्यांमध्ये प्रसार भारतीच्या मोफत डीटीएच सेवेचे, म्हणजेच डीडी फ्री डिशचे सबस्क्राइबर्स धरलेले नाहीत. टेलिव्हिजन डिस्ट्रिब्यूशन प्लॅटफॉर्मवरील निवडक ऑपरेटर्सनी 30 जूनपर्यंत 9.67 कोटी ॲक्टिव्ह सबस्क्राइबर्स असल्याचे कळवले. यात 90 दिवसांपर्यंत इनॲक्टिव्ह राहिलेले आणि काही काळासाठी सेवा सस्पेंड केलेले यूजर्सही आहेत.

या 9.67 कोटींपैकी डीटीएचचे 4.85 कोटी सबस्क्राइबर्स होते. त्यानंतर केबल म्हणजेच मल्टी-सिस्टम ऑपरेटर्स (MSO) 3.72 कोटींसह दुसऱ्या स्थानी होते. इंटरनेट प्रोटोकॉल टेलिव्हिजन (आयपीटीव्ही) चे 62.1 लाख आणि हेडएंड-इन-द-स्काय (HITS) ऑपरेटर्सचे 47.2 लाख सबस्क्राइबर्स होते.

आयपीटीव्हीमध्ये भारती एअरटेल 40.9 लाख सबस्क्राइबर्ससह पहिल्या, तर हॅथवे डिजिटल 12.8 लाख यूजर्ससह दुसऱ्या स्थानी होते. ही आकडेवारी सर्व कंपन्यांची नाही. ती फक्त निवडक ऑपरेटर्सनी दिलेल्या माहितीवर आधारित आहे.