जाहिरातींमधील एआय कंटेंटसाठी ASCI ची नवी मार्गदर्शकतत्त्वे, लेबलिंगचे नियम ठरले

अॅडव्हर्टायझिंग स्टँडर्ड्स कौन्सिल ऑफ इंडिया म्हणजेच ASCI ने आज जाहिरातींमधील सिंथेटिकली जनरेटेड कंटेंटच्या (SGC) जबाबदार लेबलिंगसाठी मार्गदर्शकतत्त्वे जारी केली. कृत्रिमरित्या तयार केलेला कंटेंट वापरल्याचे जाहिरातदारांनी कधी उघड करायचे आणि कोणत्या प्रकारचा कंटेंट वापरायला परवानगी नाही, हे या नियमांत ठरवण्यात आले आहे.

मे महिन्यात या नियमांचा मसुदा जारी करण्यात आला होता. त्यावर भागधारकांशी चर्चा झाली आणि त्यानंतर अंतिम मार्गदर्शकतत्त्वे जाहीर करण्यात आली. ही मार्गदर्शकतत्त्वे प्रसिद्ध झाल्याच्या तारखेपासून तीन महिन्यांनंतर लागू होतील.

जाहिराती तयार करण्यासाठी आणि त्यात सुधारणा करण्यासाठी ब्रँड्स मोठ्या प्रमाणात आर्टिफिशियल इंटेलिजन्सचा वापर करत आहेत. हा कंटेंट ग्राहकांवर काय परिणाम करतो, यावर मार्गदर्शकतत्त्वांचा भर आहे. अवास्तव अपेक्षा निर्माण करणे, दुर्बल घटकांचा गैरफायदा घेणे, असुरक्षित परिस्थिती दाखवणे, संमतीशिवाय एखाद्याच्या रूपाचा वापर करणे किंवा खोटी व दिशाभूल करणारी माहिती देणे, यामुळे एसजीसी दिशाभूल करणारा किंवा हानीकारक ठरू शकतो. एसजीसी वापरणाऱ्या सर्व जाहिरातींना एएससीआय कोडचे पालन करणे बंधनकारक आहे.

मार्गदर्शकतत्त्वांमध्ये चार प्रमुख विभाग आहेत. पहिला विभाग प्रतिबंधित कंटेंटचा आहे. जाहिरात बेकायदेशीर असेल, हक्कांचे उल्लंघन करत असेल, दिशाभूल करणारे दावे करत असेल किंवा एएससीआय कोडचा भंग करत असेल, तर एआय लेबल लावले तरी तिच्यावरची बंदी कायम राहील. यात बनावट शिफारशी किंवा प्रशंसापत्रे तयार करणे, सिंथेटिक सादरीकरणातून उत्पादनाचे निकाल किंवा वैशिष्ट्ये दिशाभूल करणाऱ्या पद्धतीने सांगणे, ग्राहकांची दिशाभूल करण्यासाठी अस्तित्वात नसलेली ठिकाणे किंवा पार्श्वभूमी खरी म्हणून दाखवणे, अनधिकृत कॉपीराइट सामग्री वापरणे आणि संमतीशिवाय डीपफेक किंवा एखाद्याचा फोटो वापरणे, यांचा समावेश आहे.

दुसरा विभाग अनिवार्य लेबलिंगचा आहे. एसजीसी ग्राहकांच्या निर्णयांवर प्रभाव टाकतो आणि खुलासा न केल्यास ग्राहकांची दिशाभूल होऊ शकते, तिथे लेबल लावावेच लागेल. कृत्रिमरित्या तयार केलेले इन्फ्लुएन्सर्स आणि ब्रँड अॅम्बेसेडर्स, वैयक्तिकृत संदेशासाठी संमतीने केलेली खऱ्या व्यक्तीच्या चेहऱ्याची किंवा आवाजाची नक्कल, ग्राहकांवर प्रभाव टाकू शकणाऱ्या बनावट घटना किंवा पार्श्वभूमी, सध्या अस्तित्वात नसलेल्या उत्पादनांचे प्रात्यक्षिक, हेडफोन्ससारख्या उत्पादनाच्या मुख्य वैशिष्ट्यांशी अत्यंत संबंधित एसजीसी-निर्मित साऊंड इफेक्टस, तसेच देय भरलेल्या किंवा प्रायोजित एआय-निर्मित उत्पादन सूचना, हे यात येतात. प्रायोजित सूचनांवर स्पष्टपणे "स्पॉन्सर्ड बाय (ब्रँड)" असे लेबल असणे आवश्यक आहे.

तिसरा विभाग लेबलिंगची गरज नसलेल्या कंटेंटचा आहे. एसजीसीमुळे माहितीपूर्ण निर्णय घेण्याच्या ग्राहकाच्या क्षमतेवर काहीही परिणाम होत नसेल, तर खुलासा करायची गरज नाही. कलर करेक्शन, लाइट अॅडजस्टमेंट, आवाज कमी करणे आणि किरकोळ डाग काढणे असे नियमित एडिटिंग, सजावटीचे किंवा सभोवतालचे पार्श्वभूमी घटक, स्पष्टपणे काल्पनिक असणारे इफेक्ट्स, जाहिरातीचा मसुदा तयार करण्यासारखा प्रशासकीय आणि मजकूर-आधारित वापर, तसेच उपशीर्षके, भाषांतर आणि अचूक ऑडिओ वर्णन यांसारखे सुलभता वाढवणारे अॅप्लिकेशन्स यात मोडतात.

चौथा विभाग डिस्क्लोजर लेबल्स आणि अंमलबजावणीचा आहे. माहिती उघड करणे आवश्यक असेल, तिथे ब्रँड्स जाहिरात प्लॅटफॉर्मने दिलेली "एआय वापरून ऑडिओ/व्हिडिओ तयार केला आहे" किंवा "एआय वापरून ऑडिओ/व्हिडिओमध्ये बदल केला आहे" अशी लेबल्स वापरू शकतात. सिंथेटिक कंटेंटचे स्वरूप ग्राहकांना अचूक समजेल अशी पर्यायी लेबल्सही ब्रँड्स वापरू शकतात. हे खुलासे लागू असलेल्या ठिकाणी अस्वीकृतीवरील एएससीआय कोडच्या मार्गदर्शक तत्त्वांनुसार असावे लागतील.

ASCI च्या सेक्रेटरी जनरल आणि सीईओ मनिषा कपूर म्हणाल्या, "जाहिरातींमध्ये एआयचा वापर वेगाने वाढत आहे आणि ग्राहकांना केंद्रस्थानी ठेवून आमचा दृष्टिकोनही त्यानुसार बदलणे गरजेचे आहे. विशेषतः एआय लेबलशिवाय जाहिरातीबद्दल ग्राहकांवर विपरीत परिणाम होऊ शकतो, ज्यामुळे ही मार्गदर्शकतत्त्वे व्यावहारिक पारदर्शकतेची खात्री देतात. महत्त्वाचे म्हणजे, या मार्गदर्शकतत्त्वांमध्ये स्पष्ट करण्यात आले आहे की, केवळ एआय लेबल लावल्याने कोणतीही दिशाभूल करणारी जाहिरात स्वीकारार्ह ठरत नाही. संवाद प्रामाणिक, पारदर्शक आणि एएससीआय कोडशी सुसंगत असेल याची खात्री करण्याची जबाबदारी जाहिरातदारांची राहील."