गुरनूर ब्रारच्या माऱ्यापुढे किवी ढेपाळले, न्यूझीलंड 134 रन्सवर ऑल आउट; भारतासमोर 135 रन्सचे टार्गेट

भारत आणि न्यूझीलंड यांच्यातला दुसरा वनडे सामना आज सुरू आहे. न्यूझीलंडचा संघ 134 रन्सवर ऑल आउट झाला आणि त्यांनी भारतासमोर 135 रन्सचे टार्गेट ठेवले आहे. म्हणजेच हा सामना जिंकण्यासाठी भारताला 135 रन्सची गरज आहे.

आज पावसाने हजेरी लावली, त्यामुळे सामना सुरू होण्यास उशीर झाला. म्हणून 50 ओव्हर्सऐवजी हा सामना आता प्रत्येकी 47 ओव्हर्सचा खेळवला जात आहे. भारताचा कर्णधार शुभमन गिलने टॉस जिंकला आणि प्रथम गोलंदाजी करण्याचा निर्णय घेतला. त्यामुळे न्यूझीलंडला प्रथम फलंदाजीला बोलावण्यात आले. भारताच्या गोलंदाजांनी हा निर्णय एकदम योग्य ठरवला.

न्यूझीलंडच्या फलंदाजांनी पुन्हा एकदा निराशा केली. डावाची सुरुवात विल यंग आणि टिम सायफर्ट यांनी केली. सायफर्ट शून्यावर आउट झाला, तर यंग 6 रन्स करून परतला. वन डाउन आलेल्या हेन्री निकोल्सने 11 रन्सची खेळी केली. टॉम लथमचे योगदान फक्त 7 रन्सचे होते. फॉर्ममध्ये असलेला ग्लेन फिलिप्सही शून्यावर आउट झाला. अशा रितीने न्यूझीलंडचा अर्धा संघ 50 रन्सच्या आतच तंबूत परतला होता.

अशा अवघड परिस्थितीत डॅरिल मिचेल आणि मिशेल सँटनर यांनी न्यूझीलंडचा डाव सांभाळून धरला. मिचेल 55 रन्स करून आउट झाला. काईल जेमिसन 7 रन्स करून परतला.

भारताच्या गोलंदाजांनी न्यूझीलंडची अक्षरशः वाट लावली. 50 रन्सच्या आत त्यांनी न्यूझीलंडचे पाच महत्त्वाचे फलंदाज बाद केले. औकिब नबीने अचूक गोलंदाजी करत 2 विकेट्स घेतल्या. केएल राहुलने सुरेख झेल घेतला आणि त्यामुळे नबीला दुसरी विकेट मिळाली. या विकेटमुळे न्यूझीलंडचे दोन्ही ओपनर माघारी गेले. अंशुल कंबोजने एक विकेट घेतली. गुरनूर ब्रारने कमाल गोलंदाजी केली. त्याने मेडन ओव्हर टाकली आणि एकूण 3 विकेट्स घेतल्या. भारताच्या भेदक गोलंदाजीपुढे किवी फलंदाज टिकू शकले नाहीत.

आजचा सामना जिंकून मालिकेत आघाडी घ्यायचा भारताचा प्रयत्न असेल. न्यूझीलंड मात्र पहिला विजय मिळवण्यासाठी धडपड करताना दिसेल.

भारताच्या प्लेइंग ११ मध्ये शुभमन गिल (कर्णधार), रोहित शर्मा, विराट कोहली, श्रेयस अय्यर, अक्षर पटेल, केएल राहुल, नमन धीर, अंशुल कंबोज, आकिब नबी, गुरनूर ब्रार आणि अर्शदीप सिंग यांचा समावेश आहे.

न्यूझीलंडच्या संघात टिम सेफर्ट, विल यंग, हेन्री निकोल्स, डॅरिल मिशेल, टॉम लॅथम, ग्लेन फिलिप्स, मिचेल सँटनर (कर्णधार), नॅथन स्मिथ, काइल जेमिसन, जेकब डफी आणि ब्लेअर टिकनर आहेत.