पगार मागितला की खंडणी? दुर्गापूरमधील प्रकरणात पोलीस आणि तक्रारदार यांच्या दोन वेगळ्या बाजू

चंद्रपूर : वेकोलिअंतर्गत चालणाऱ्या KVR कंपनीत खंडणी मागितल्याच्या आरोपावरून तिघांना अटक करण्यात आली आहे. ७ ऑक्टोबर रोजी याबाबत दुर्गापूर पोलीस स्टेशनमध्ये गुन्हा दाखल झाला. अजय कुचनकर, सुमित रामटेके आणि पवन जाधव अशी अटकेत असलेल्यांची नावे आहेत. कंपनीचे व्यवस्थापक साईप्रकाश गाजूला यांच्या तक्रारीनुसार ही कारवाई झाली, असे सांगण्यात आले आहे.

मात्र या प्रकरणाला आता वेगळे वळण मिळाले आहे. हे तरुण पगार मागण्यासाठी आले होते, असे गाजूला यांनी माध्यमांना सांगितले आहे. म्हणजेच एकीकडे खंडणी मागितल्याचा आरोप आहे आणि दुसरीकडे तक्रारदारच वेगळी माहिती देत आहेत. पोलिसांचा पुढील तपास सुरू आहे.

पोलिसांच्या माहितीनुसार, ७ ऑक्टोबर रोजी दुर्गापूर पोलीस स्टेशनच्या हद्दीतील वरवट येथे असलेल्या KVR कंपनीतून व्यवस्थापक गाजूला यांनी पोलिसांना फोन केला. काही तरुण कंपनीत गोंधळ घालत आहेत आणि पैशांची मागणी करत आहेत, असे त्यांनी कळवले. त्यानंतर दुर्गापूर पोलीस तातडीने कंपनीत पोहोचले. तिथे अजय कुचनकर, सुमित रामटेके आणि पवन जाधव या तिघांना अटक करून त्यांच्यावर गुन्हा दाखल करण्यात आला.

पोलिसांनी दिलेल्या माहितीनुसार, त्या तिघांनी कंपनी चालू देणार नाही, चालवायची असेल तर महिन्याला ५० हजार रुपये द्या, अशी मागणी केली, असा आरोप आहे. कंपनी व्यवस्थापकांच्या तक्रारीवरून ही कारवाई केल्याचे पोलिसांकडून सांगण्यात आले.

पण तक्रारदार म्हणजेच फिर्यादी गाजूला यांनी प्रसारमाध्यमांना याच्या उलट माहिती दिली. हे तरुण पगार मागण्यासाठी आले होते आणि त्यावरूनच सगळा वाद झाला, असे त्यांनी सांगितले. त्यामुळे असे प्रश्न उभे राहतात की, जर ते पगार मागण्यासाठी आले होते, तर त्यांच्यावर खंडणीचा गुन्हा का दाखल झाला? आणि ते कंपनीत कामाला होते, तर त्यांना खंडणी मागण्याची गरज काय होती? यावर पोलिसांनी असे सांगितले की, फिर्यादी गाजूला यांना काही समजत नसल्याने त्यांनी ती माहिती दिली. या उत्तराने प्रश्न आणखी वाढले आहेत.

तिन्ही तरुणांनी खरोखर खंडणी मागितली असेल, तर त्यांच्यावर कारवाई व्हायलाच हवी. पण कंपनीने दबाव आणून हे सगळे केले असेल, तर ती अन्यायकारक बाब ठरते. कंपनीत काम केल्यानंतर पगार मिळाला नाही, तर माणूस पगार मागायला जाणारच. मग इथे खंडणीचा गुन्हा का दाखल झाला, हे समजण्यापलीकडचे आहे, असा सूर या प्रकरणात उमटत आहे. या प्रकरणाचा पुढील तपास दुर्गापूर पोलीस करत आहेत.