डुकाटी मल्टिस्ट्राडा V4 : सर्व गरजांसाठी एकच अॅडव्हेंचर बाईक, जाणून घ्या फीचर्स आणि किंमत

ऑटोमोबाईल क्षेत्रात सध्या मोठी प्रगती होत असून बाईक सेक्शनमध्ये चाहत्यांच्या मागणीनुसार नवनवीन मॉडेल्स बाजारात येत आहेत. एकाच बाईकवरून शहरातील रोजचा प्रवास, लांब पल्ल्याचे टूरिंग आणि ऑफ-रोड राइडिंग अशा वेगवेगळ्या गरजा पूर्ण करण्याचा ट्रेंड सध्या वाढताना दिसतो आहे. याच कारणामुळे अॅडव्हेंचर बाइक्सना बाजारात चांगली मागणी मिळत आहे आणि याच सेगमेंटमधली एक 'ऑल-राउंडर' बाईक म्हणजे डुकाटी मल्टिस्ट्राडा V4.

या बाईकमध्ये 1,158cc क्षमतेचे लिक्विड-कूल्ड, 90-डिग्री V4 ग्रांटुरिस्मो इंजिन बसवण्यात आले आहे. हे इंजिन तब्बल 170 हॉर्सपॉवर आणि 91 lb-ft इतका टॉर्क निर्माण करते. शहरातील कमी वेगाच्या राइडपासून ते हायवेवरील वेगवान प्रवासापर्यंत पॉवर डिलिव्हरी नियंत्रित राहावी यासाठी हे इंजिन खास ट्यून करण्यात आले आहे.

हार्डवेअरच्या बाबतीत बोलायचे झाल्यास या बाईकला अॅल्युमिनियम मोनोकोक फ्रेम मिळते, सोबतच मार्झोकी सस्पेंशन आणि ब्रेम्बो ब्रेक्स देण्यात आले आहेत. ब्रेकिंगसाठी समोर 320mm चे ड्युअल डिस्क तर मागच्या बाजूला 280mm चे डिस्क बसवले आहे. टायर्सच्या बाबतीत 19-इंचाचे फ्रंट आणि 17-इंचाचे रिअर ट्यूबलेस टायर्स देण्यात आले असून यामुळे डांबरी रस्ता असो किंवा खराब रस्ता, बाईकला दोन्हीकडे चांगली पकड मिळण्यास मदत होते.

लांब पल्ल्याच्या प्रवासात रायडरला जास्तीत जास्त आराम मिळावा यावरही डुकाटीने खास लक्ष दिले आहे. यासाठी 33.1 ते 33.9 इंचांपर्यंत अॅडजस्ट करता येणारी सीट, उंच विंडस्क्रीन आणि सरळ अशी राइडिंग पोझिशन बाईकमध्ये देण्यात आली आहे. याशिवाय सस्पेंशनमध्ये ऑटोमॅटिक फास्ट-लोअरिंगची सुविधाही उपलब्ध करून देण्यात आली आहे, जेणेकरून लांबच्या राइडमध्ये त्रास होणार नाही.

टेक्नॉलॉजीच्या बाबतीतही ही अॅडव्हेंचर बाईक कुठेही मागे नाही. यामध्ये वेगवेगळे राइडिंग मोड्स, पॉवर मोड्स, कॉर्नरिंग ABS, ट्रॅक्शन कंट्रोल, व्हीली कंट्रोल, कॉर्नरिंग लाइट्स आणि व्हेईकल होल्ड कंट्रोलसारखी फीचर्स दिली आहेत. याशिवाय 5-इंचाचा TFT डिस्प्ले, स्मार्टफोन कनेक्टिव्हिटी, क्विकशिफ्टर आणि क्रूझ कंट्रोलसारखी फीचर्सही या बाईकमध्ये मिळतात, ज्यामुळे एकंदरीत राइडिंग एक्सपिरीयंस हायफाय बनतो.

किंमतीबद्दल बोलायचे झाल्यास डुकाटी मल्टिस्ट्राडा V4 ची सुरुवातीची किंमत 19,995 डॉलर इतकी आहे. तर याहून जास्त प्रीमियम असलेल्या V4 S या व्हेरिएंटची किंमत 29,995 डॉलर इतकी आहे. या महागड्या व्हेरिएंटमध्ये इलेक्ट्रॉनिक सस्पेंशन, रडार-असिस्टेड अॅडॅप्टिव्ह क्रूझ कंट्रोल, ब्लाइंड-स्पॉट डिटेक्शन आणि 6.5-इंचाचा TFT डिस्प्ले यांसारखी अतिरिक्त फीचर्स रायडर्सना मिळतात.