विमानातील 180 प्रवाशांसाठी भयानक दिवस; सह-वैमानिकाच्या चाकू हल्ल्यानंतर कॅप्टन स्मित मच्छार चर्चेत
दुबईहून तेल अवीवकडे निघालेल्या फ्लायदुबईच्या विमानात बुधवारी (दि. 30) सह-वैमानिकाने मुख्य वैमानिक कॅप्टन स्मित मच्छार यांच्यावर चाकूने हल्ला केला.
नवी दिल्ली : दुबईहून इस्रायलकडे निघालेल्या विमानातील 180 प्रवाशांसाठी बुधवारचा दिवस (दि. 30) भयानक ठरला. विमान हजारो फूट उंचीवर असताना सह-वैमानिकाने अचानक मुख्य वैमानिकावर चाकूने हल्ला केला आणि एकच गोंधळ उडाला. हे मुख्य वैमानिक भारतीय वंशाचे कॅप्टन स्मित मच्छार आहेत.
हे विमान फ्लायदुबईचे होते आणि ते दुबईहून तेल अवीवकडे जात होते. बुधवारी घडलेल्या या घटनेनंतर कॅप्टन स्मित मच्छार यांचे नाव सगळीकडे चर्चेत आले आहे. फ्लायदुबईच्या या विमानाच्या कॉकपिटमध्ये हिंसक संघर्ष सुरू असताना विमानावरचे नियंत्रण राखण्याची जबाबदारी त्यांच्यावर येऊन पडली.
मच्छार यांच्याबद्दल उपलब्ध असलेल्या व्यावसायिक माहितीनुसार, बोईंग 737 विमान चालवण्याचा त्यांना खूप मोठा अनुभव आहे. त्यांनी आपल्या वैमानिक कारकिर्दीतली महत्त्वाची वर्षे भारतातील स्पाईसजेटमध्ये घालवली. तिथे ते सुमारे 11 वर्षे कामावर होते. या काळात ते पायलट-इन-कमांड आणि वरिष्ठ कमांडर म्हणून काम करत होते.
नोव्हेंबर 2020 पासून त्यांनी लाइन ट्रेनिंग कॅप्टन म्हणूनही काम केले. या भूमिकेत त्यांच्यावर इतर वैमानिकांना प्रशिक्षण देण्याची आणि त्यांच्या कामगिरीचे मूल्यमापन करण्याची महत्त्वाची जबाबदारी सोपवण्यात आली होती. म्हणजेच स्वतः विमान उडवण्याबरोबरच प्रशिक्षणाच्या बाजूलाही त्यांनी हातभार लावला. लाइन ट्रेनिंग कॅप्टन म्हणून त्यांनी इतर वैमानिकांच्या प्रशिक्षणाच्या कामात सहभाग घेतला.
त्यांच्या व्यावसायिक प्रोफाइलमध्ये एकूण उड्डाण अनुभव सुमारे 9750 तास असल्याचे नमूद केले आहे. त्यांनी बोईंग 737-800, 737 मॅक्स-8 आणि 737 मॅक्स-9 ही विमाने उडवली आहेत. इतक्या वर्षांच्या वैमानिक अनुभवामुळे बोईंग 737 मालिकेतील विमाने चालवण्याचा त्यांना व्यापक अनुभव आहे.
फ्लायदुबईत रुजू होताना ते थेट कॅप्टन पदावर आले होते. आधीपासून अनुभवी असलेल्या वैमानिकाला दुसऱ्या विमान कंपनीत थेट कॅप्टन म्हणून घ्यायचे असेल, तेव्हा अशा प्रकारची नियुक्ती केली जाते.
ग्रीसमधील मायकोनोस विमानतळावरही कॅप्टन स्मित यांना आव्हानात्मक परिस्थितीचा सामना करावा लागला होता. तिथे उतरताना त्यांना अतिशय धोकादायक हवामान भेटले. जोरदार वारे वाहत होते आणि अचानक विंडशियर तयार झाला. विंडशियर म्हणजे वाऱ्याची दिशा आणि वेग यात होणारा तीव्र बदल. त्यामुळे विमान थेट जमिनीवर आदळू शकले असते.
अशा वेळी चुकीला अजिबात वाव नसतो. तरीही न घाबरता स्मित यांनी सिम्युलेटरमध्ये शिकलेले विंडशियर एस्केप तंत्र वापरले. त्यांनी विमानाला पूर्ण शक्ती दिली आणि विमान सुरक्षितपणे उतरवले.
