सरदार पटेल महाविद्यालयाचे डॉ. कुलदीप गोंड गोंडवाना विद्यापीठाच्या पहिल्या पुरस्काराचे मानकरी

चंद्रपूरच्या सरदार पटेल महाविद्यालयासाठी हा अभिमानाचा क्षण ठरला आहे. महाविद्यालयाच्या शारीरिक शिक्षण व क्रीडा विभागाचे प्रमुख डॉ. कुलदीप राजकिशोर गोंड यांना गोंडवाना विद्यापीठाचा पहिला 'उत्कृष्ट शारीरिक शिक्षण निर्देशक पुरस्कार' देण्यात आला.

विद्यापीठाच्या वर्धापन दिनानिमित्त एक कार्यक्रम झाला. त्यात मान्यवरांच्या हस्ते डॉ. गोंड यांचा शॉल, श्रीफळ, सन्मानचिन्ह, सन्मानपत्र आणि रोख रक्कम देऊन गौरव करण्यात आला.

महाविद्यालयातील शारीरिक शिक्षण व क्रीडा क्षेत्राच्या विकासासाठी डॉ. गोंड यांनी सातत्याने उल्लेखनीय काम केले. त्याची दखल घेऊन गोंडवाना विद्यापीठाने त्यांची या पुरस्कारासाठी निवड केली. विद्यापीठस्तरीय विविध आंतरमहाविद्यालयीन क्रीडा स्पर्धांचे आयोजन, खेळाडूंना मार्गदर्शन, क्रीडा प्रशिक्षण आणि निवड चाचण्या, तसेच विद्यार्थ्यांमध्ये क्रीडा संस्कृती रुजवण्यासाठी त्यांनी केलेल्या कामाचा यानिमित्ताने सन्मान झाला.

पुरस्कार प्रदान करताना गोंडवाना विद्यापीठाचे कुलगुरू डॉ. प्रशांत बोकारे उपस्थित होते. लक्ष्मीनारायण अभिनव तंत्रज्ञान विद्यापीठ, नागपूरचे डॉ. अतुल वैद्य प्रमुख अतिथी होते. गडचिरोलीचे जिल्हाधिकारी श्री अविश्यांत पंडा विशेष अतिथी म्हणून आले होते. विद्यापीठाचे प्र-कुलगुरू डॉ. श्रीराम कावळे आणि कुलसचिव डॉ. अनिल हिरेखन यांच्याही हस्ते डॉ. गोंड यांना सन्मानित करण्यात आले.

या कामगिरीबद्दल सर्वोदय शिक्षण मंडळाचे अध्यक्ष अरविंद पोरेड्डीवार, कार्याध्यक्ष आ. किशोर जोरगेवार, उपाध्यक्ष सुदर्शन निमकर आणि सगुणा तलांडी, सचिव प्रशांत पोटदुखे, कोषाध्यक्ष संदीप गड्डमवार यांनी त्यांचे अभिनंदन केले. मंडळाचे कार्यकारी सदस्य राकेश पटेल, शेख रमजान, सुरेश पोटदुखे आणि जीनेश पटेल यांनीही शुभेच्छा दिल्या.

महाविद्यालयाचे प्राचार्य डॉ. पी. एम. काटकर, उपप्राचार्य डॉ. स्वप्निल माधमशेट्टीवार, शारीरिक शिक्षण संचालिका डॉ. पुष्पांजली कांबळे, प्राध्यापकवृंद, शिक्षकेतर कर्मचारी, खेळाडू आणि विद्यार्थ्यांनीही डॉ. गोंड यांचे अभिनंदन केले.

या पुरस्कारामुळे सरदार पटेल महाविद्यालयाच्या शारीरिक शिक्षण व क्रीडा विभागाच्या कामाला नवी प्रेरणा मिळाली आहे. महाविद्यालयाच्या शैक्षणिक व क्रीडा क्षेत्रातील नावलौकिकातही आणखी भर पडली आहे.

पुरस्कारानंतर डॉ. गोंड म्हणाले, गोंडवाना विद्यापीठाचा 'उत्कृष्ट शारीरिक शिक्षण निर्देशक पुरस्कार' मिळणे हा माझ्यासाठी अत्यंत आनंदाचा आणि अभिमानाचा क्षण आहे. या पुरस्काराचे खरे श्रेय माझ्या आई-वडिलांना आहे, ज्यांनी आयुष्यभर दिलेले संस्कार, आशीर्वाद आणि प्रेरणा माझ्या वाटचालीची ताकद ठरली. माझी पत्नी, मुले आणि परिवारातील सर्व सदस्यांनी प्रत्येक टप्प्यावर प्रेम, सहकार्य आणि पाठबळ दिले. माझे मित्र आणि सहकारी यांनी वेळोवेळी प्रोत्साहन दिले. या सर्वांना हे श्रेय जाते.

डॉ. गोंड पुढे म्हणाले, विशेषतः माझे गुरु, मार्गदर्शक आणि सरदार पटेल महाविद्यालयाचे प्राचार्य आदरणीय डॉ. प्रमोद एम. काटकर सर यांचे मनापासून आभार. त्यांच्या मार्गदर्शनाने, विश्वासाने आणि प्रेरणेने माझ्या कामाला योग्य दिशा मिळाली. त्यांनी माझ्यावर दाखवलेला विश्वास हीच माझ्यासाठी मोठी प्रेरणाशक्ती आहे.