अजय देवगणच्या 'दृश्यम ३'ने दोन दिवसांत भारतात १०० कोटींची निव्वळ कमाई ओलांडली

अजय देवगणचा क्राईम थ्रिलर चित्रपट 'दृश्यम ३' बॉक्स ऑफिसवर जोरदार चालला आहे. प्रेक्षक या चित्रपटाची खूप दिवसांपासून वाट पाहत होते. गांधी जयंतीच्या मुहूर्तावर तो प्रदर्शित झाला आणि पहिल्याच दिवशी त्याने अजय देवगणच्या कारकिर्दीतील सर्वात मोठी ओपनिंग नोंदवली.

दुसऱ्या दिवशीही चित्रपटाची घोडदौड सुरूच राहिली. उपलब्ध बॉक्स ऑफिस आकडेवारीनुसार, दुसऱ्या दिवसाच्या कमाईमुळे चित्रपटाने भारतात १०० कोटी रुपयांच्या निव्वळ कमाईचा टप्पा ओलांडला आहे. म्हणजे अवघ्या दोन दिवसांत 'दृश्यम ३'ने बॉक्स ऑफिसवर आपली पकड मजबूत केली आहे. दुसऱ्याच दिवशी २०२६ मधील सात चित्रपटांचे ओपनिंग वीकेंडचे विक्रमही या चित्रपटाने मोडल्याचे वृत्त आहे.

प्रदर्शनाआधीच ॲडव्हान्स बुकिंगमधून चित्रपटाने मोठी कमाई केली होती. पहिल्या दिवशी भारतात ६६.७५ कोटी रुपयांची निव्वळ कमाई झाली आणि अजय देवगणच्या आधीच्या चित्रपटांचे ओपनिंगचे विक्रम मागे पडले. पहिल्या दिवसाची जगभरातील कमाई ९५.१० कोटी रुपये असल्याचे वृत्त आहे.

पहिल्याच दिवशी सर्वाधिक कमाई करणारा अजय देवगणचा चित्रपट म्हणून याआधी 'सिंघम अगेन'ची नोंद होती. त्या चित्रपटानेही पहिल्या दिवशी दमदार कमाई केली होती. पण 'दृश्यम ३'ने तो विक्रम मागे टाकून नवा उच्चांक केला आहे. या यशामागे 'दृश्यम' फ्रँचायझीची लोकप्रियता आणि प्रेक्षकांमधली उत्सुकता महत्त्वाची ठरत आहे.

मीडिया रिपोर्ट्सनुसार, चित्रपटाच्या निर्मितीसाठी अंदाजे १०० ते ११० कोटी रुपये खर्च झाले आहेत. पहिल्या दोन दिवसांतली कमाई पाहता चित्रपटाची सुरुवात दमदार झाली आहे.

'दृश्यम ३'ची कथा 'दृश्यम २' जिथे संपला, तिथून पुढे सुरू होते. विजय साळगावकरने आपल्या कुटुंबाला वाचवण्यासाठी केलेल्या प्रयत्नांनंतर आता पोलिसांकडे त्याच्याविरुद्ध ठोस पुरावे आहेत, असे कथानकातून समोर येते. अशा परिस्थितीत विजय आपल्या कुटुंबाला पुन्हा एकदा संकटातून कसा बाहेर काढणार, हे पाहणे महत्त्वाचे ठरणार आहे. या भागात कथेला अधिक उत्कंठावर्धक वळण मिळाले असून विजयसमोरचे आव्हान अधिक कठीण झाले आहे. अनपेक्षित वळणे आणि रहस्य प्रेक्षकांना शेवटपर्यंत खिळवून ठेवत असल्याची चर्चा आहे.

या चित्रपटात अजय देवगणसोबत तब्बू, प्रकाश राज आणि जयदीप अहलावत यांच्या महत्त्वाच्या भूमिका आहेत. विशेषतः अजय देवगण आणि जयदीप अहलावत यांच्यातला सामना प्रेक्षकांसाठी आकर्षणाचा केंद्रबिंदू ठरत आहे. कलाकारांच्या अभिनयासोबतच चित्रपटातला थरार, कथानकातली गुंतागुंत आणि रहस्य यांचेही कौतुक होत आहे.

व्यापार विश्लेषक तरण आदर्श यांनीही चित्रपटाच्या कामगिरीचे कौतुक केले असून तिचे वर्णन 'असाधारण' असे केले आहे. 'दृश्यम'च्या आधीच्या भागांप्रमाणेच या चित्रपटाबद्दलही प्रेक्षकांमध्ये मोठी उत्सुकता दिसत आहे.

अजय देवगणचा 'दृश्यम ३' हा मोहनलाल यांच्या मल्याळम 'दृश्यम ३'चा रिमेक नसल्याचे सांगितले जात आहे. दोन्ही चित्रपटांच्या कथांमध्ये फरक असल्यामुळे त्यांची मांडणी आणि कथानकाची दिशाही वेगळी आहे. त्यामुळे हिंदीतील 'दृश्यम' फ्रँचायझीचे चाहते विजय साळगावकरच्या कथेतील पुढच्या घडामोडी पाहण्यासाठी उत्सुक आहेत. चित्रपटाला मिळणारा प्रतिसाद आणि बॉक्स ऑफिसवरची दमदार सुरुवात पाहता, येत्या दिवसांत कमाई आणखी वाढण्याची शक्यता व्यक्त केली जात आहे.