समृद्धी महामार्गावर धामणगाव रेल्वेजवळ भीषण अपघात, पिकअप आणि ट्रकच्या धडकेत 21 जण जखमी

समृद्धी महामार्गावर अपघातांची मालिका सुरूच असल्याचे चित्र आहे. पुन्हा एकदा भीषण अपघात झाला आहे. धामणगाव रेल्वे परिसरात रात्री उशिरा बोलेरो पिकअप टेम्पो आणि ट्रक एकमेकांवर आदळले. या दुर्घटनेत एकूण 21 जण जखमी झाले आहेत. त्यापैकी 2 जणांची प्रकृती अत्यंत चिंताजनक असल्याची माहिती आहे.

मृतांच्या आकड्याबाबत वेगवेगळी माहिती समोर आली आहे. सुरुवातीला 7 जणांचा जागीच मृत्यू झाल्याचे सांगण्यात आले. मात्र प्राथमिक माहितीनुसार 5 जणांचा जागीच मृत्यू झाला आहे. अपघाताची तीव्रता पाहता मृतांचा आणि जखमींचा आकडा वाढतो का, याबाबत अधिकृत माहितीची प्रतीक्षा आहे.

मिळालेल्या माहितीनुसार, वर्धा जिल्ह्यातील काही भाविक शेगाव येथे श्री दुर्गादेवीच्या दर्शनासाठी गेले होते. दर्शन झाल्यावर देवीची मूर्ती आणि भाविकांना घेऊन बोलेरो पिकअप टेम्पो वर्ध्याकडे परत येत होता. देवीच्या दर्शनानंतर परतीच्या प्रवासातच या भाविकांवर काळाने घाला घातला. समृद्धी महामार्गावर धामणगाव रेल्वे परिसरातील चॅनेल 97 जवळ या पिकअपची ट्रकशी जोरदार धडक झाली.

धडक इतकी भीषण होती की दोन्ही वाहनांचे मोठ्या प्रमाणात नुकसान झाले. अपघातानंतर घटनास्थळी मोठी गर्दी जमली. अपघाताची बातमी कळताच स्थानिक नागरिक आणि पोलीस तिथे धावले.

जखमींपैकी 2 जणांची प्रकृती अत्यंत चिंताजनक आहे, 10 जण गंभीर जखमी आहेत आणि 6 जणांना किरकोळ दुखापत झाली आहे. अपघात नेमका कशामुळे झाला, याचा तपास पोलीस करत आहेत. बोलेरो पिकअप आणि ट्रकची धडक कोणत्या परिस्थितीत झाली, हेही पोलीस तपासत आहेत.

धामणगाव रेल्वे पोलीस, स्थानिक नागरिक आणि पत्रकार घटनास्थळी पोहोचले आणि त्यांनी लगेच बचावकार्य सुरू केले. अपघातग्रस्त वाहनांमधून जखमींना बाहेर काढून उपचारासाठी धामणगाव ग्रामीण रुग्णालयात दाखल करण्यात आले. गंभीर जखमींची प्रकृती पाहून त्यांना पुढील उपचारासाठी वर्धा येथील वैद्यकीय महाविद्यालयात हलवण्यात आले आहे. रुग्णालयात जखमींवर उपचार सुरू असून वैद्यकीय पथक त्यांच्या प्रकृतीवर लक्ष ठेवून आहे.

अपघाताचे गांभीर्य पाहून विशेष पोलीस महानिरीक्षक महेश पाटील, अमरावती जिल्ह्याचे पोलीस अधीक्षक निकेतन कदम आणि धामणगावच्या नगराध्यक्ष अर्चना रोठे यांनी घटनास्थळी तसेच रुग्णालयात भेट दिली. त्यांनी अपघाताची माहिती घेतली, तसेच बचावकार्य आणि जखमींच्या उपचारांचा आढावा घेतला.

समृद्धी महामार्गावर यापूर्वीही अनेक गंभीर अपघात झाले आहेत. त्यामुळे या दुर्घटनेनंतर पुन्हा एकदा महामार्गावरील सुरक्षिततेचा प्रश्न ऐरणीवर आला आहे.