झी मराठीच्या 'धाकट्या सूनबाई'त मंदार जाधवचं पदार्पण, वेदांत पटवर्धनची भूमिका साकारणार

अनेक मालिकांमधून आपल्या अभिनयाचा ठसा उमटवलेला अभिनेता मंदार जाधव आता झी मराठीच्या नव्या मालिकेतून प्रेक्षकांसमोर येणार आहे. 'धाकट्या सुनबाई' या मालिकेत तो वेदांत पटवर्धन ही मुख्य व्यक्तिरेखा साकारणार आहे. या मालिकेच्या निमित्ताने मंदारने गप्पा मारल्या.

ही मालिका आणि भूमिका कशी मिळाली, यावर मंदार म्हणाला की ही कोठारे व्हिजनची मालिका असून त्यांच्याशी अगदी कुटुंबासारखे संबंध आहेत. ही भूमिका आली तेव्हा नकार द्यायचा प्रश्नच नव्हता, कारण त्यांच्यासोबत काम करताना खूप मजा येते आणि त्यांची काम करण्याची पद्धतही खूप चांगली आहे. त्यामुळे विचार न करता लगेच होकार दिला, असं तो म्हणाला.

झी मराठीसोबत पहिल्यांदाच काम करण्याच्या अनुभवाबद्दल मंदार म्हणाला की, त्याची कारकीर्द झी कुटुंबातूनच सुरू झाली होती, त्यामुळे परत कुटुंबात आल्यासारखं वाटतंय. झी टीव्ही हिंदीपासून करिअरची सुरुवात झाली आणि नंतर तो मराठी मालिकांमध्ये आला, हे अनेकांना माहीत नसेल. इतकी वर्षं हा योग जुळून येत नव्हता, पण आता सगळे योग जुळून आल्यासारखं वाटतंय, असं तो म्हणाला.

वेदांत पटवर्धन ही व्यक्तिरेखा कशी आहे आणि तिच्याशी स्वतःचं साम्य आहे का, यावर मंदार म्हणाला की वेदांत हा आजच्या पिढीचा सुशिक्षित, सुसंस्कृत तरुण आहे. कुटुंबावर मनापासून प्रेम करणारा, सर्वांचा आदर करणारा पण तितकाच ठाम मताचा आहे. प्रत्येक आईला असा मुलगा हवा, बहिणीला असा भाऊ हवा आणि गर्लफ्रेंडला हवासा वाटणारा बॉयफ्रेंड अशी ही व्यक्तिरेखा आहे. कोणावरही अन्याय किंवा अत्याचार सहन न करणारा हा तरुण त्यासाठी कुटुंबाच्या विरोधात जायलाही तयार होईल. स्वतःमध्ये आणि या व्यक्तिरेखेत साम्य सांगताना मंदार म्हणाला की तोही आयुष्यात तितकाच ठाम मताचा आहे आणि स्वतःवर प्रेम करणारा आहे. इतरांची काळजी घेतानाच स्वतःचीही काळजी घेणं तितकंच महत्त्वाचं आहे आणि तो तसाच आहे.

ही भूमिका स्वीकारण्याचं कारण सांगताना मंदार म्हणाला की अभिनेता म्हणून आव्हानं स्वीकारायला त्याला आवडतं. आधी साकारलेल्या भूमिकांपेक्षा वेदांत ही व्यक्तिरेखा वेगळी आहे. त्याचा लुक, वागणं, बोलणं सगळंच वेगळं असून या भूमिकेसाठी त्याने दोन महिने खूप मेहनत घेतली. वेदांत हा आताच्या जनरेशन झेडसारखा असल्याने त्याचा लुक अगदी फ्रेश आहे. हिरोसारखा दिसण्यासाठी डाएटवरही खूप काम करावं लागलं. प्रेक्षकांना वेदांत आपलासा वाटावा यासाठी बरीच तयारी केल्याचं तो म्हणाला.

मेघनही झी वर भूमिका करत असून घरी हे कळल्यावरची प्रतिक्रिया विचारली असता मंदार उत्साहाने म्हणाला की घरच्यांची प्रतिक्रिया खूप छान होती. मेघन जयंतच्या भूमिकेत कमाल करत असून आता दोघे भाऊ एकाच वाहिनीवर काम करणार आहेत. त्यामुळे प्रेक्षकांना आणि घरच्यांनाही काही कार्यक्रमांत किंवा मालिकेच्या एक तासाच्या भागातही कधीतरी दोघे एकत्र दिसतील अशी दोघांनाही अपेक्षा आहे, आणि त्या निमित्ताने एकत्र काम करता येणं हा वेगळाच आनंद असल्याचं तो म्हणाला.

प्रेक्षकांकडून काय अपेक्षा आहे, यावर मंदार मनापासून म्हणाला की प्रेक्षक हे आपले मायबाप आहेत आणि त्यांचं मनोरंजन करणं हेच काम आहे. एखादी गोष्ट आवडली नाही तर प्रेक्षकांनी ती कोणत्याही माध्यमातून त्याच्यापर्यंत पोहोचवावी, तो त्यात बदल करण्याचा नक्की प्रयत्न करेल आणि कायम त्यांच्या अपेक्षा पूर्ण करण्यासाठी काम करेल. प्रेक्षकांकडून कोणतीही अपेक्षा नाही, फक्त त्यांनी भरभरून प्रेम द्यावं इतकंच मनापासून वाटतं, असं तो म्हणाला. 'धाकट्या सूनबाई' ही मालिका झी मराठीवर २८ सप्टेंबरपासून सुरू होणार असून मंदारने प्रेक्षकांना मालिका पाहण्याचं आवाहन केलं आहे.