ढाक्यात एकाच वेळी सात ठिकाणी बॉम्बस्फोट, शहरभर पोलीस बंदोबस्त वाढवला
बांगलादेशची राजधानी ढाक्यात शुक्रवारी सात वेगवेगळ्या ठिकाणी साखळी बॉम्बस्फोट झाले, तर एका पोलीस स्टेशनसमोर बसही जाळण्यात आली. या घटनांनंतर शहरात २०० हून अधिक चेकपॉईंट्स उभारून हाय अलर्ट जाहीर करण्यात आला आहे.
बांगलादेशची राजधानी ढाक्यात शुक्रवारी संध्याकाळी एकच खळबळ उडाली. शुक्रवारच्या नमाजनंतर लोक नेहमीप्रमाणे आपापल्या कामात गुंतले असताना अचानक एकापाठोपाठ एक बॉम्बस्फोटांचे आवाज घुमले. शहराच्या वेगवेगळ्या भागात तब्बल सात ठिकाणी कच्चे आणि कॉकटेल बॉम्ब फोडण्यात आले, आणि यामुळे नागरिकांमध्ये मोठी घबराट पसरली. या घटनेमुळे बांगलादेशातल्या कायदा आणि सुव्यवस्थेवर पुन्हा एकदा प्रश्नचिन्ह उभं राहिलं आहे.
मिळालेल्या प्राथमिक माहितीनुसार, संध्याकाळी साडेसातच्या सुमारास जात्राबारी पोलीस स्टेशनजवळ अज्ञात लोकांनी तीन ते चार कच्चे बॉम्ब फेकले, ज्यात एक नागरिक गंभीर जखमी झाला. त्यानंतर मालिबाग आणि मोहखली भागातल्या उड्डाणपुलांवरूनही अज्ञातांनी खाली कॉकटेल बॉम्ब फेकले. बाबूबाजार उड्डाणपुलाखालीही असाच स्फोट झाला, ज्यात आणखी दोन जण जखमी झाले. याशिवाय मोगबाजार, रामपुरा आणि न्यू मार्केट भागातल्या प्रसिद्ध ढाका कॉलेजच्या गेटसमोरही कच्च्या बॉम्बचा स्फोट झाला. सुदैवाने कॉलेजसमोरच्या स्फोटात कोणीही जखमी झालं नाही, पण संपूर्ण परिसरात एकच गोंधळ उडाला.
स्फोटांच्या मालिकेने शहर हादरलेलं असतानाच रात्री दहाच्या सुमारास आणखी एक प्रकार घडला. काफरुल पोलीस स्टेशनसमोरच उभ्या असलेल्या एका प्रवासी बसला अज्ञातांनी थेट आग लावली. पोलीस स्टेशनसमोरच बस पेटल्यामुळे सुरक्षा यंत्रणेची चांगलीच धावपळ उडाली. खबर मिळताच पोलीस आणि फायर ब्रिगेडच्या गाड्या घटनास्थळी पोहोचल्या आणि आग विझवली. या आगीत सुदैवाने कोणीही जखमी झालं नाही, पण पोलीस स्टेशनच्या अगदी समोर हे घडल्यामुळे गुन्हेगारांचं धाडस किती वाढलंय हे स्पष्ट झालं. या घटनेनंतर काफरुल पोलीस स्टेशन आणि आसपासच्या भागात जास्तीचं पोलीस पथक आणि खास सुरक्षा दल तैनात करण्यात आलं आहे. हे स्फोट आणि बस जाळण्याची घटना एकाच कटाचा भाग आहे का, याचा तपास सुरक्षा यंत्रणा करत आहेत.
या सगळ्या घटनांनंतर ढाका पोलिसांनी तातडीने पावलं उचलत संपूर्ण राजधानीत हाय अलर्ट जाहीर केला. शहराला जणू छावणीचं रूप आलं असून सुरक्षेसाठी २०० हून अधिक चेकपॉईंट्स उभारण्यात आले आहेत. रस्त्यावरून जाणाऱ्या प्रत्येक संशयास्पद गाडीची, बाईकची आणि पादचाऱ्यांची कसून तपासणी केली जातेय. महत्त्वाचे चौक, बस स्टँड, रेल्वे स्टेशन, बाजार आणि सरकारी इमारतींभोवती कडक बंदोबस्त ठेवण्यात आला आहे.
ढाका पोलीस आयुक्त आणि वरिष्ठ अधिकाऱ्यांनी सांगितलं की, स्फोट घडवणारे आणि बस जाळणारे संशयित घटनास्थळावरून फरार झाले आहेत. त्यांना पकडण्यासाठी सातही ठिकाणची आणि आसपासच्या भागातली सीसीटीव्ही फुटेज बारकाईने तपासली जातेय. संशयितांचा शोध घेण्यासाठी शहरभर छापे टाकले जात असून गुप्तचर यंत्रणांनाही सतर्क करण्यात आलं आहे.
या घटनांमध्ये एकूण तीन जण जखमी झाले असून त्यांच्यावर जवळच्या हॉस्पिटलमध्ये उपचार सुरू आहेत. या स्फोटांमागे एखादी दहशतवादी संघटना किंवा राजकीय गट आहे का, याचा शोध पोलीस घेत आहेत. ढाका प्रशासनाने सामान्य नागरिकांना शांतता राखण्याचं आणि अफवांवर विश्वास न ठेवण्याचं आवाहन केलं आहे. शहरात कुठेही संशयास्पद वस्तू, बेवारस बॅग किंवा संशयित व्यक्ती दिसल्यास जवळच्या पोलीस स्टेशनला किंवा आपत्कालीन क्रमांकावर लगेच कळवण्याच्या सूचना देण्यात आल्या आहेत.
