दीड लाखांच्या बजेटमध्ये पाच इलेक्ट्रिक बाइक्स, रेंज-फीचर्सचा तपशील
दीड लाख रुपयांच्या आसपासच्या किमतीत ओबेन, रिवोल्ट, ओला, अवोर आणि ओडिसी या कंपन्यांचे इलेक्ट्रिक बाइक पर्याय उपलब्ध आहेत.
पेट्रोल वाचवण्यापुरता मर्यादित राहिलेला इलेक्ट्रिक बाइकचा पर्याय आता भारतात वेगळ्या टप्प्यावर पोचला आहे. कमी किमतीत चांगली रेंज, दमदार परफॉर्मन्स, कनेक्टिव्हिटी आणि आधुनिक फीचर्स देणाऱ्या बाइक्सकडे ग्राहकांचा ओढा वाढतो आहे. दीड लाख रुपयांच्या बजेटमध्येही सध्या वेगवेगळे पर्याय बाजारात उपलब्ध आहेत.
यात पहिला पर्याय आहे ओबेन रॉर इव्हो. आक्रमक स्ट्रीटफायटर डिझाइन असलेल्या या बाइकमध्ये 9 kW पीक पॉवर मोटर बसवण्यात आली आहे. कंपनीच्या दाव्यानुसार ही बाइक 250 Nm व्हील टॉर्क देते, 0 ते 40 kmph वेग अवघ्या 3 सेकंदांत गाठते आणि टॉप स्पीड 110 kmph इतका आहे. यात Smart IQ, Eco, City आणि Havoc असे चार रायडिंग मोड्स दिले आहेत. 3.4 kWh च्या LFP बॅटरीमुळे रिअल-वर्ल्ड रेंज 150 km पर्यंत मिळत असल्याचा दावा आहे. या बाइकची एक्स-शोरूम किंमत 1.25 लाख रुपये आहे.
रोजच्या वापरावर लक्ष केंद्रित करणारी बाइक म्हणजे रिवोल्ट RVX. या बाइकमध्ये 160 km IDC रेंज आणि 90 kmph टॉप स्पीडचा दावा करण्यात आला आहे. यात काढता येणारी बॅटरी, ड्युअल-गिअर मोटर, USD फ्रंट फोर्क, मोनोशॉक आणि ड्युअल डिस्क ब्रेक्स असे फीचर्स मिळतात. 0 ते 80 टक्के फास्ट चार्जिंगसाठी साधारण 80 मिनिटे लागतात, तर बॅटरीवर 8 वर्षे किंवा 80,000 km इतकी वॉरंटी दिली जाते. या बाइकची एक्स-शोरूम किंमत 1.30 लाख रुपये आहे.
ओला रोडस्टर X+ मध्ये 4.5 kWh आणि 9.1 kWh असे दोन बॅटरी पर्याय दिले आहेत. 9.1 kWh व्हर्जनमध्ये IDC रेंज 500 km पर्यंत मिळत असल्याचा दावा असून, यात 11 kW मोटर आणि 125 kmph टॉप स्पीड आहे. Eco, Normal आणि Sport या मोड्ससोबतच क्रूझ कंट्रोल, पार्किंग असिस्ट, रिजनरेटिव्ह ब्रेकिंग आणि OTA अपडेट्स ही फीचर्स या बाइकमध्ये मिळतात.
अवोर EX1 मध्ये 3.24 kWh बॅटरी बसवण्यात आली असून, ही बाइक 160 km पर्यंत रेंज आणि 100 kmph टॉप स्पीड देत असल्याचा दावा आहे. डिजिटल कॉकपिट, नेव्हिगेशन, बॅटरी हेल्थ, वाहन डायग्नोस्टिक्स आणि सिक्युरिटी अलर्ट्स अशी कनेक्टेड फीचर्स यात आहेत. या बाइकची एक्स-शोरूम किंमत 1.25 लाख रुपये आहे.
यादीतील शेवटचा पर्याय आहे ओडिसी इलेक्ट्रिक इव्होक्विस. स्पोर्टी डिझाइनसोबतच LED लाइटिंग, डिजिटल कन्सोल आणि कीलेस स्टार्ट ही सुविधा या बाइकमध्ये देण्यात आली आहे. कॉम्पॅक्ट आकार आणि इलेक्ट्रिक पॉवरट्रेनमुळे हा पर्याय खास शहरी वापरासाठी सादर करण्यात आला आहे. या बाइकची एक्स-शोरूम किंमत 1.18 लाख रुपये आहे.
