सीयूईटी यूजी परीक्षेत मोठे बदल होण्याची शक्यता, विद्यार्थ्यांचा वेळ वाचणार

सीयूईटी यूजी परीक्षा देणाऱ्या विद्यार्थ्यांसाठी पुढच्या परीक्षा प्रक्रियेत मोठे बदल होण्याची शक्यता आहे. नॅशनल टेस्टिंग एजन्सी (NTA) परीक्षा प्रक्रिया अधिक सोपी आणि कमी वेळ खाणारी करण्यासाठी सध्याच्या पॅटर्नमध्ये बदल करण्याची तयारी करत आहे. या प्रस्तावामुळे परीक्षा केंद्रावर वारंवार जावे लागण्याच्या त्रासातून विद्यार्थ्यांची सुटका होऊ शकते.

आताच्या व्यवस्थेत विद्यार्थ्याने निवडलेल्या विषयांनुसार त्याला वेगवेगळ्या दिवशी परीक्षा द्यावी लागते. जास्तीत जास्त पाच विषय निवडणाऱ्या विद्यार्थ्यांना दोन किंवा तीन वेळा परीक्षा केंद्रावर जावे लागते. त्यामुळे प्रवासाचा खर्च, वेळ आणि धावपळ तिन्ही वाढतात.

प्रस्तावित बदलांनुसार एका विद्यार्थ्याची सगळी परीक्षा एकाच दिवशी पूर्ण करण्याचे नियोजन आहे. सीयूईटीची परीक्षा विंडो १२ ते १५ दिवसांची असली, तरी त्याच कालावधीत प्रत्येक विद्यार्थ्याला एकाच दिवशी परीक्षा देण्याचा स्लॉट मिळू शकतो. म्हणजे परीक्षेचे दिवस १२ ते १५ असले, तरी विद्यार्थ्याला त्यातला एकच दिवस द्यावा लागेल.

पेपरच्या वेळेतही बदल सुचवला आहे. सीयूईटी यूजीच्या सध्याच्या पॅटर्नमध्ये प्रत्येक विषयाच्या पेपरसाठी ६० मिनिटे ठरलेली आहेत. नव्या प्रस्तावात ही वेळ कमी करून सुमारे ४० ते ४५ मिनिटे करण्याचा विचार सुरू आहे. वेळ कमी झाली की प्रश्नांच्या संख्येवरही परिणाम होणार. सध्या एका विषयात ५० प्रश्न असतात, ते नव्या पॅटर्नमध्ये ३५ ते ४० पर्यंत कमी होऊ शकतात. म्हणजे परीक्षा छोटी होईल, पण विद्यार्थ्यांना कमी वेळात जास्त अचूकपणे प्रश्न सोडवावे लागतील.

विषयांच्या संख्येचाही नव्याने विचार होत आहे. आत्ता सीयूईटी यूजीमध्ये विद्यार्थी जास्तीत जास्त पाच विषय निवडू शकतात. नव्या पॅटर्नमध्ये विषयांच्या संख्येची पुनर्रचना केली जात आहे. यूजीसी आणि एनटीएच्या पातळीवर हा कमाल आकडा पाचवरून चार करण्याची शक्यता तपासली जात आहे. पाच विषयांचा पर्याय राहिला आणि प्रत्येक पेपर ४० मिनिटांचा झाला, तर विद्यार्थी सुमारे २०० मिनिटांत (३ तास २० मिनिटे) आपली परीक्षा पूर्ण करू शकतात. चार विषय असतील तर हा वेळ सुमारे १६० मिनिटांपर्यंत खाली येईल.

हे बदल फक्त यूजीपुरते मर्यादित राहणार नाहीत. सीयूईटी पीजीमध्येही (CUET PG) कमी अर्ज आलेल्या विषयांना परीक्षेतून वगळण्याच्या योजनेवर विचार सुरू आहे. ज्या अभ्यासक्रमांना उपलब्ध जागांच्या तुलनेत खूपच कमी अर्ज येतात, तिथे प्रवेश परीक्षा घेण्याऐवजी गुणवत्तेच्या (Merit) आधारावर प्रवेश देण्याचा पर्याय स्वीकारला जाऊ शकतो.