ऑनलाईन कपडे घेण्यापूर्वीच ट्रायल: चॅटजीपीटीचे नवे ट्राय ऑन फीचर

ऑनलाईन कपडे घेताना आपल्या मनात एक प्रश्न नेहमीच येतो: आपण घेत असलेले कपडे आपल्याला चांगले दिसतील की नाही? याच प्रश्नामुळे अनेक जण ऑनलाईन खरेदी करणे टाळतात. पण आता तशी गरज उरलेली नाही, कारण ओपनएआयचे एआय प्लॅटफॉर्म असलेल्या चॅटजीपीटीने एक नवीन व्हर्चुअल ट्राय-ऑन फीचर सादर केले आहे. या फीचरच्या मदतीने ऑनलाईन शॉपिंग अधिक व्हिज्युअल करण्याचा कंपनीचा प्रयत्न आहे.

या फीचरमध्ये यूजरने आपला सेल्फी किंवा फुल-बॉडी फोटो अपलोड करायचा. मग खरेदी करायचे कपडे किंवा ॲक्सेसरीज आपल्यावर कशा दिसतील, ते चॅटजीपीटी दाखवणार आहे. हे फीचर शॉपिंग रिझल्ट्समध्ये एका नवीन ट्राय ऑन बटनाद्वारे पाहायला मिळत आहे. यूजर कपड्यांचे स्क्रीनशॉट किंवा फोटोही अपलोड करू शकतात आणि चॅटजीपीटीला त्याचा प्रिव्ह्यू तयार करायला सांगू शकतात. हे अपडेट एका नव्या फेव्हरेट ऑप्शनसह उपलब्ध असणार आहे, जे ग्राहकांना त्यांच्या लायब्रेरीमध्ये प्रोडक्ट्स सेव्ह करण्याची परवानगी देणार आहे.

कंपनीने दिलेल्या माहितीनुसार, हे नवीन फीचर अलीकडेच जारी करण्यात आलेल्या चॅटजीपीटी ईमेज 2.5 मॉडेलचा वापर करते. कंपनीने स्पष्ट केले आहे की हे मॉडेल सूचना जास्त अचूकपणे पाळते. तसेच ईमेज वेगाने तयार करताना ते जास्त नैसर्गिक लाइटिंग आणि चांगले टेक्सचर देऊ शकते. हे फीचर यूजरना ऑनलाईन कपड्यांची खरेदी करताना व्हिज्युअल एक्सपीरियंस अधिक चांगला करण्यास मदत करू शकते.

फीचर वापरायचे असेल तर सर्वात आधी चॅटजीपीटी प्लॅटफॉर्म उघडावा लागेल. मग शॉपिंग रिझल्ट्समध्ये दाखवले जाणारे कपड्याचे प्रोडक्ट उघडा आणि ट्राय ऑन बटनवर टॅप करा. त्यानंतर संदर्भासाठी एक सेल्फी किंवा फुल-बॉडी फोटो अपलोड करावा लागेल. मग तुम्ही तो पोशाख घातलेला असतानाचा प्रिव्ह्यू चॅटजीपीटी तयार करेल. ईमेज तयार होण्याचा वेग यूजरच्या इंटरनेट स्पीडवर अवलंबून असणार आहे.

ट्राय ऑनसोबत कंपनीने एक नवा फेव्हरेट सेक्शनही आणला आहे. यामुळे यूजरना प्रोडक्ट्स आपल्या लायब्रेरीमध्ये सेव्ह करता येतील. सेव्ह केलेले प्रोडक्ट्स पुन्हा पाहता येतील, तसेच तयार झालेल्या ट्राय-ऑन ईमेजही पाहता येतील. स्टाईलच्या वर्णनाच्या आधारे पूर्ण आऊटफिट तयार करण्यात किंवा सेलिब्रिटी आऊटफिटच्या फोटोंवरून कपडे ओळखण्यातही चॅटजीपीटी मदत करू शकते.

ओपनएआयचे म्हणणे आहे की ट्राय ऑन आणि फेव्हरेट ही दोन्ही फीचर लवकरच जगभरात रोलआऊट केली जात आहेत.