वर्क फ्रॉम होमच्या नावाखाली चंद्रपुरातील महिलेची ५.५७ लाखांची सायबर फसवणूक

चंद्रपुरातील एका ३२ वर्षीय महिलेची 'वर्क फ्रॉम होम' आणि प्रॉडक्ट रेटिंगच्या नावाखाली ५ लाख ५७ हजार २११ रुपयांची सायबर फसवणूक झाली आहे. याप्रकरणी चंद्रपूर सायबर पोलीस ठाण्यात गुन्हा दाखल करण्यात आला आहे. उच्चशिक्षित तरुण आणि गृहिणींना ऑनलाईन रोजगाराचे आमिष दाखवून गंडा घालणाऱ्या भामट्यांचा सुळसुळाट वाढला असून, त्याचेच हे एक मोठे उदाहरण समोर आले आहे.

ही महिला बी.ई. (इलेक्ट्रॉनिक्स) शिक्षण झालेली आहे. त्या चंद्रपूर येथील औष्णिक वीज केंद्रात (CSTPS) डेप्युटी इंजिनियर म्हणून कार्यरत असलेल्या अधिकाऱ्याच्या पत्नी आहेत. ऊर्जानगर येथील सीएसटीपीएस कॉलनीत राहणाऱ्या या गृहिणी घरबसल्या नोकरी किंवा काम शोधत होत्या. त्यासाठी त्यांनी गूगल, लिंक्डइनसह विविध सोशल मीडिया प्लॅटफॉर्मवर आपला बायोडाटा अपलोड केला होता.

त्यानंतर २३ सप्टेंबर २०२६ रोजी त्यांना Telegram वर सारिका अग्रवाल नावाच्या महिलेचा संदेश आला. आपण न्यू यॉर्क येथील लक्झरी फॅशन आणि लाईफस्टाईल प्रॉडक्ट्स प्रमोट करणाऱ्या 'MODA OPERANDI' नावाच्या आंतरराष्ट्रीय कंपनीची एजंट आहोत, असे तिने सांगितले. कंपनीच्या प्रॉडक्ट्सना ऑनलाईन रेटिंग दिल्यास आकर्षक कमिशन मिळेल, असे आमिषही तिने दाखवले.

विश्वास बसावा म्हणून सुरुवातीला तक्रारदार महिलेचे वर्किंग अकाउंट तयार करून देण्यात आले. त्यांना २८ आणि २९ सप्टेंबर रोजी काही रक्कम भरायला लावण्यात आली आणि त्या बदल्यात कमिशनसह १७,५२६ आणि ३६,१८९ रुपये त्यांच्या बँक खात्यात जमा करण्यात आले. त्यामुळे तक्रारदार महिलेचा विश्वास बसला. त्यानंतर जास्तीत जास्त कमिशनचे प्रलोभन दाखवून त्यांना वेगवेगळ्या टप्प्यांत, वेगवेगळ्या युपीआय (UPI) आयडी आणि बँक खात्यांवर पैसे भरायला लावण्यात आले.

२८ सप्टेंबर ते ६ ऑक्टोबर २०२६ या काळात महिलेने बँक ऑफ महाराष्ट्र आणि स्टेट बँक ऑफ इंडियाच्या खात्यांमधून एकूण ५ लाख ५७ हजार २११ रुपये आरोपींच्या खात्यात ट्रान्सफर केले. त्यानंतर त्यांच्या वर्किंग अकाउंटवर १२ लाख रुपये कमिशन जमा झाल्याचे दिसत होते. मात्र ही रक्कम काढण्याचा (विड्रॉल) प्रयत्न केला असता व्यवहार पूर्ण झाला नाही. त्यानंतर आरोपी सारिका अग्रवाल हिने संपर्क साधला आणि पैसे काढण्यासाठी आणखी ४ लाख ९३ हजार २०६ रुपये भरावे लागतील, तरच पूर्ण रक्कम खात्यात जमा होईल, अशी अट घातली.

अतिरिक्त पैशांची मागणी झाल्याने आणि पूर्वीप्रमाणे कमिशन परत न मिळाल्याने आपली फसवणूक झाल्याचे तक्रारदार महिलेच्या लक्षात आले. त्यांनी लगेच सायबर हेल्पलाईन १९३० वर संपर्क साधून ऑनलाईन तक्रार नोंदवली. त्यानंतर १२ ऑक्टोबर रोजी चंद्रपूर येथील सायबर पोलीस ठाण्यात प्रत्यक्ष जाऊन त्यांनी फिर्याद दिली.

या फिर्यादीवरून सायबर पोलिसांनी आरोपी महिला सारिका अग्रवाल (Telegram ID: @sarika_a82) आणि तिच्या इतर साथीदारांविरुद्ध माहिती तंत्रज्ञान अधिनियम (IT Act) कलम ६६(सी), ६६(डी) सह भारतीय न्याय संहितेच्या (BNS) संबंधित कलमान्वये गुन्हा दाखल केला आहे. प्रकरणाचा पुढील तपास पोलीस निरीक्षक सुनील विठ्ठलराव गाडे करत आहेत.