येहोवा यिरे सोसायटीच्या संचालकांवर चंद्रपुरात गुन्हा; १३३२ गुंतवणूकदारांचे पैसे अडकले

चंद्रपुरातील येहोवा यिरे अर्बन क्रेडिट को-ऑपरेटिव्ह सोसायटी लिमिटेडच्या संचालकांविरुद्ध फसवणुकीचा गुन्हा दाखल झाला आहे. जादा व्याज आणि आकर्षक परताव्याचे आमिष दाखवून लोकांकडून पैसे गोळा केल्याचा आरोप तक्रारीत आहे. पोलिसांनी दिलेल्या माहितीनुसार, १३३२ गुंतवणूकदारांचे मिळून सुमारे ८.६० कोटी रुपये अडकल्याची तक्रार आहे. या प्रकरणामुळे जिल्ह्यात खळबळ उडाली आहे.

पोलिसांच्या माहितीनुसार, वरोरा तालुक्यातील बोर्डा येथील द्वारकानगरी, आनंदवन चौक परिसरात राहणारे चंद्रकिशोर नामदेव मांडवकर (वय ५२) यांनी ही तक्रार दिली आहे. गुन्हा रामनगर पोलीस ठाण्यात नोंदवला गेला असून त्याचा सखोल तपास सध्या चंद्रपूरची आर्थिक गुन्हे शाखा करत आहे.

तक्रारीनुसार, येहोवा यिरे अर्बन क्रेडिट को-ऑपरेटिव्ह सोसायटी लिमिटेड, चंद्रपूर (रजि. नं. CHD/CHD/RSR/CR130/2023-24) या संस्थेची स्थापना २३ ऑक्टोबर २०२३ रोजी चंद्रपूर येथे झाली होती. संचालक म्हणून अपेक्षा स्नेहदिप जोब, अतुल सोपन बन्सोड, दुर्गा गौरंग मंडल, वैशाली मधुकर बुच्चे, पल्लवी रुषी वासेकर, तेजस्विनी अतित्या लोखंडे, प्रिती विनोद भिलकर, वैभव गुरुदेव चौधरी आणि विकास देवराव दुधबळे यांची नावे आहेत. या संचालकांनी स्थानिक पातळीवर एजेंट, व्यवस्थापक आणि इतर कर्मचारी नेमले होते, असे पोलिसांनी सांगितले.

आरोपींनी वेगवेगळ्या योजनांच्या नावाखाली सामान्य नागरिकांची पिळवणूक चालवली होती, असा आरोप आहे. सोसायटीतर्फे बचत खात्यावर वार्षिक ४ टक्के आणि फिक्स डिपॉझिटवर ९.७५ टक्के व्याज देण्याचे सांगितले गेले. टीडीएस टाईम डिपॉझिट योजनेत १३९९ रुपये २२ महिने भरल्यावर २४ व्या महिन्यात ८४,१७४ रुपये मिळतील, असे आमिष दाखवण्यात आले. ६८,००० रुपये एकदा भरले तरी २४ महिन्यांनंतर तेवढेच ८४,१७४ रुपये मिळतील, असेही सांगितले गेले.

याशिवाय युवा बचत धन योजना, बचत धन योजना आणि एमआयएस मासिक बचत योजनेतही लोकांना प्रलोभन दाखवल्याचा आरोप आहे. या योजनांमध्ये १४,१४५ रुपये तिमाही, २८,२९० रुपये सहामाही किंवा ५६,५८० रुपये वार्षिक भरल्यावर ४,५२,९२८ रुपयांचा दैनिक ठेव योजनेचा लाभ मिळेल, असे सांगण्यात आले होते.

या आमिषाला बळी पडून तक्रारदार चंद्रकिशोर मांडवकर यांनी ८ लाख ८४ हजार १७४ रुपये गुंतवले. इतर १३३१ गुंतवणूकदारांचे ८ कोटी ५१ लाख ११ हजार ६६४ रुपये संचालकांनी गोळा केले, असे पोलिसांनी सांगितले. हे सगळे मिळून ८ कोटी ५९ लाख ९५ हजार ८३८ रुपये होतात. ठरल्याप्रमाणे पैसे परत न करता फसवणूक केल्याचा हा गुन्हा आहे आणि या रकमेची अफरातफर झाल्याचे उघडकीस आल्याचे पोलिसांनी म्हटले आहे.

रामनगर पोलीस ठाण्यात भारतीय न्याय संहितेच्या कलम ३१८(४), ३१६(५), ३१६(२) आणि ३(५) तसेच एमपीआयडी (MPID) कायदा १९९९ च्या कलम ३ अन्वये गुन्हा नोंदवला आहे.

फसवणूक झालेल्या गुंतवणूकदारांच्या रकमेच्या याद्या तयार करण्याचे काम युद्धपातळीवर सुरू आहे. ज्यांचे पैसे अजून परत मिळालेले नाहीत, अशा सगळ्या बाधित लोकांनी कागदपत्रे घेऊन यावे, असे आवाहन पोलिसांनी केले आहे. यात गुंतवणुकीचे सर्टिफिकेट, पैसे भरल्याच्या पावत्या, आधार कार्ड आणि पॅन कार्ड हवे आहे. ज्या बँक खात्यात पैसे हवे आहेत त्या राष्ट्रीयकृत बँकेच्या पासबुकची झेरॉक्स प्रतही सोबत आणायची आहे.

महाराष्ट्र शासन परिपत्रक क्रमांक एमपीआय/प्र.क्र. ०९/पोल-११ दिनांक २५ फेब्रुवारी २०१९ नुसार गुंतवणूकदारांनी परिशिष्ट-१ प्रमाणे विहित नमुन्यात अर्ज भरून द्यायचा आहे. त्यासाठी पोलीस अधीक्षक कार्यालय परिसरातील दुर्गापूर येथील आर्थिक गुन्हे शाखेत प्रत्यक्ष हजर राहावे, असे आवाहन आर्थिक गुन्हे शाखेचे सहायक पोलीस निरीक्षक अतुल कावळे यांनी केले आहे.