चंद्रपुरात तृतीयपंथी कल्याण मंडळाच्या सह-उपाध्यक्षा डॉ. सानवी जेठवानी यांचे भाजप कार्यालयात स्वागत

महाराष्ट्र राज्य तृतीयपंथी कल्याण मंडळाच्या सह-उपाध्यक्षा डॉ. सानवी जेठवानी यांचे चंद्रपुरात स्वागत करण्यात आले. श्री माता महाकालीच्या पावन नगरी चंद्रपूर येथे त्यांचे आगमन झाल्यानंतर भारतीय जनता पार्टीच्या चंद्रपूर महानगर कार्यालयात हा स्वागत कार्यक्रम झाला. या कार्यक्रमात आमदार किशोर जोरगेवार यांनी तृतीयपंथी समुदायाच्या विविध प्रश्नांवर चर्चा केली.

तृतीयपंथींना शिक्षण, आरोग्य आणि रोजगाराच्या समान संधी मिळाव्यात, असे जोरगेवार यावेळी म्हणाले. समाजाच्या मुख्य प्रवाहात या समुदायाला सन्मानाने स्थान मिळवून द्यायचे असेल, तर समान संधी, शिक्षण, आरोग्य सुविधा आणि रोजगार उपलब्ध होणे आवश्यक आहे, असे त्यांनी सांगितले. तृतीयपंथी बांधवांच्या हक्कांचे संरक्षण आणि त्यांचा सर्वांगीण विकास यासाठी आपण कटिबद्ध आहोत, तसेच त्यांच्या प्रश्नांना न्याय मिळवून देण्यासाठी सातत्याने प्रयत्न केले जातील, असेही त्यांनी म्हटले.

तृतीयपंथी समुदायातील नागरिकांनाही समाजातील इतरांप्रमाणेच सन्मानाने जगण्याचा आणि प्रगती करण्याचा समान अधिकार आहे, असे जोरगेवार यांनी सांगितले. त्यांना शिक्षण, आरोग्य, रोजगार आणि शासकीय योजनांचा लाभ मिळावा म्हणून समाजाने सकारात्मक दृष्टिकोन ठेवणे गरजेचे आहे. सामाजिक भेदभाव दूर करून त्यांना मुख्य प्रवाहात आणण्यासाठी सगळ्यांनी मिळून प्रयत्न करण्याची गरज आहे, असेही ते म्हणाले.

डॉ. सानवी जेठवानी यांनीही यावेळी आपले विचार मांडले. तृतीयपंथी समुदायाच्या हक्कांचे संरक्षण, शिक्षण, आरोग्य सुविधा आणि सामाजिक पुनर्वसन या विषयांवर त्या बोलल्या. तृतीयपंथी व्यक्तींना सन्मानाने जगण्याची संधी मिळावी, त्यांना शासकीय योजनांचा लाभ मिळावा आणि समाजात समानतेची भावना रुजावी, यासाठी कल्याण मंडळाच्या माध्यमातून प्रयत्न सुरू आहेत, असे त्यांनी सांगितले. या समुदायाच्या समस्या सोडवण्यासाठी समाजातील सर्व घटकांनी सहकार्य करावे, असे आवाहनही त्यांनी केले.

या कार्यक्रमाचे खास वैशिष्ट्य म्हणजे चंद्रपुरातील तृतीयपंथी समुदायातील अनेक सदस्यांनी भारतीय जनता पार्टीमध्ये जाहीर पक्षप्रवेश केला. आमदार किशोर जोरगेवार यांनी पक्षात नव्याने आलेल्या या सदस्यांचे स्वागत केले आणि त्यांना पुढील वाटचालीसाठी शुभेच्छा दिल्या. समाजातील प्रत्येक घटकाला सोबत घेऊन विकासाची वाटचाल करणे, हीच पक्षाची भूमिका आहे, असेही त्यांनी यावेळी सांगितले.

कार्यक्रमाला महानगर अध्यक्ष सुभाष कासनगोट्टूवार, जेष्ठ नेते प्रकाश देवतळे, महामंत्री नामदेव डाहुले, गटनेता शेखर शेट्टी, नगरसेविका सविता कांबळे, राज कचारे, साजन बहोरिया, एस.आय.आर. प्रमुख सुमित बेले, राकेश बोमनवार, हेमलता खोब्रागडे, रीना साखरकर, मनीषा पडगेलवार आदींची उपस्थिती होती.