चंद्रपुरात 930 विद्यार्थ्यांना करिअर मार्गदर्शन, प्रशासकीय ते बँकिंग क्षेत्रातील तज्ज्ञांचे मार्गदर्शन

दहावी-बारावीनंतर फक्त ठरलेल्याच अभ्यासक्रमांच्या मागे न लागता विद्यार्थ्यांनी आपली आवड, क्षमता आणि समोर असलेल्या संधी लक्षात घेऊन करिअरची वाट निवडावी, असे आवाहन चंद्रपुरात झालेल्या एका मोठ्या करिअर मार्गदर्शन कार्यक्रमात विद्यार्थ्यांना करण्यात आले. ध्येय आधी पक्के करून त्यासाठी लागणारे शिक्षण, स्पर्धा परीक्षा आणि कौशल्ये यांची माहिती घेत आजपासूनच नियोजनबद्ध तयारीला लागावे, असा संदेशही या कार्यक्रमातून देण्यात आला.

जिल्हा परिषदेच्या प्राथमिक शिक्षण विभागाने 22 सप्टेंबर रोजी प्रियदर्शिनी इंदिरा गांधी सांस्कृतिक सभागृहात हा कार्यक्रम घेतला. ग्रामीण आणि दुर्गम भागातील विद्यार्थ्यांपर्यंत विविध क्षेत्रांतील करिअर संधी पोहोचाव्यात आणि दहावी-बारावीनंतर शिक्षण व करिअरबाबत योग्य निर्णय घेण्यासाठी त्यांना दिशा मिळावी, हा यामागचा उद्देश होता. लॉयड्स इन्फिनिट फाउंडेशनने या कार्यक्रमासाठी सहकार्य केले. जिल्ह्यातील विविध जिल्हा परिषद हायस्कूल तसेच चंद्रपूरमधील खासगी अनुदानित शाळांमधील सुमारे 930 विद्यार्थी यात सहभागी झाले होते.

राज्याचे आदिवासी विकास मंत्री तथा चंद्रपूर जिल्ह्याचे पालकमंत्री प्रा. डॉ. अशोक वुईके दूरदृष्यप्रणालीद्वारे कार्यक्रमाच्या अध्यक्षस्थानी होते. मंचावर आमदार किशोर जोरगेवार, आमदार सुधाकर अडबाले, जिल्हाधिकारी वसुमना पंत, पोलीस अधीक्षक आयुष नोपानी, जिल्हा परिषदेचे मुख्य कार्यकारी अधिकारी पुलकित सिंह आणि सैनिक स्कूल, चंद्रपूरचे प्राचार्य कॅप्टन अश्विन अनुपदेव उपस्थित होते.

या कार्यक्रमात विविध क्षेत्रांत काम करणाऱ्या अधिकारी, तज्ज्ञ आणि व्यावसायिकांनी स्वतःच्या अनुभवावर आधारित मार्गदर्शन विद्यार्थ्यांना दिले. आयपीएस अधिकारी कुमार सुशांत यांनी केंद्रीय लोकसेवा आयोगाच्या परीक्षेचे स्वरूप आणि IAS, IPS, IFS यांसारख्या अखिल भारतीय व केंद्रीय सेवांमध्ये जाण्यासाठी लागणारे शिक्षण, अभ्यासाचे नियोजन आणि स्पर्धा परीक्षेची तयारी याबद्दल सांगितले. उपविभागीय पोलीस अधिकारी प्रमोद चौगुले यांनी पोलीस दलातील विविध पदे, भरती प्रक्रिया आणि करिअरच्या संधींची माहिती दिली, तर कोरपना येथील उपविभागीय अधिकारी बालाजी कदम यांनी महाराष्ट्र लोकसेवा आयोगाच्या विविध परीक्षा, प्रशासकीय सेवांतील संधी आणि त्यासाठी लागणाऱ्या सातत्यपूर्ण अभ्यासाबद्दल मार्गदर्शन केले. सूबेदार लक्ष्मण औलकर यांनी भारतीय सशस्त्र दलांतील करिअर संधी, सैन्य दलात प्रवेशासाठी लागणारी पात्रता, विविध प्रवेश परीक्षा, शारीरिक व मानसिक तयारी आणि शिस्तीचे महत्त्व विद्यार्थ्यांना समजावून सांगितले.

विभागीय अभियंता जय तिवारी यांनी अभियांत्रिकी व तंत्रज्ञान क्षेत्रातील विविध शाखा, उच्च शिक्षण आणि बदलत्या तंत्रज्ञानामुळे तयार होणाऱ्या संधींची माहिती दिली. कृषी विस्तार अधिकारी आदित्य महल्ले यांनी कृषी शिक्षण, कृषी तंत्रज्ञान आणि कृषी क्षेत्रातील रोजगार व स्वयंरोजगाराच्या संधींबद्दल सांगितले. डॉ. भाग्यश्री बेलसरे यांनी पशुवैद्यकीय शिक्षण, प्रवेश प्रक्रिया आणि या क्षेत्रातील करिअर पर्यायांची माहिती दिली. बँक ऑफ इंडियाचे रत्नेश सिंह आणि भूषण वाघ यांनी बँकिंग क्षेत्रातील विविध पदे, स्पर्धा परीक्षा आणि बँकिंगमधील करिअर संधींबाबत विद्यार्थ्यांशी संवाद साधला.

कोणते करिअर निवडावे इतकीच माहिती न देता, निवडलेल्या क्षेत्रात यशस्वी होण्यासाठी आजपासून कोणती तयारी करावी, कोणते शिक्षण घ्यावे, कोणत्या प्रवेश व स्पर्धा परीक्षा द्याव्यात आणि आवश्यक कौशल्ये कशी विकसित करावीत, याचेही मार्गदर्शन या कार्यक्रमातून करण्यात आले. प्रशासकीय सेवा, पोलीस व संरक्षण दल, अभियांत्रिकी, तंत्रज्ञान, कृषी, पशुवैद्यकीय आणि बँकिंग अशा विविध क्षेत्रांतील संधींची माहिती एकाच व्यासपीठावर मिळाल्याने ग्रामीण व दुर्गम भागातील विद्यार्थ्यांसाठी हा उपक्रम दिशादर्शक ठरला.