boAt कडून गूगल जेमिनीवर आधारित नवे CREST AI इअरबड्स सादर, आवाजानेच होणार सगळी कामे

भारतातील नंबर वन ऑडिओ आणि वेअरेबल्स ब्रँड असलेल्या boAt ने आपले पहिले स्मार्ट ऑडिओ उपकरण सादर केले आहे. हे डिव्हाईस गूगल जेमिनीच्या मदतीने बनवलेल्या CREST AI या तंत्रज्ञानावर आधारित आहे. या लाँचसोबत कंपनीने पर्सनल ऑडिओच्या क्षेत्रात एक नवी संकल्पना आणली आहे, तिचे नाव आहे इंटेलिजेंट इअर्स. हे इअरबड्स फक्त गाणी किंवा ऑडिओ ऐकण्यापुरते मर्यादित नसून ते ऐकतात, समजून घेतात, संवाद साधतात आणि युजर्सना त्यांच्या रोजच्या कामांमध्ये मदतही करतात.

सध्या AI वापरायचे असेल तर आधी फोन हातात घ्यावा लागतो, मग एखादे ॲप ओपन करावे लागते आणि स्क्रीनकडे बघत बसावे लागते. याच अडचणीतून CREST AI ची कल्पना पुढे आली. माणसे दिवसभर वापरत असलेल्या इअरबड्समध्येच बुद्धिमत्ता आणायची, असा यामागचा विचार आहे. यात स्क्रीन टाइम नाही, स्क्रोलिंग नाही की ॲप उघडायची कटकटही नाही. फक्त बोलायचे आणि काम होऊन जाते.

या इअरबड्समध्ये तीन प्रमुख फीचर्स देण्यात आली आहेत, क्रेस्ट आस्क, जी-असिस्ट आणि क्रेस्ट ट्रान्सलेट. या तिन्हींना मिळून आस्क, असिस्ट, ट्रान्सलेट असे संबोधले जाते. क्रेस्ट आस्क या फीचरमुळे युजर थेट इअरबड्समधून प्रश्न विचारू शकतात, नव्या आयडिया शेअर करू शकतात आणि फोनला वारंवार हात न लावता सहज बोलू शकतात. जी-असिस्ट हे फीचर याच संभाषणांचे रूपांतर प्रत्यक्ष कामात करते. हे गूगल जीमेल, टास्क्स आणि कॅलेंडरशी जोडलेले असल्याने युजर फक्त आवाजाने दिवसाचा सारांश मागू शकतो किंवा ईमेलला उत्तरही देऊ शकतो.

याशिवाय क्रेस्ट ट्रान्सलेट या फीचरमधून २५ हून अधिक भाषांमध्ये रिअल टाइम आणि दोन्ही बाजूंनी भाषांतर मिळते, त्यामुळे वेगवेगळी भाषा बोलणाऱ्या लोकांना एकमेकांशी संवाद साधणे सोपे जाते. ही तिन्ही फीचर्स मिळून इअरबड्सना केवळ ऐकण्याच्या डिव्हाईसमधून एका स्मार्ट सोबत्यात बदलतात, जो संभाषणाचा संदर्भ समजून घेतो आणि दिवसभर युजरला मदत करत राहतो.

लाँच इव्हेंटमध्ये बोलताना boAt चे सीईओ गौरव नायर म्हणाले, बुद्धिमत्ता आपल्या खोल्या, डेस्क, खिसे किंवा स्क्रीनपुरतीच का असावी. ती आपल्यासोबत अधिक नैसर्गिक पद्धतीने येऊ शकते असे आम्हाला वाटते. गूगल जेमिनीच्या साथीने तयार झालेल्या क्रेस्ट एआयच्या माध्यमातून आम्ही ही बुद्धिमत्ता थेट तुमच्या कानांपर्यंत घेऊन जात आहोत. इंटेलिजेंट इअर्ससाठी आमची कल्पना सोपी आहे, असे इअरबड्स जे ऐकू शकतात, समजू शकतात, बोलू शकतात आणि मदतही करू शकतात. ही फक्त सुरुवात आहे, आम्ही अजून इतर अनेक उपयोगांवर काम करत आहोत. गेल्या दहा वर्षांपासून boAt ने भारताला ऐकायला, समजायला आणि मदत करायला शिकवले आहे, असे नायर यांनी सांगितले.