बीवायडीच्या फँग चेंग बाओ फॉर्म्युला एस कारची चीनमध्ये डिलिव्हरी सुरू
१६ सप्टेंबरला लॉन्च झालेल्या बीवायडीच्या फॉर्म्युला एस या इलेक्ट्रिक लिफ्टबॅकची चीनमध्ये ग्राहकांना डिलिव्हरी सुरू झाली आहे.
इलेक्ट्रिक वाहनांच्या (EV) जागतिक बाजारातील चीनची आघाडीची कंपनी बीवायडी (BYD) हिच्या फँग चेंग बाओ (Fang Cheng Bao) या सब ब्रँडखाली आलेल्या फॉर्म्युला एस (Formula S) या इलेक्ट्रिक लिफ्टबॅक कारची चीनमध्ये प्रत्यक्ष डिलिव्हरी सुरू झाली आहे. ही कार १६ सप्टेंबर रोजी लॉन्च झाली होती, म्हणजे काही दिवसांतच ती ग्राहकांच्या हातात पोहोचू लागली आहे. तिच्या खास फीचर्समुळे ऑटोमोबाईल क्षेत्रात सध्या मोठी चर्चा सुरू आहे.
चीनच्या बाजारात या गाडीची किंमत १,८९,९०० युआन ते २,२९,९०० युआन दरम्यान ठेवण्यात आली आहे. भारतीय चलनात ही किंमत अंदाजे २७.१५ लाख ते ३२.८८ लाख रुपयांच्या घरात होते. आंतरराष्ट्रीय बाजारात ही कार डेंझा (Denza) या ब्रँड नावाने लॉन्च होण्याची शक्यता आहे.
डिझाईनबद्दल सांगायचे तर फॉर्म्युला एस स्पोर्टी आणि आकर्षक आहे. कारची लांबी ५०६० मिमी, रुंदी १९६७ मिमी आणि उंची १४८३ मिमी असून व्हीलबेस २९६० मिमी आहे. पुढच्या बाजूला टियरड्रॉप आकाराचे हेडलॅम्प, अॅक्टिव्ह एअर इनटेक आणि सेमी हिडन डोअर हँडल्स दिले आहेत. सुरक्षेसाठी छतावर लाईडार (LiDAR) सेन्सर बसवला आहे, तर मागच्या बाजूचा स्पोर्टी डिफ्युझर कारला अधिक आधुनिक आणि आक्रमक लूक देतो.
ग्राहकांच्या गरजेनुसार ही कार वेगवेगळ्या बॅटरी आणि मोटर पर्यायांत मिळते आणि सर्व पर्यायांत एलएफपी (LFP) बॅटरी पॅक वापरला आहे. स्टँडर्ड व्हेरिएंटमध्ये ७६.७४४ kWh ची बॅटरी असून ती ३२९ एचपी (HP) पॉवर निर्माण करते. या व्हेरिएंटची सीएलटीसी (CLTC) रेंज सुमारे ७२० किलोमीटर आहे.
लॉन्ग-रेंज व्हेरिएंटमध्ये मोठी ९२.०९३ kWh ची बॅटरी आणि ४०२ एचपीची इलेक्ट्रिक मोटर आहे. ती ८३० किमी ते ९०० किमीपर्यंत रेंज देते. जास्त वेग आणि पॉवर हवी असणाऱ्यांसाठी एडब्ल्यूडी (AWD) व्हेरिएंट आहे. त्यात ड्युअल-मोटर ऑल-व्हील ड्राईव्ह असून ते ६५७ एचपी पॉवर तयार करते.
या कारचे सर्वात मोठे वैशिष्ट्य म्हणजे अतिवेगवान फ्लॅश चार्जिंग तंत्रज्ञान. कंपनीच्या दाव्यानुसार कारची बॅटरी अवघ्या ९ मिनिटांत १० टक्क्यांवरून ९७ टक्क्यांपर्यंत चार्ज होऊ शकते. त्यामुळे लांबच्या प्रवासात चालकांना चार्जिंगसाठी तासनतास थांबावे लागणार नाही. मात्र प्रत्यक्ष चार्जिंगची वेळ स्थानिक इन्फ्रास्ट्रक्चर आणि परिस्थितीवर अवलंबून असू शकते.
कारचा आतील भाग प्रीमियम आणि आलिशान ठेवला आहे. डॅशबोर्डवर मोठी टचस्क्रीन इन्फोटेनमेंट सिस्टीम, डिजिटल एलसीडी इन्स्ट्रुमेंट क्लस्टर आणि हेड-अप डिस्प्ले (HUD) आहे. याशिवाय 'डिपायलट 300' (DiPilot 300) ऑटोनॉमस ड्रायव्हिंग असिस्टेड सिस्टीम, इलेक्ट्रोमॅग्नेटिक सस्पेंशन आणि पुढच्या प्रवाशासाठी अतिशय आरामदायक 'झिरो-ग्रॅविटी' सीट्स अशा अत्याधुनिक सुविधाही या कारमध्ये आहेत.
