गॅस आणि तेलाशिवाय तयार होणारे तीन झटपट स्नॅक्स: दही ब्रेड चाट, काकडी-पनीर बाईट्स आणि कोल्ड सँडविच
तेल आणि गॅस न वापरता तयार होणारे तीन स्नॅक्स आणि त्यांची कृती.
वाढता लठ्ठपणा पाहता आजकाल अनेकजण तेलाशिवाय स्वयंपाक करण्याकडे वळू लागले आहेत. चविष्ट जेवण करायचं, पण तेल न वापरता, असा हा प्रकार आहे. तेलाशिवाय पदार्थ कसे होणार, असा प्रश्न अनेकांना पडू शकतो. पण काही पदार्थ असे आहेत की ते तेल आणि गॅस या दोन्हींच्या वापराशिवाय तयार करता येतात. त्यामुळे गॅसही वाचतो आणि तेलाचा वापर नसल्यामुळे पदार्थ आरोग्यासाठी हेल्दी ठरतो, असं या पाककृतींबद्दल म्हटलं आहे. रोजच्या डाएट रुटीनमध्ये हे पदार्थ घेता येतील. त्यातले तीन स्नॅक्स आणि त्यांची कृती खाली दिली आहे.
पहिला पदार्थ आहे दही ब्रेड चाट. संध्याकाळी हलकी भूक लागली असेल तर हा टेस्टी पदार्थ करून बघता येतो. सुरुवातीला ब्रेडचे लहान तुकडे करून घ्यायचे. मग एका बाऊलमध्ये घट्टसर दही घेऊन त्यात मीठ, भाजलेल्या जिऱ्याची पूड आणि चाट मसाला घालायचा आणि हे सगळं साहित्य नीट एकत्र करायचं. हे तयार मिश्रण ब्रेडच्या तुकड्यांवर पसरायचं.
त्यानंतर त्यावर चिरलेला कांदा, टोमॅटो आणि हिरवी कोथिंबीर घालायची. आपल्या चवीनुसार हिरवी चटणी, गोड चटणी आणि बारीक शेव घालून चाट छान सजवायची. एवढं केलं की दही ब्रेड चाट खायला तयार होते.
दुसरा पदार्थ आहे काकडी-पनीर बाईट्स. काकडी आणि पनीर हे दोन्ही आरोग्यासाठी खूप महत्त्वाचे पदार्थ असतात, असं यात सांगितलं आहे. यापासून टेस्टी आणि हेल्दी असा स्नॅक्सचा पदार्थ करता येतो. आधी काकडीचे गोल तुकडे करायचे आणि पनीरचे क्यूब कापून घ्यायचे. मग प्रत्येक काकडीच्या गोल कापावर पनीरचा एक क्यूब ठेवायचा.
त्यावर काळं मीठ, भाजलेलं जिरं आणि चाट मसाला शिंपडायचा. हवं असेल तर वरून हिरवी चटणीही घालता येते. हलक्या नाश्त्यासाठी हा पदार्थ चांगला पर्याय ठरेल, असं म्हटलं आहे.
तिसरा पदार्थ आहे कोल्ड सँडविच. सँडविच आवडणाऱ्यांसाठी तेल आणि गॅसशिवाय व्हेज कोल्ड सँडविच करता येतं. यासाठी आधी एका बाऊलमध्ये काकडी, टोमॅटो, कांदा आणि गाजर बारीक चिरून एकत्र करायचं. त्यात मेयॉनीज, काळी मिरी पूड आणि चवीनुसार मीठ घालायचं.
ब्रेडच्या एका स्लाईसवर हे मिश्रण सगळीकडे सारखं पसरायचं. त्यावर दुसरा ब्रेड स्लाईस ठेवून हलका दाब द्यायचा. शेवटी चाकूने सँडविचचे दोन तुकडे करायचे आणि कोल्ड सँडविच खायला द्यायचं.
