भिवंडीत ऑनलाईन सट्टा आणि कोडीन तस्करीचे दोन रॅकेट उघड, एकूण 15 जणांना अटक

ठाणे जिल्ह्यातील भिवंडी शहरात भोईवाडा पोलिसांनी दोन वेगवेगळ्या कारवायांत ऑनलाईन गेमिंग सट्टेबाजीचे जाळे आणि कोडीन फॉस्फेटच्या बेकायदेशीर तस्करीचे आंतरराज्यीय जाळे उद्ध्वस्त केल्याचे सांगितले आहे. या दोन्ही प्रकरणांत मिळून एकूण 15 जणांना अटक करण्यात आली आहे. त्यापैकी 10 जण 'वर्क फ्रॉम होम'च्या बहाण्याने लोकांची बँक खाती भाड्याने घेऊन ऑनलाईन सट्टा चालवत असल्याचा आरोप आहे, तर 5 जण प्रतिबंधित कोडीनच्या तस्करीत सामील असल्याचा आरोप आहे. या कारवाईमुळे भिवंडीसह मुंबई, गुजरात आणि राजस्थानपर्यंत पसरलेले गुन्हेगारी जाळे समोर आले आहे.

सट्टेबाजीच्या प्रकरणाची सुरुवात तक्रारीपासून झाली. भिवंडीच्या अल्फा कॉम्प्लेक्समधील नावेद जावेद शेख (वय 28) यांनी 17 ऑक्टोबर 2026 रोजी भोईवाडा पोलीस स्टेशनमध्ये तक्रार दाखल केली होती. भगवानदास नावाच्या व्यक्तीने कंपनी सुरू करण्याचे आणि 'वर्क फ्रॉम होम'चे आमिष दाखवून सात जणांची बँक खाती, पासबुक, एटीएम कार्ड आणि सिम कार्ड मिळवली होती, असे तक्रारीत म्हटले आहे.

तपासात या खात्यांचा वापर Khiladi000003 आणि anna555 या वेबसाइट्सवरील ऑनलाईन गेमिंग सट्टेबाजीच्या मोठ्या आर्थिक व्यवहारांसाठी होत असल्याचे उघड झाले. तांत्रिक तपासाच्या आधारे पोलिसांनी मुंबईतील गोरेगांव येथे आरे कॉलनीतील रॉयल पाम परिसरात, खोली क्र. 04 वर छापा टाकला.

तिथे रॅकेट चालवत असल्याच्या आरोपावरून अनिकेत यादव, रमेश मंडल, खिलेश यादव, कुंदन यादव, राजाराम राऊत, अतिश यादव, अशोक यादव, दिलीप यादव, जितेंद्र यादव आणि संडू यादव या 10 जणांना अटक झाली. त्यांच्याकडून 31 मोबाईल फोन, 46 एटीएम कार्ड, 40 सिम कार्ड आणि 4 लॅपटॉप जप्त करण्यात आले. सर्व आरोपींना 26 ऑक्टोबर 2026 पर्यंत पोलीस कोठडी देण्यात आली आहे.

दुसरी कारवाई कोडीन फॉस्फेटच्या साठ्यावर झाली. पोलीस नाईक स्वप्नील सूर्यवंशी यांना गुप्त माहिती मिळाली होती. त्याआधारे पोलिसांनी 17 सप्टेंबर 2026 रोजी सोमवार बाजार येथील स्कॉलर स्कूलच्या मागच्या गल्लीत सापळा रचला आणि अकबर आदम शाह याला ताब्यात घेतले. त्याच्याकडे डॉक्टरचे प्रिस्क्रिप्शन किंवा खरेदी-विक्रीचे वैध बिल नसताना कोडीन फॉस्फेटच्या 119 बाटल्या जप्त करण्यात आल्या.

या प्रकरणातील बँक खात्यांचे व्यवहार आणि तांत्रिक पुराव्यांच्या आधारे भोईवाडा पोलिसांनी भिवंडी, कल्याण, पालघर, तसेच गुजरात आणि राजस्थानमध्ये विशेष पथके पाठवली. त्यानंतर भिवंडीचा अकबर आदम शाह, कल्याणचा जफर जब्बार रईस, पालघरचा वसीम शबीब शेख, कल्याणचा अरफात अलाउद्दीन शेख आणि 'बालाजी ट्रेडर्स'चा प्रोपराइटर असलेला राजस्थानचा अजितकुमार विक्रम सिंह अशा 5 जणांना अटक करण्यात आली.

ही दुहेरी कारवाई पोलीस आयुक्त आशुतोष डुंबरे, सहपोलीस आयुक्त ज्ञानेश्वर चव्हाण, अप्पर पोलीस आयुक्त अशोक धुधे, पोलीस उपायुक्त पवन बनसोडे आणि सहायक पोलीस आयुक्त मिलिंद शिंदे यांच्या मार्गदर्शनाखाली पार पडली. वरिष्ठ पोलीस निरीक्षक विक्रम मोहिते, सहायक पोलीस निरीक्षक दीपक जाधव आणि त्यांच्या पथकाने यात महत्त्वाची भूमिका बजावली. भिवंडीत एकाच वेळी हे दोन्ही रॅकेट उघड झाल्याने खळबळ उडाली असून पोलीस अधिक सखोल तपास करत आहेत.