बेंटलेची पहिली इलेक्ट्रिक SUV टॉर्कल दाखल, 600 km रेंज आणि 876 bhp पॉवर
ब्रिटिश लक्झरी कार कंपनी बेंटलेने आपली पहिली पूर्ण इलेक्ट्रिक SUV टॉर्कल बाजारात आणली आहे.
ब्रिटिश लक्झरी कार कंपनी बेंटलेने आपली पहिली पूर्णपणे इलेक्ट्रिक कार टॉर्कल सादर केली आहे. कंपनीच्या सध्याच्या मॉडेल लाइनअपमधील ही चौथी गाडी ठरते. टॉर्कल आणि टॉर्कल S अशा दोन व्हेरियंटमध्ये ही SUV उपलब्ध होणार आहे. इलेक्ट्रिक लक्झरीसोबतच जबरदस्त परफॉर्मन्सवरही कंपनीने भर दिला असून, अधिकृत माहितीनुसार टॉर्कलची रेंज 600 km पर्यंत आहे.
पॉवरच्या बाबतीत टॉर्कलमध्ये दोन्ही अॅक्सलवर स्वतंत्र इलेक्ट्रिक मोटर्स दिल्या आहेत. स्टँडर्ड टॉर्कलमध्ये 809 bhp पॉवर आणि 1,155 Nm टॉर्क मिळतो. तर टॉर्कल S मध्ये Launch Control सुरू केल्यावर 876 bhp पॉवर आणि 1,350 Nm टॉर्क मिळतो. या S व्हेरियंटचा 0 ते 100 kmph वेग फक्त 2.9 सेकंदात पूर्ण होतो आणि टॉप स्पीड 260 kmph आहे.
रेंज आणि चार्जिंगबाबत बोलायचं झालं तर या SUV मध्ये 113.2 kWh बॅटरी पॅक आणि 800V इलेक्ट्रिकल आर्किटेक्चर बसवण्यात आले आहे. कंपनीच्या दाव्यानुसार 10 ते 80 टक्के चार्जिंगसाठी फक्त 16 मिनिटे लागतात, त्यामुळे लांबच्या प्रवासात चार्जिंगला लागणारा वेळ कमी करण्याचा प्रयत्न करण्यात आला आहे. WLTP सायकलनुसार रेंज 600 km पर्यंत असल्याचं बेंटलेने सांगितलं आहे.
डिझाइनच्या बाबतीत टॉर्कलमध्ये नवीन इल्यूमिनेटेड डायमंड ग्रिल दिली आहे, ज्यात हाताने बसवलेले 76 LED डायमंड्स आहेत. मोठी व्हील्स, शार्प फ्रंट प्रोफाइल आणि मागच्या बाजूची उंचावलेली रचना यामुळे या SUV चा लूक वेगळा दिसतो. टॉर्कल S मध्ये काळे एक्स्टिरियर डिटेल्स आणि स्पोर्टी डिझाइन एलिमेंट्स आहेत. बेंटलेच्या नव्या लोगोचा वापर करणारं टॉर्कल हे पहिलंच प्रोडक्शन मॉडेल आहे.
केबिनमध्ये वक्र OLED डिस्प्ले, 16-वे इलेक्ट्रिक सीट अॅडजस्टमेंट, हीटिंग, व्हेंटिलेशन आणि मसाजची सोय दिली आहे. स्मार्टफोनला डिजिटल की म्हणून वापरण्याचा पर्यायही आहे, तसंच ऑगमेंटेड-रिअॅलिटी हेड-अप डिस्प्ले सुद्धा मिळतो. ड्रायव्हर-असिस्टन्स आणि पार्किंगसाठी अनेक रडार, सेन्सर्स आणि कॅमेरे दिले आहेत. ऑडिओसाठी 28-स्पीकर आणि 1,780W Naim सिस्टमचा पर्यायही उपलब्ध आहे.
स्पोर्टी ड्रायव्हिंग अनुभवासाठी टॉर्कलमध्ये अॅडॅप्टिव्ह डॅम्पर्ससह अॅक्टिव्ह सस्पेंशन आणि ऑल-व्हील स्टीयरिंग बसवण्यात आले आहे. मागची चाके 5 डिग्रीपर्यंत वळू शकतात, त्यामुळे या मोठ्या SUV ला कमी वेगात वळवणं सोपं होतं. बेंटलेने इलेक्ट्रिक कारसाठी खास Dynamic Symphony साउंडही तयार केला आहे, ज्यात खऱ्या वाद्यांचे आवाज वापरण्यात आले आहेत.
