बेलापूर पारसिक हिल भागात कार डोंगरावरून रेल्वे रुळावर कोसळली, अप-डाऊन वाहतूक बंद

नवी मुंबईतील बेलापूर भागातील पारसिक हिल परिसरात गुरुवारी दुपारी एक धक्कादायक अपघात घडला. डोंगरावरून एक कार सरळ खाली असलेल्या रेल्वे रुळावर जाऊन कोसळली. दुपारी तीन ते साडेतीनच्या दरम्यान ही घटना घडली असून, कारमध्ये असलेला तरुण या अपघातात गंभीर जखमी झाला. त्याला तातडीने उपचारासाठी रुग्णालयात दाखल करण्यात आले असून त्याची प्रकृती गंभीर असल्याचे सांगितले जात आहे.

मिळालेल्या माहितीनुसार, पारसिक हिलवरून ही कार थेट पनवेल आणि उरण यांना जोडणाऱ्या रेल्वे मार्गावर पडली. डोंगरावरून खूप उंचीवरून रुळावर कोसळल्याने कारचे मोठे नुकसान झाले आहे. विशेष म्हणजे, अपघात घडला त्यावेळी त्या रुळावरून कोणतीही लोकल जात नव्हती, त्यामुळे मोठी दुर्घटना टळली. हा मार्ग नियमित लोकल वाहतुकीसाठी वापरला जातो, त्यामुळे जर त्याचवेळी लोकल आली असती तर परिस्थिती अधिक गंभीर होऊ शकली असती, असे सांगण्यात येत आहे.

या अपघातामुळे पनवेल-उरण मार्गावरील अप आणि डाऊन अशा दोन्ही दिशेच्या रेल्वे वाहतुकीवर परिणाम झाला असून, ती तात्पुरती बंद करण्यात आली आहे. कार रुळावर कोसळल्यामुळे रेल्वे ट्रॅक तसेच ओव्हरहेड इलेक्ट्रिक वायरिंग म्हणजे OHE यंत्रणेचे नुकसान झाले आहे का, याची रेल्वे प्रशासनाकडून तपासणी सुरू आहे. सुरक्षेच्या दृष्टीने खबरदारी म्हणून या मार्गावरील गाड्या थांबवण्यात आल्या आहेत. ओव्हरहेड वायर, विद्युत खांब किंवा अन्य कोणत्याही रेल्वे यंत्रणेचे नुकसान झाल्याचे आढळल्यास त्याची दुरुस्ती करावी लागणार असून, त्यामुळे रेल्वे वाहतूक पूर्वपदावर येण्यास वेळ लागू शकतो, असे सांगण्यात आले आहे.

अपघाताची माहिती मिळताच रेल्वे प्रशासन, स्थानिक पोलीस तसेच आपत्कालीन यंत्रणांनी तातडीने घटनास्थळी धाव घेतली. रुळावर पडलेली कार बाजूला काढून रेल्वे मार्ग मोकळा करण्याचे काम हाती घेण्यात आले आहे. त्याचबरोबर ट्रॅक आणि विद्युत यंत्रणेची बारकाईने पाहणी केली जात आहे. दरम्यान, कारमध्ये अडकलेल्या तरुणाला बाहेर काढून त्याला रुग्णालयात दाखल करण्यात आले. अपघात नेमका कशामुळे झाला, तसेच कारमध्ये त्या तरुणासोबत आणखी कोणी होते का, याबाबत रेल्वे आणि पोलीस यांच्याकडून चौकशी सुरू आहे.