AVIXA आणि SNDT विद्यापीठात करार, मुलींना ऑडिओव्हिज्युअल क्षेत्रात प्रशिक्षण अन् नोकरीची संधी
SNDT महिला विद्यापीठ आणि जागतिक संघटना AVIXA यांच्यात सामंजस्य करार झाला असून, यातून विद्यार्थिनींना ऑडिओव्हिज्युअल क्षेत्रात प्रशिक्षण आणि प्लेसमेंटच्या संधी मिळणार आहेत.
भारतात झपाट्याने वाढणाऱ्या ऑडिओव्हिज्युअल म्हणजे AV क्षेत्रात मुलींना पुढे नेण्यासाठी आणि उद्योग व शिक्षण क्षेत्रातली दरी कमी करण्यासाठी एक मोठं पाऊल उचलण्यात आलंय. 'AVIXA' म्हणजे ऑडिओव्हिज्युअल अँड इंटिग्रेटेड एक्सपीरियन्स असोसिएशन आणि SNDT महिला विद्यापीठ यांच्यात सामंजस्य करार म्हणजे MoU झाला आहे. या करारामुळे विद्यार्थिनींना थेट जागतिक पातळीवरच्या ऑडिओव्हिज्युअल उद्योगात करिअर करण्याची संधी मिळणार आहे, तसंच प्रात्यक्षिक प्रशिक्षण आणि थेट प्लेसमेंटचाही मार्ग खुला झालाय.
SNDT महिला विद्यापीठ महिला शिक्षण आणि सक्षमीकरणासाठी जे उपक्रम राबवतं, त्याला आता AVIXA च्या जागतिक अनुभवाची जोड मिळणार आहे. या सहकार्यातून विद्यार्थ्यांना उद्योगाशी संबंधित ज्ञान, AV क्षेत्रातले नवे ट्रेंड्स आणि प्रत्यक्ष शिकण्याच्या संधी मिळाव्यात यासाठी काम केलं जाईल. यामुळे AV क्षेत्राकडे फक्त तंत्रज्ञानाचं क्षेत्र म्हणून न बघता, त्यापलीकडे जाऊन बघण्याची नजरही विद्यार्थ्यांना मिळेल.
इमर्सिव्ह अनुभव तयार करणं, हायब्रिड पद्धतीने काम करता येईल असं वातावरण उभं करणं, इथपासून ते किचकट AV प्रणाली सांभाळणं आणि डिजिटल अनुभवांचं भविष्य घडवणं, अशा अनेक वाटा या क्षेत्रात करिअरसाठी उपलब्ध आहेत.
या करारामुळे विद्यार्थ्यांना कौशल्य विकास, प्रशिक्षण, कार्यशाळा, तज्ज्ञांशी गप्पा, ज्ञानाची देवाणघेवाण आणि उद्योगाची प्रत्यक्ष ओळख अशा वेगवेगळ्या गोष्टींचा अनुभव घेता येईल. तसंच याच भागातल्या AV प्रणाली एकात्मीकरण आणि उत्पादन क्षेत्रातल्या आघाडीच्या संस्थांमध्ये प्लेसमेंटच्याही संधी दिल्या जातील.
AVIXA आणि SNDTWU मिळून विद्यार्थ्यांना उद्योगाचं ज्ञान मिळावं यासाठी अभ्यासक्रम तयार करतील. उद्योगाच्या बदलत्या गरजांनुसार वेगवेगळ्या शैक्षणिक कार्यक्रमांतून मार्गदर्शन कार्यक्रम, औद्योगिक भेटी आणि प्रत्यक्ष प्रशिक्षणाच्या संधीही उभ्या केल्या जातील.
यामध्ये उद्योगाला हवा तसा अभ्यासक्रम बनवणं, मार्गदर्शन कार्यक्रम आणि औद्योगिक भेटी आयोजित करणं, कार्यशाळा व तज्ज्ञांशी संवादातून तांत्रिक आणि व्यावहारिक कौशल्यं वाढवणं, AV प्रणाली एकात्मीकरण आणि उत्पादन क्षेत्रातल्या नामांकित संस्थांमध्ये थेट नोकरीची संधी देणं आणि AV क्षेत्राकडे फक्त तंत्रज्ञान म्हणून न बघता सर्जनशीलता, कल्पकता आणि उद्योजकीय विचार वाढवणं, या गोष्टींचा समावेश आहे.
विद्यार्थी प्रत्यक्ष जगाशी जोडले जातात आणि वर्गात शिकलेल्या गोष्टींचा बाहेरच्या जगाशी काय संबंध आहे हे तपासतात, तेव्हाच शिक्षणाला खरा अर्थ मिळतो, असं SNDT महिला विद्यापीठाचे संचालक डॉ. सचिन लड्ढा यांनी सांगितलं. AVIXA सोबत हा करार झाल्याचा आनंद असल्याचं ते म्हणाले. विशेषतः तंत्रज्ञान क्षेत्रात करिअर घट्ट करू इच्छिणाऱ्या विद्यार्थ्यांसाठी यातून जास्त आणि चांगल्या संधी निर्माण होतील, असंही त्यांनी नमूद केलं. तंत्रज्ञानात सतत होणाऱ्या प्रगतीसोबत विद्यार्थी सक्षम आणि अद्ययावत राहावेत यासाठी AVIXA आवश्यक ती परिसंस्था उपलब्ध करून देईल, असंही डॉ. लड्ढा म्हणाले. हा MoU भारतातून जागतिक स्तरावर स्पर्धात्मक प्रतिभा घडवण्याची सामायिक बांधिलकी दाखवतो आणि AV उद्योगातल्या करिअर संधींबाबत जागरूकता वाढवण्यासही मदत करेल, असं ते म्हणाले.
या कराराबद्दल बोलताना AVIXA चे वरिष्ठ संचालक पँग यी लॉय म्हणाले, गेल्या काही वर्षांत AV उद्योगात मोठे बदल झाले असून त्यातून नव्या संधी आणि करिअरच्या वाटा निर्माण झाल्या आहेत. या गतिमान उद्योगातल्या शक्यता तरुण व्यावसायिकांनी समजून घ्याव्यात आणि भविष्यासाठी उपयोगी ठरणारं ज्ञान, कौशल्यं व अनुभव त्यांना मिळावा अशी इच्छा असल्याचं ते म्हणाले. SNDT महिला विद्यापीठासोबतचं हे सहकार्य वर्गातलं शिक्षण आणि उद्योग यांच्यातला दुवा अधिक घट्ट करण्याच्या दिशेने टाकलेलं महत्त्वाचं पाऊल असल्याचं पँग यी लॉय यांनी सांगितलं. जास्तीत जास्त मुलींनी AV क्षेत्राकडे फक्त तंत्रज्ञान म्हणून न बघता, नवं काही घडवण्यासाठी, सर्जनशीलतेला वाव देण्यासाठी आणि अर्थपूर्ण करिअर घडवण्यासाठीची संधी म्हणून बघावं, यासाठीही हे सहकार्य प्रोत्साहन देईल, असंही ते म्हणाले.
महर्षी डॉ. धोंडो केशव कर्वे यांनी सन 1916 मध्ये SNDT महिला विद्यापीठाची स्थापना केली होती. भारतातलं आणि दक्षिण-पूर्व आशियातलं हे पहिलं महिला विद्यापीठ आहे. तर सन 1939 मध्ये स्थापन झालेली AVIXA ही आंतरराष्ट्रीय संस्था जगभरातल्या 80 हून जास्त देशांमधल्या 20 हजारांहून जास्त AV व्यावसायिकांचं प्रतिनिधित्व करते.
