'अफरातफरी' प्रमोशन वादावर ओंकार भोजने म्हणाला, आरोपांना नक्की उत्तर देणार

मराठी अभिनेता ओंकार भोजने सध्या त्याच्या आगामी 'अफरातफरी' या सिनेमामुळे चर्चेत आहे. पण सिनेमाच्या प्रमोशनवरूनच आता ओंकार आणि सिनेमाचे दिग्दर्शक मिलिंद कवडे यांच्यात मतभेद झाल्याचं समोर आलं आहे. प्रमोशनल इव्हेंटला ओंकार हजर राहिला नाही, यावरून मिलिंद कवडे यांनी एका मुलाखतीत नाराजी बोलून दाखवली होती. या आरोपांना आता ओंकार भोजनेने उत्तर दिलं आहे.

'अफरातफरी'चे दिग्दर्शक मिलिंद कवडे आणि त्यांची टीम सध्या सिनेमाच्या प्रमोशनमध्ये गुंतलेली आहे. याच दरम्यान एका मुलाखतीत त्यांनी ओंकार प्रमोशनमध्ये कसा सहभागी होत नाही, याबद्दल नाराजी व्यक्त केली. ओंकार फोन घेत नाही, असा दावा करत त्यांनी त्याच्या व्यावसायिक वागणुकीवरच प्रश्न उपस्थित केले होते.

यावर प्रतिक्रिया देताना ओंकार भोजने 'महाराष्ट्र टाइम्स ऑनलाइन'शी बोलला. तो म्हणाला, "मी यापुढे सिनेमाच्या प्रमोशनल इव्हेंटमध्ये सहभागी होणार आहे. मी त्यांच्या टीमसोबत, ईपींसोबत संपर्कात आहे. दिग्दर्शक असं का म्हणाले हे मला माहिती नाही, पण यावर मी नक्कीच उत्तर देईन." त्याच्या या वक्तव्यानंतर तो 'अफरातफरी'च्या प्रमोशनमध्ये सहभागी होणार, हे स्पष्ट झालं आहे. पण दिग्दर्शकांच्या आरोपांना तो सविस्तर काय उत्तर देतो, याकडे आता सगळ्यांचं लक्ष लागलं आहे.

दुसरीकडे, मिलिंद कवडे यांनी मुलाखतीत असा दावा केला की, सिनेमा ऑक्टोबरमध्ये प्रदर्शित होणार आहे, ही माहिती ओंकारला जून महिन्यातच देण्यात आली होती. त्यानंतर प्रमोशनसाठी त्याच्याशी संपर्क साधायचा प्रयत्न झाला, पण त्याच्याकडून अपेक्षित प्रतिसाद मिळाला नाही, असं कवडे यांचं म्हणणं आहे.

"ओंकार एवढा बिझी आहे की तो कोणाचाच फोन उचलत नाही. आम्हा तिघांचेही त्याने फोन उचलले नाहीत. कॉल केल्यावर त्याचा एकच मेसेज येतो, 'दादा मी तुला कॉलबॅक करतो.' गेल्या चार महिन्यांपासून हेच सुरू आहे," असं मिलिंद कवडे यांनी सांगितलं.

या अनुभवामुळे पुढच्या सिनेमांमध्ये ओंकारसोबत काम न करण्याचा निर्णय घेतल्याचंही मिलिंद कवडे यांनी स्पष्ट केलं. "आता मी कानाला खडा लावला आहे. पुढच्या सिनेमात मी ओंकारला अजिबात घेणार नाही. मी आतापर्यंत खूप काम केलंय, पण यात तो खूपच अनप्रोफेशनल आहे. दिग्दर्शकाचा फोन न उचलणं, निर्मात्यांचा फोन न उचलणं, ईपीला गंडवणं आणि सतत येतो-येतो म्हणणं... याला अनप्रोफेशनलच म्हणतात," असा दावा कवडे यांनी केला.

दरम्यान, आपण सिनेमाच्या टीमच्या संपर्कात असल्याचं ओंकारने स्पष्ट केलं आहे. त्यामुळे दोन्ही बाजूंच्या वक्तव्यांमुळे 'अफरातफरी'च्या प्रमोशनवरून सुरू झालेला हा वाद सध्या चर्चेचा विषय ठरला आहे.