फिफा अंडर-15 विश्वचषकात भारताने कॅमेरूनला 2-1 ने हरवले, सलग दुसरा विजय

फिफा अंडर-15 विश्वचषक 2026 स्पर्धेत भारतीय फुटबॉल संघाचा विजयी सिलसिला सुरूच आहे. रविवारी गटातील दुसऱ्या सामन्यात भारताने कॅमेरूनला 2-1 असे हरवले आणि सलग दुसरा विजय नोंदवला. पावसामुळे मैदानावरची परिस्थिती अवघड होती, तरीही भारतीय खेळाडूंनी जिद्दीने खेळ केला आणि विजय खेचून आणला.

होवसन कॉम्पिटिशन कॉम्प्लेक्सवर झालेल्या या सामन्यात भारताला पहिल्याच मिनिटाला आघाडी मिळाली. दीपक सिंह आरामबम याने कॉर्नर किक घेतली आणि त्यावर कॅमेरूनच्या फरेल न्गोबो याच्याकडून चुकून चेंडू स्वतःच्याच गोलपोस्टमध्ये गेला. त्यामुळे भारत 1-0 ने पुढे गेला.

त्यानंतर कॅमेरूनने आक्रमक खेळ करत भारताच्या गोलक्षेत्रात दबाव आणला. पण गोलरक्षक जेनित निंगथौजाम याने उत्तम बचाव करून त्यांचे प्रयत्न हाणून पाडले. 16व्या मिनिटाला फ्री-किक आणि 17व्या व 18व्या मिनिटाला आलेल्या संधींवर त्याने शानदार बचाव केला. भारतानेही आघाडी वाढवायचा प्रयत्न केला. 14व्या मिनिटाला कर्णधार आर. लालरेमरुआतफेला याला गोल करायची संधी मिळाली, पण कॅमेरूनच्या बचावपटूने ऐनवेळी चेंडू अडवला.

सामन्याच्या 20व्या मिनिटाला कॅमेरूनने बरोबरी साधली. नदाम मोख्तार याने उजव्या बाजूने क्रॉस दिला. तो भारताचा खेळाडू मोहम्मद सोहिल खान याला लागून भारताच्याच गोलपोस्टमध्ये गेला आणि सामना 1-1 असा झाला. पहिल्या सत्रात दोन्ही संघांनी आक्रमक खेळ केला, पण मध्यंतरापर्यंत कोणालाही आघाडी घेता आली नाही.

दुसऱ्या सत्रात भारताने नव्या जोमाने सुरुवात केली. रोनांदेव अहेइबाम याला मैदानात उतरवल्यावर भारताच्या आक्रमणाला जास्त धार आली. 27व्या मिनिटाला रोनांदेवने मिडफिल्डमध्ये चेंडू ताब्यात घेऊन तो दीपककडे दिला. दीपकने गोलक्षेत्रात अचूक लो क्रॉस दिला आणि कर्णधार आर. लालरेमरुआतफेला याने डाव्या पायाने चेंडू गोलपोस्टच्या दिशेने धाडला. या गोलमुळे भारताने 2-1 अशी आघाडी घेतली.

31व्या मिनिटाला भारतासमोर मोठे आव्हान उभे राहिले. नारा मेइतेई लौशंबम याच्याकडून हाताने चेंडू अडवला गेल्यामुळे पंचांनी कॅमेरूनला पेनल्टी दिली. मात्र जेनित निंगथौजाम याने 32व्या मिनिटाला हारौना अब्दौले याची पेनल्टी रोखली आणि भारताची आघाडी टिकवली.

सामन्याच्या शेवटच्या टप्प्यातही भारताने आक्रमण थांबवले नाही. रोनांदेवच्या जोरदार फटक्यानंतर गोलरक्षकाने सौमोजित सरकार याची फ्री-किकही अडवली. अखेर भारताने 2-1 ने सामना जिंकला आणि स्पर्धेतील सलग दुसरा विजय मिळवला. या विजयामुळे गटात दोन्ही सामने जिंकणारा भारत हा एकमेव संघ ठरला आहे.