गणेश विसर्जनासाठी आपत्ती व्यवस्थापनाची तयारी, 9 बोटी आणि पथके राहणार तैनात

उद्या अनंत चतुर्दशीच्या दिवशी नागपूर शहरात गणेश मूर्तींचे विसर्जन होणार आहे. या पार्श्वभूमीवर नागपूर अग्निशमन आणि आपत्कालीन सेवा विभागाने आपत्ती व्यवस्थापनाची तयारी वेगाने सुरू केली आहे. शहरातील प्रमुख विसर्जन स्थळांवर अग्निशमन विभाग, आपत्ती व्यवस्थापन अधिकारी-कर्मचारी आणि एनजीओंची पथके तैनात राहणार आहेत. आणीबाणीच्या परिस्थितीला तोंड देण्यासाठी निवृत्त नेव्ही कर्मचाऱ्यांचीही मदत घेतली जाणार आहे.

विसर्जनासाठी शहरात एकूण चार मोठे कृत्रिम विसर्जन तलाव तयार करण्यात आले आहेत. हे तलाव गोरेवाडा, कोराडी, पोलीस लाईन टाकळी आणि कच्छी वीसा मैदान या चार ठिकाणी उभारण्यात आले आहेत. याशिवाय शहरातील किल्ले कोळार नदीघाट आणि सोनेगाव तलाव यांसारख्या प्रमुख नैसर्गिक जलस्रोतांवरही विसर्जनासाठी सुरक्षा व्यवस्था ठेवण्यात येणार आहे.

आपत्ती व्यवस्थापनाअंतर्गत शहरातील प्रमुख विसर्जन स्थळांवर एकूण 9 बोटी तैनात करण्यात येणार आहेत. यामध्ये गोरेवाडा येथे 3 बोटी आणि कोराडी येथे 2 बोटींचा समावेश आहे. उर्वरित बोटी इतर विसर्जन स्थळांवर गरजेनुसार उपलब्ध करून दिल्या जातील. विसर्जनादरम्यान कोणत्याही आणीबाणीच्या प्रसंगी तात्काळ बचावकार्य सुरू करता यावे, यासाठी विशेष प्रशिक्षण घेतलेली पथके तैनात केली जाणार आहेत. प्रत्येक विसर्जन स्थळावर दिवसाच्या वेळी 13 कर्मचाऱ्यांचे पथक तर रात्रीच्या वेळी 15 कर्मचाऱ्यांचे पथक उपस्थित राहणार आहे. अग्निशमन विभाग आणि आपत्ती व्यवस्थापन पथके एनजीओंसोबत मिळून काम करणार आहेत. याशिवाय गोरेवाडा आणि कोराडी या दोन ठिकाणी निवृत्त नेव्ही कर्मचाऱ्यांच्याही सेवा घेतल्या जाणार आहेत. बचाव पथकांकडे पावर बोट, ओबीएम, दोऱ्या, लाइफ जॅकेट, लाइफ बॉय, पीए सिस्टम, टॉर्च, इमर्जन्सी लाइट आणि तंबू यांसारखे आवश्यक साहित्य उपलब्ध असणार आहे.

विभागाने विसर्जन कार्यक्रमापूर्वी अग्निशमन वाहने आणि नियंत्रण कक्षाची वायरलेस यंत्रणा सुरळीत ठेवण्याचे निर्देश दिले आहेत. बचाव पथकाचे मुख्य नियंत्रक अधिकारी विसर्जनाच्या एक दिवस आधी संबंधित नियंत्रण अधिकारी आणि गट प्रमुखांसोबत बैठक घेऊन तयारीचा आढावा घेणार आहेत. या बैठकीत गरज भासल्यास विसर्जन स्थळांची पाहणी करून व्यवस्थेत बदलही केला जाणार आहे. गणेश विसर्जनादरम्यान तैनात अधिकारी आणि कर्मचाऱ्यांना ठोस कारणाशिवाय गैरहजर न राहण्याचे निर्देश देण्यात आले आहेत. या आदेशाचे उल्लंघन केल्यास नियमानुसार शिस्तभंगाची कारवाई करण्याचा इशाराही देण्यात आला आहे.

नागपूर टुडेशी बोलताना अग्निशमन विभागाचे आपत्ती व्यवस्थापन अधिकारी दिलीप चौहान यांनी सांगितले की, गणेश विसर्जनादरम्यान कोणत्याही आणीबाणीच्या परिस्थितीला तोंड देण्यासाठी विभागाची पथके पूर्णपणे सज्ज राहतील आणि शहरातील संवेदनशील विसर्जन स्थळांवर विशेष लक्ष ठेवले जाईल.