अमेरिकेत विमान वाहतूक विस्कळीत, तांत्रिक बिघाडाने हजारो फ्लाइट्स उशिराने, हजाराहून जास्त रद्द
इराणवर कारवाईचा इशारा दिल्यानंतर काही तासांतच अमेरिकेतील स्वतःच्या विमान यंत्रणेत मोठा तांत्रिक बिघाड झाला. न्यूयॉर्क, न्यू जर्सी, फिलाडेल्फिया आणि बोस्टन भागातील विमानतळांवर याचा मोठा फटका बसला.
अमेरिकेने सोमवारी सकाळी इराणची विमान वाहतूक व्यवस्था पूर्णपणे बंद करण्याचा आपला मानस जगासमोर मांडला होता. इराणच्या विमानांना मदत करणाऱ्या कोणत्याही देशावर कडक निर्बंध लादण्याचा इशाराही अमेरिकेने दिला होता. पण याच्या काही तासांतच अमेरिकेतील स्वतःची विमान यंत्रणाच कोलमडली.
यात इराणचा काहीही संबंध नाही, हे स्पष्ट आहे. इराणवर याबाबत कोणीही शंका घेतलेली नाही. अमेरिकेत असं काही घडणं हे तसं दुर्मिळ मानलं जातं, आणि तांत्रिक कारणांमुळेच अमेरिकेतील प्रवासी विमान व्यवस्था विस्कळीत झाल्याचं समोर आलं आहे.
अमेरिकेच्या ईशान्य भागाला सोमवारी याचा मोठा फटका बसला. एअर ट्रॅफिक कंट्रोलच्या कम्युनिकेशन यंत्रणेत अचानक तांत्रिक बिघाड झाला आणि त्यामुळे न्यूयॉर्क, न्यू जर्सी, फिलाडेल्फिया आणि बोस्टन या भागातील विमान वाहतूक मोठ्या प्रमाणात कोलमडली. काही विमानतळांवर तर विमानांच्या आगमनावर तात्पुरते निर्बंधच लावावे लागले. अनेक फ्लाइट्सना उशीर झाला, काहींचं वेळापत्रक बदलावं लागलं, तर काही विमानं इतर विमानतळांकडे वळवण्यात आली.
नेमकं झालं काय, तर फिलाडेल्फिया भागातील फेडरल एव्हिएशन अॅडमिनिस्ट्रेशनच्या एअर ट्रॅफिक कंट्रोल सुविधेतील कम्युनिकेशन सर्किटमध्ये अचानक बिघाड झाला. लगेच बॅकअप यंत्रणा सुरू करण्याचा प्रयत्न झाला, पण त्याचवेळी न्यू जर्सीत सुरू असलेल्या बांधकामादरम्यान एक महत्त्वाची फायबर-ऑप्टिक केबलच तुटली आणि अडचण आणखी वाढली. विमान वाहतूक नियंत्रक आणि विमानांमधला संपर्कच नीट होत नव्हता, त्यामुळे सुरक्षेच्या कारणावरून काही ठिकाणी विमानांची वाहतूक मर्यादित करावी लागली.
न्यूयॉर्क भागातील JFK, LaGuardia आणि Newark ही तीन मोठी विमानतळं या तांत्रिक बिघाडामुळे सर्वाधिक प्रभावित झाली. फिलाडेल्फिया आणि बोस्टन विमानतळांवरही विमान वाहतुकीवर निर्बंध लागू करण्यात आले. काही काळ तर Newark विमानतळावर उशीर झालेल्या फ्लाइट्सचा आकडा हजारोंच्या घरात पोहोचला होता. प्रवाशांना विमानतळांवर तासन्तास ताटकळत बसावं लागलं, तर अनेक फ्लाइट्सचं वेळापत्रकच बदलावं लागलं.
हा बिघाड फक्त या तीन-चार विमानतळांपुरता मर्यादित राहिला नाही, तर संपूर्ण अमेरिकेतील विमान वाहतुकीवर त्याचा परिणाम झाला. उपलब्ध आकडेवारीनुसार सुमारे 7 हजार फ्लाइट्सना उशीर किंवा रद्दीकरणाचा फटका बसला. यातही एकट्या न्यूयॉर्क भागातील तीन प्रमुख विमानतळांवरच सुमारे 1,400 फ्लाइट्स प्रभावित झाल्याचं समोर आलं. दरम्यान, तुटलेली फायबर केबल दुरुस्त झाल्यानंतर विमान वाहतूक हळूहळू पूर्वपदावर येऊ लागली. पण आधीच झालेल्या उशिरामुळे त्याचा परिणाम पुढच्या फ्लाइट्सच्या वेळापत्रकावरही होत राहिला.
