अकोल्यातील ३१ माजी आमदारांना पेन्शन; दोघांना सर्वाधिक ७२ हजार रुपये
अकोला जिल्ह्यातील ३१ माजी आमदारांना शासनाकडून निवृत्तीवेतन मिळते. दोन माजी आमदारांना सर्वाधिक ७२ हजार रुपये मासिक पेन्शन दिली जाते.
अकोला : विधानसभा आणि विधान परिषदेच्या माजी आमदारांना शासनाच्या वतीने पेन्शन दिली जाते. अकोला जिल्ह्यातील ३१ माजी आमदारांना सध्या शासनाकडून निवृत्तीवेतनाचा लाभ मिळत आहे. माजी आमदाराने किमान एक कार्यकाळ पूर्ण केला की त्यांना दरमहा ५० हजार रुपयांपासून निवृत्तीवेतन मिळण्याची तरतूद आहे. अतिरिक्त कार्यकाळ असेल तर पेन्शनच्या रकमेत वाढ होते. त्यामुळे प्रत्येक माजी आमदाराला मिळणारी रक्कम त्यांच्या कार्यकाळानुसार वेगवेगळी आहे.
उपलब्ध माहितीनुसार, अकोला जिल्ह्यातील ३१ माजी आमदारांच्या निवृत्तीवेतनावर शासनाचा दरमहा लाखो रुपयांचा खर्च होत आहे. प्रत्येकी किमान ५० हजार रुपये दरमहा या दराने ३१ माजी आमदारांचा विचार केला, तर हा खर्च महिन्याला किमान १ कोटी ५५ लाख रुपये आणि वर्षाला किमान १८ कोटी २० लाख रुपये इतका होतो. अतिरिक्त कार्यकाळामुळे काहींना वाढीव पेन्शन मिळते, त्यामुळे प्रत्यक्ष खर्च यापेक्षा जास्त आहे. माजी आमदारांच्या निवृत्तीवेतनाच्या यादीत मतदारसंघांचे माजी लोकप्रतिनिधी आहेत. काही माजी आमदारांना ५० हजारांपेक्षा जास्त निवृत्तीवेतन मिळत असल्याची नोंद आहे.
दरम्यान, माजी आमदारांना दिल्या जाणाऱ्या दरमहा ५० हजार रुपयांच्या किमान निवृत्तीवेतनाच्या तरतुदीला २०२६ मध्ये नागपूर खंडपीठात आव्हान देण्यात आले आहे. या प्रकरणामुळे आमदारांच्या निवृत्तीवेतनाच्या धोरणाची पुन्हा चर्चा सुरू झाली आहे.
जिल्ह्यात माजी आमदार म्हणून पेन्शन घेणाऱ्यांची संख्या ३१ असली, तरी त्यातील दोघांना सर्वाधिक पेन्शन मिळते. अकोट विधानसभा मतदारसंघाचे माजी आमदार सुधाकर गणगणे आणि अकोला विधानसभा मतदारसंघाचे माजी आमदार अजहर हुसेन यांना प्रत्येकी ७२ हजार रुपये मासिक पेन्शन दिली जाते. विधान परिषदेतून तीनदा आमदार राहिलेले माजी आमदार गोपीकिसन बाजोरिया यांना ७० हजार रुपये पेन्शन आहे.
शासकीय नियमानुसार पेन्शनधारकाच्या मृत्यूनंतर त्यांच्या पत्नीला निम्मी पेन्शन दिली जाते. जिल्ह्यात पेन्शन घेणारे १० माजी आमदार दिवंगत झाले आहेत. त्यांच्या पत्नींना आजच्या घडीला कौटुंबिक पेन्शन म्हणून अर्धी पेन्शन मिळत आहे.
अकोला जिल्ह्यात मूर्तिजापूर विधानसभा मतदारसंघातून आमदार म्हणून निवडून आलेले माजी केंद्रीय मंत्री संजय धोत्रे यांनी नंतर खासदारकीही मिळवली. आज त्यांना आमदार आणि खासदार अशा दोन्ही पेन्शन मिळतात. जिल्ह्यात असे ते एकमेव माजी खासदार आहेत.
