Drishyam 3: विजय साळगावकरची कथा इथेच संपणार? 'दृश्यम 4'बाबत दिग्दर्शकांनी केला मोठा खुलासा
अजय देवगणच्या 'दृश्यम' फ्रँचायझीतील तिसऱ्या भागाची तारीख समोर आली असून, हा शेवटचा भाग असल्याचं दिग्दर्शक अभिषेक पाठक यांनी स्पष्ट केलं आहे.
अजय देवगणच्या 'दृश्यम' फ्रँचायझीतील तिसऱ्या भागाची चाहते बऱ्याच दिवसांपासून आतुरतेने वाट पाहत होते, आणि आता त्याबद्दलची तारीख समोर आली आहे. 'Drishyam: The Conclusion' हा सिनेमा २ ऑक्टोबर २०२६ रोजी चित्रपटगृहात झळकणार आहे. निर्मात्यांनी आधीच स्पष्ट केलं आहे की हा 'दृश्यम' मालिकेतील तिसरा आणि शेवटचा भाग असेल, म्हणजे या फ्रँचायझीचा हा शेवटचा टप्पा असणार आहे.
या फ्रँचायझीचा पहिला सिनेमा २०१५ साली आला होता, तर दुसरा भाग 'दृश्यम २' २०२२ मध्ये प्रेक्षकांसमोर आला होता. या दोन्ही भागांना प्रेक्षकांचा चांगला प्रतिसाद मिळाला होता. आता पुन्हा एकदा अजय देवगण विजय साळगावकर या भूमिकेत दिसणार आहे. ९ सप्टेंबरला सिनेमाचा ट्रेलर आला आणि त्यानंतर याबद्दलची उत्सुकता आणखी वाढली आहे.
'Drishyam: The Conclusion' हे नावच सांगतं की हा सिनेमा विजय साळगावकरच्या कथेचा शेवट असणार आहे. पण तरीही चाहत्यांच्या मनात एक प्रश्न होता, की 'दृश्यम ३' नंतर चौथा भाग येणार का? याबाबत दिग्दर्शक अभिषेक पाठक यांनी हिंदुस्तान टाइम्सला दिलेल्या मुलाखतीत स्पष्ट उत्तर दिलं आहे. हिंदी 'दृश्यम ४' बनण्याची शक्यता किती, असं विचारलं असता त्यांनी थेट "Zero" असं उत्तर दिलं. आपण 'दृश्यम ४' लिहिणार नाही, असंही त्यांनी स्पष्ट केलं.
अभिषेक पाठक यांच्या मते 'Drishyam: The Conclusion' हाच विजय साळगावकरच्या कथेचा योग्य शेवट आहे. या सिनेमासाठी त्यांनी आणि त्यांच्या टीमने खूप मेहनत घेतली असून, फक्त पैशांसाठी पुढचा भाग काढण्याचा त्यांचा कोणताही विचार नाही, असं त्यांनी सांगितलं. त्यामुळे सध्या तरी अजय देवगणच्या हिंदी 'दृश्यम' फ्रँचायझीचा प्रवास तिसऱ्या भागासोबतच संपणार असल्याचं स्पष्ट झालं आहे.
एक गोष्ट लक्षात घेण्यासारखी आहे की अजय देवगणचा 'Drishyam: The Conclusion' हा मोहनलालच्या मल्याळम 'Drishyam 3' चा थेट रिमेक नाही. अभिषेक पाठक यांनी सांगितल्याप्रमाणे हिंदी सिनेमाची कथा वेगळी आणि स्वतंत्र आहे, म्हणजे दोन्ही सिनेमांमधील घटना आणि प्रवास वेगळ्या पद्धतीने मांडला जाणार आहे.
सिनेमात अजय देवगणसोबत तब्बू, श्रिया सरन, राजत कपूर, इशिता दत्ता आणि मृणाल जाधव पुन्हा दिसणार आहेत. तर जयदीप अहलावत, प्रकाश राज आणि सौरभ शुक्ला हे कलाकार नव्या भूमिकांमध्ये दिसतील. विजय साळगावकर या सगळ्या संकटातून आपल्या कुटुंबाला कसं वाचवणार आणि त्याच्या कथेचा शेवट नेमका कसा होणार, याची उत्सुकता प्रेक्षकांना लागून राहिली आहे.
