'दृश्यम ३'ला तरण आदर्श यांचे साडेचार स्टार, फ्रँचायझीतला सर्वोत्तम चित्रपट असल्याचे मत

अभिनेता अजय देवगणच्या बहुचर्चित 'दृश्यम ३' ची सगळीकडे जोरदार चर्चा आहे. हा चित्रपट आज, २ ऑक्टोबरला चित्रपटगृहात प्रदर्शित होत आहे. 'दृश्यम' आणि 'दृश्यम २' या दोन्ही चित्रपटांतल्या सस्पेन्सने प्रेक्षकांना खुर्चीला खिळवून ठेवलं होतं. त्यामुळे आता तिसऱ्या भागाची कथा कोणतं वळण घेणार, याची प्रेक्षकांना उत्सुकता आहे.

चित्रपट प्रदर्शित होण्याआधीच ट्रेड अ‍ॅनालिस्ट तरण आदर्श यांनी 'दृश्यम ३' पाहिला आणि आपली प्रतिक्रिया दिली. त्यांनी या चित्रपटाला ४.५ स्टार रेटिंग दिलं आहे. हा चित्रपट आधीच्या दोन्ही भागांपेक्षा सरस असल्याचं त्यांचं म्हणणं आहे.

सोशल मीडियावर तरण आदर्श यांनी 'दृश्यम: द कन्क्लुजन' चं कौतुक केलं. त्यांच्या मते, चित्रपट प्रेक्षकांच्या अपेक्षांवर खरा उतरतो. ते म्हणतात, "दृश्यम: द कन्क्लुजन विलक्षण आहे. हा चित्रपट प्रेक्षकांच्या उच्च अपेक्षांवर खरा उतरतो. निःसंशयपणे, हा 'दृश्यम' फ्रँचायझीमधील सर्वोत्तम चित्रपट आहे, ज्यामुळे तो २०२६ मधील सर्वोत्कृष्ट चित्रपटांपैकी एक ठरतो."

कथा आणि कलाकारांचा अभिनय प्रभावी असल्याचंही त्यांनी नमूद केलं. अजय देवगणने विजय साळगावकरची भूमिका पुन्हा एकदा ताकदीने साकारली, असं ते म्हणाले. विशेषतः अजय देवगण आणि जयदीप अहलावत यांच्यातला संघर्ष प्रेक्षकांचं लक्ष वेधून घेणारा आहे, असं तरण आदर्श यांनी सांगितलं. पूर्वार्धातला हा संघर्ष चित्रपटाचं प्रमुख आकर्षण असल्याचं त्यांनी म्हटलं.

'दृश्यम ३' चं दिग्दर्शन अभिषेक पाठक यांनी केलं आहे. त्यांच्या दिग्दर्शनाचं आणि लेखनाचं तरण आदर्श यांनी विशेष कौतुक केलं. ते म्हणाले, "अभिषेक पाठक यांनी पुन्हा एकदा सिद्ध केलं आहे की ते आजच्या काळातील सर्वोत्तम कथाकारांपैकी एक का आहेत. त्यांना या फ्रँचायझीची नस अचूक समजली आहे आणि जुनेच फॉर्म्युले पुन्हा न वापरता ते कथेला पुढे नेतात." दिग्दर्शन आणि लेखन हे चित्रपटाचे दोन मजबूत आधारस्तंभ आहेत, असंही त्यांनी म्हटलं.

कोर्टरूममधल्या दृश्यांचंही त्यांनी कौतुक केलं. प्रकाश राज यांचं अजय देवगण आणि त्याच्या कुटुंबासोबतचं पहिलं दृश्य विशेष प्रभावी असल्याचं त्यांनी म्हटलं.

'दृश्यम' फ्रँचायझीमध्ये क्लायमॅक्सला विशेष महत्त्व आहे. त्यामुळे तिसऱ्या भागाचा शेवट अपेक्षांवर खरा उतरतो का, यावरही त्यांनी भाष्य केलं. ते म्हणाले, "आता सर्वात महत्त्वाच्या क्लायमॅक्सबद्दल बोलूया, तो अपेक्षांवर खरा उतरतो का? त्याचा शेवट पटण्यासारखा आहे का? तो तुम्हाला समाधानी करतो का? हो, नक्कीच... क्लायमॅक्स दमदार, खिळवून ठेवणारा आणि पूर्णपणे समाधानकारक आहे."

कलाकारांच्या अभिनयाचंही तरण आदर्श यांनी कौतुक केलं. अजय देवगणने विजय साळगावकरची आव्हानात्मक भूमिका प्रभावीपणे साकारली, असं त्यांनी म्हटलं. मध्यांतरापूर्वी अजय देवगण आणि जयदीप अहलावत यांच्यातलं दृश्य दमदार असल्याचं त्यांनी नमूद केलं. जयदीप अहलावतची एन्ट्री प्रभावी असून त्याचा संयमित अभिनय चित्रपटाच्या आकर्षणांपैकी एक आहे, असं ते म्हणाले.

तब्बूच्या अभिनयाचंही त्यांनी कौतुक केलं. राग, दुःख, सूड आणि दृढनिश्चय अशा विविध भावना तिने प्रभावीपणे साकारल्याचं त्यांनी सांगितलं.

प्रकाश राज यांच्या पडद्यावरील प्रभावी उपस्थितीमुळे कथेला वजन मिळतं, असं तरण आदर्श यांनी म्हटलं. श्रिया सरन जबरदस्त फॉर्ममध्ये असल्याचं, तर रजत कपूर यांनी आपल्या भूमिकेत प्रतिष्ठा आणि सत्यता आणल्याचं त्यांनी नमूद केलं. कमलेश सावंत यांच्या अभिनयाचंही त्यांनी कौतुक केलं. इशिता दत्ता आणि मृणाल जाधव आपापल्या भूमिकांमध्ये ठीक असल्याचं त्यांनी म्हटलं.