पॅरिसच्या रॅम्पवर ऐश्वर्या राय बच्चनचा रॉयल लूक, मुकुट आणि काळ्या गाऊनमुळे चाहते फिदा

अभिनेत्री ऐश्वर्या राय बच्चन पुन्हा एकदा चर्चेत आली आहे. आपल्या सौंदर्याने आणि फॅशन स्टाइलने चाहत्यांना भुरळ घालणारी ऐश्वर्या नुकतीच पॅरिस फॅशन वीक २०२६ मध्ये सहभागी झाली होती. पॅरिसमध्ये झालेल्या 'L'Oréal Paris Le Défilé' च्या रॅम्पवर तिने दिमाखदार एंट्री केली आणि सगळ्यांचं लक्ष तिच्याकडे गेलं. तिच्या रॉयल लूकची सोशल मीडियावरही खूप चर्चा सुरू आहे.

ऐश्वर्याने Yara Shoemaker यांच्या Fall/Winter 2026-27 कलेक्शनमधला काळ्या रंगाचा वेलवेट पोशाख घातला होता. या पोशाखावर 3D फ्रिंज एम्ब्रॉयडरी होती, तसंच क्रिस्टलने सजवलेला केपही होता. हा संपूर्ण लूक तिने क्राउन-स्टाईल हेडपीसने पूर्ण केला. त्यात तिच्या बरगंडी रंगाच्या केसांमुळे या लूकला वेगळाच टच मिळाला.

या रॉयल अवतारामुळे रॅम्पवर तिची उपस्थिती विशेष ठरली. तिच्या लूकचे फोटो आणि व्हिडीओ सोशल मीडियावर व्हायरल होत आहेत. चाहते तिची स्टाइल आणि तिचा आत्मविश्वास पाहून कौतुक करत आहेत.

L'Oréal Paris च्या या खास फॅशन शोमध्ये ऐश्वर्यासोबत केंडल जेनर, सिमोन अॅशले, ईवा लोंगोरिया आणि सेलीन डायोन यांच्यासह अनेक आंतरराष्ट्रीय सेलिब्रिटी सहभागी झाले होते. हा शो पॅरिसमध्ये आयफेल टॉवरच्या पार्श्वभूमीवर झाला. अनेक कलाकार आणि ब्रँड अॅम्बेसेडर यांनी रॅम्पवर आपला जलवा दाखवला.

शो सुरू असताना ऐश्वर्या आणि प्रसिद्ध गायिका सेलीन डायोन यांच्यातला एक खास क्षणही नेटकऱ्यांचं लक्ष वेधून गेला. दोघी एकमेकींना मिठी मारताना आणि हातात हात घेऊन डान्स करताना दिसल्या. ऐश्वर्याने सेलीन डायोनला किस केल्याचा क्षणही कॅमेऱ्यात कैद झाला. या दोघींचे फोटो आणि व्हिडीओ सोशल मीडियावर चर्चेत आहेत.

ऐश्वर्या राय गेल्या अनेक वर्षांपासून L'Oréal Paris शी जोडलेली आहे. २०२६ मधली Le Défilé ची ही नववी आवृत्ती होती आणि त्यात ऐश्वर्याने पुन्हा एकदा रॅम्पवर हजेरी लावली. यावेळी तिचा ब्लॅक वेलवेट लूक, बरगंडी केस आणि क्राउन-स्टाईल हेडपीस यांनी सर्वाधिक लक्ष वेधून घेतलं.