अहमदाबादेत फाइव्ह स्टार हॉटेल्सच्या बांधकामांना वेग, कारण ठरतेय कॉमनवेल्थ आणि ऑलिम्पिकची तयारी

अहमदाबाद शहर कॉमनवेल्थ गेम्स 2030 आणि 2036 च्या ऑलिम्पिकसाठी दावेदारी करत असल्यामुळे शहरात फाइव्ह स्टार हॉटेल आणि हॉस्पिटॅलिटी प्रोजेक्ट्सच्या बांधकामांनी चांगलाच वेग पकडला आहे. या मोठ्या स्पर्धांच्या यजमानपदाच्या तयारीचा एक भाग म्हणून शहरात हॉटेल आणि इतर पायाभूत सुविधांची उभारणी मोठ्या प्रमाणावर सुरू झाली आहे.

अहमदाबाद महापालिकेचे आयुक्त बंछानिधी पाणी यांनी दिलेल्या माहितीनुसार, 2025 मध्ये महापालिकेने अहमदाबाद महापालिका परिसरात जवळपास 9 हॉटेल्सला मान्यता दिली होती आणि त्यांचे बांधकाम सध्या जोरात सुरू आहे. यानंतर 2026 मध्ये आणखी चार हॉटेल्सच्या बांधकामाला मान्यता देण्यात आली असून त्यांचेही काम सुरू झाले आहे. म्हणजेच अवघ्या दोन वर्षांच्या काळात महापालिकेने एकूण 13 हॉटेल्सच्या बांधकामांना परवानगी दिली असून, अहमदाबाद शहरातील वेगवेगळ्या भागांत मोठ्या प्रमाणात नव्या हॉटेल्सची उभारणी सध्या सुरू आहे.

सिंधु भवन रोड आणि आसपासच्या भागात 5 नवीन फाइव्ह स्टार हॉटेल्सचे प्रोजेक्ट्स येऊ घातले असून, त्यापैकी तीन हॉटेल्सचे बांधकाम आधीच सुरू झाले आहे. साबरमती नदीच्या पश्चिम किनाऱ्यावर 200 ते 300 खोल्यांचा एक 16 मजली फाइव्ह स्टार हॉटेल उभारण्याची योजना आहे. या हॉटेलसोबतच याच परिसरात एक कन्व्हेन्शन आणि एग्झिबिशन सेंटर बांधण्याचीही योजना आखण्यात आली आहे. याशिवाय संपूर्ण अहमदाबाद शहरात इतर इन्फ्रास्ट्रक्चर प्रोजेक्ट्सही डेव्हलप केले जात आहेत, ज्यामुळे शहराचा चेहरामोहरा बदलण्याची तयारी सुरू आहे.

हॉटेल असोसिएशन, अहमदाबादचे अध्यक्ष नरेंद्र सोमानी यांनी सांगितले की, कॉमनवेल्थ 2030 च्या तयारीला त्यांनी सुरुवात केली आहे. इन्फ्रास्ट्रक्चर प्रोजेक्ट्स आणि हॉस्पिटॅलिटी प्रोजेक्ट्सवरील काम जोरात सुरू असल्याचे ते म्हणाले. सिंधु भवन रोडजवळ सध्या तीन मोठ्या हॉटेल्सच्या बांधकामाला सुरुवात झाली असून, आणखी दोन ते तीन हॉटेल्स उभारण्यासाठी असोसिएशनने महापालिकेकडे परवानगी मागितल्याचेही त्यांनी सांगितले.

सोमानी यांच्या मते, रिव्हर फ्रंटवर एक मोठे कन्वेन्शन सेंटर आणि एक मोठे फाइव्ह स्टार हॉटेल उभारण्याचा तसेच विमानतळ परिसरात एक-दोन हॉटेल्स बांधण्याचा विचार आहे. हॉटेल्सशिवाय अहमदाबाद शहरात सगळीकडे रस्ते, पूल, जलजीवन योजना, ड्रेनेज, रेल्वे आणि सार्वजनिक परिवहन सेवेशी संबंधित कामेही सुरू झाली आहेत. शहरातील ही सर्व कामे कॉमनवेल्थ आणि ऑलिम्पिकच्या तयारीचा भाग म्हणून एकाच वेळी हाती घेण्यात आली आहेत.

कॉमनवेल्थ गेम्स 2030 चे आयोजन अहमदाबादेत होणार आहे. त्याचबरोबर भारत सरकार 2036 मध्ये होणाऱ्या ऑलिम्पिकच्या यजमानपदासाठी दावेदारी सादर करत आहे. भारताला 2036 च्या ऑलिम्पिकचे यजमानपद मिळाल्यास अहमदाबाद शहरातच क्रीडानगरी उभारण्यात येणार आहे. याच कारणामुळे कॉमनवेल्थ गेम्स आणि संभाव्य ऑलिम्पिक या दोन्ही स्पर्धांना डोळ्यासमोर ठेवून अहमदाबादमधील पायाभूत सुविधांवरील काम सध्या जोमाने सुरू आहे.