सुपर लाउड 3D साऊंड आणि 2500 mAh बॅटरीसह आयटेलचा म्युझिक 450 एल फीचर फोन दाखल
आयटेलने म्युझिक-फर्स्ट फीचर फोन बाजारात आणला असून यात टू-इन-वन सुपर लाउड स्पीकर, स्लिम डिझाइन आणि दीर्घकाळ चालणारी बॅटरी देण्यात आली आहे.
देशातील आघाडीच्या टेक्नॉलॉजी ब्रँड्सपैकी एक असलेल्या आयटेलने आपला नवा फीचर फोन बाजारात आणला आहे. 'आयटेल म्युझिक ४५० एल' असे या फोनचे नाव असून तो पूर्णपणे संगीताला केंद्रस्थानी ठेवून तयार करण्यात आला आहे. या फोनचे सर्वात मोठे वैशिष्ट्य म्हणजे यातील 'सुपर लाउड ३डी साऊंड' तंत्रज्ञान. सोबतच यात टू-इन-वन सुपर लाउड स्पीकर, २५०० एमएएच बॅटरी, ब्लूटूथ कनेक्टिव्हिटी, २.४ इंचाचा क्यूव्हीजीए डिस्प्ले आणि अवघ्या १३.४ मिमी जाडीचे स्लिम डिझाइन दिले आहे. रोजच्या मनोरंजनासाठी, प्रवासात आणि मैदानी वापरासाठी हा फोन खास बनवण्यात आल्याचे कंपनीने सांगितले.
बस किंवा ट्रेनने होणारा रोजचा प्रवास, रस्त्यावरचे थांबे, मैदानी जागा आणि सामाजिक कार्यक्रम अशा वेगवेगळ्या ठिकाणी लोक ज्या पद्धतीने संगीत आणि मनोरंजनाचा आनंद घेतात, तो विचार करूनच हा फोन डिझाइन केला गेला आहे. सर्वसाधारण फोनचा आवाज नीट ऐकू न येणाऱ्या ठिकाणीही या फोनमधील सुपर लाउड ३डी साऊंडमुळे गाणी, एफएम आणि कॉल्स स्पष्ट ऐकू येतात, असा कंपनीचा दावा आहे.
या लाँचिंगबाबत बोलताना आयटेल इंडिया म्हणजेच ट्रांसन होल्डिंग्सचे सीईओ अरिजित तालापात्रा म्हणाले की, भारतात रोजचा प्रवास, मैदानी काम आणि सामाजिक कार्यक्रमांमध्ये संगीत नेहमीच सोबत असते, पण अनेकदा सर्वसाधारण फोनचा आवाज ऐकू येणे कठीण जाते. त्यामुळे आयटेल म्युझिक ४५० एलच्या माध्यमातून सुपर लाउड ३डी साऊंडवर आधारित वेगळा, म्युझिक-फर्स्ट अनुभव फीचर-फोन सेगमेंटमध्ये आणला जात आहे, असे ते म्हणाले. शक्तिशाली ऑडिओ, २५०० एमएएच बॅटरी आणि स्लिम डिझाइन यांची सांगड घालून भारतभरातील ग्राहकांच्या रोजच्या जीवनशैलीला साजेसे तंत्रज्ञान बनवण्याच्या कटिबद्धतेला पुढे नेत असल्याचेही तालापात्रा यांनी सांगितले.
फोनच्या केंद्रस्थानी असलेला एफ२० टू-इन-वन सुपर लाउड स्पीकर संगीत, एफएम आणि कॉल्ससाठी दमदार ३डी साऊंड देतो. हा स्पीकर १३.४ मिमी जाडीच्या स्लिम डिझाइनसह बसवण्यात आल्याने मोठ्या आवाजाचा स्पीकर आणि पातळ बांधणी असा दुहेरी मेळ यात साधला गेला आहे. लांब प्रवास करणाऱ्या ग्राहकांसाठी २५०० एमएएच क्षमतेची बॅटरी देण्यात आली असून त्यामुळे संगीत, वायरलेस एफएम, ब्लूटूथ आणि कॉल्सचा अखंड आनंद घेता येतो. रोजच्या वापरासाठी सोयीचे व्हावे यासाठी यात २.४ इंचाचा क्यूव्हीजीए डिस्प्ले दिला आहे.
या फोनमध्ये ब्लूटूथ कनेक्टिव्हिटी असल्याने वायरलेस ॲक्सेसरीज जोडता येतात, तर रेकॉर्डिंगची सोय असलेले वायरलेस एफएम वायरच्या इअरफोनशिवाय मनोरंजनाचा आणखी एक पर्याय देते. याशिवाय किंग टॉकर, व्हिज्युअल आयकॉनसह १,००० कॉन्टॅक्ट्स सेव्ह करण्याची क्षमता, व्हायब्रेशन अलर्ट, ऑटो कॉल रेकॉर्डिंग, वेळ ऐकण्यासाठी '०' बटणावर लाँग-प्रेस शॉर्टकट, शक्तिशाली टॉर्च आणि व्हीजीए कॅमेराही यात देण्यात आला आहे. हा फोन टाईप-सी चार्जिंगसह येतो आणि बॉक्समध्ये मोफत बॅक कव्हरही दिले जाणार आहे. आयटेल म्युझिक ४५० एल तीन रंगांमध्ये उपलब्ध असेल.
