iPhone Duo Foldच्या 3 लाख किंमतीला टक्कर देणारे 5 स्वस्त Android फोल्डेबल फोन

Appleने iPhone Duo Fold नावाचा नवा फोन लॉन्च केला असून त्याची किंमत ऐकून सगळ्यांचे डोळे पांढरे झाले आहेत. भारतात या फोनची सुरुवातीची किंमत 2 लाख 99 हजार 900 रुपये आहे, म्हणजे जवळपास 3 लाख रुपये. एवढ्या पैशात एक चांगली बाईक किंवा छोटी सेकंड हँड कार सुद्धा येऊ शकते. त्यामुळे 3 लाख रुपये मोजून आयफोन घेण्याआधी एकदा विचार करायला हवा, कारण मार्केटमध्ये Samsung, Motorola, Google, Xiaomi आणि Huawei सारख्या कंपन्यांचे फोल्डेबल फोन आधीपासूनच उपलब्ध आहेत. हे फोन आयफोनपेक्षा खूपच स्वस्त आहेत आणि बॅटरी, कॅमेरा आणि स्क्रीनच्या बाबतीत आयफोनपेक्षाही दोन पावलं पुढे आहेत.

फोल्डेबल फोनमध्ये Samsung हा सगळ्यात जुना आणि अनुभवी ब्रँड मानला जातो. Samsung Galaxy Z Fold 8 ची किंमत 1 लाख 79 हजार 999 रुपये आहे, म्हणजे आयफोनपेक्षा 1 लाख 20 हजार रुपयांनी स्वस्त. यात आतमध्ये 7.6 इंचाची मोठी स्क्रीन आणि बाहेर 5.4 इंचाची स्क्रीन आहे. या फोनमध्ये 4800 mAh बॅटरी, 50 मेगापिक्सलचा कॅमेरा आणि 1 TB पर्यंत स्टोरेज मिळतं.

पैसे वाचवायचे असतील तर Motorola Razr Fold हा बेस्ट पर्याय आहे, जो आयफोनच्या जवळपास अर्ध्या किमतीत म्हणजे 1 लाख 49 हजार 999 रुपयांपासून सुरू होतो. यात आतमध्ये 8.1 इंचाचा 2K डिस्प्ले आहे जो 120Hz चा आहे, तर बाहेर 6.6 इंचाचा 165Hz डिस्प्ले आहे, त्यामुळे स्क्रोलिंग एकदम स्मूथ होतं. या फोनमध्ये Snapdragon 8 Gen 5 प्रोसेसर, मागे तीनही 50-50 मेगापिक्सलचे कॅमेरे आणि 6000 mAh ची बॅटरी आहे. सोबत 80W चं सुपरफास्ट चार्जिंग असल्याने फोन अर्ध्या तासात फुल्ल चार्ज होतो.

फोटोग्राफी आणि AI फीचर्सची आवड असणाऱ्यांसाठी Google Pixel 11 Pro Fold हा योग्य पर्याय आहे, ज्याची किंमत 1 लाख 86 हजार 999 रुपये आहे. यात आतमध्ये 8 इंचाचा मोठा डिस्प्ले आणि बाहेर 6.5 इंचाचा डिस्प्ले आहे. या फोनमध्ये गुगलचा स्वतःचा Tensor G6 चिप, 16GB रॅम आणि 48 मेगापिक्सलचा कॅमेरा आहे, ज्याचे फोटो नॅचरल येतात असा दावा आहे. या फोनची बॅटरी 24 तासांपेक्षा जास्त काळ चालते.

Xiaomi 18 Fold हा फोन सध्या चीनमध्ये उपलब्ध असून लवकरच भारतात येण्याची शक्यता आहे. याची किंमत जवळपास 1 लाख 5 हजार रुपये आहे. यात आतमध्ये 7.58 इंच आणि बाहेर 5.38 इंचाची स्क्रीन आहे. या फोनमध्ये तब्बल 6000 mAh बॅटरी, 67W वायर्ड आणि 50W वायरलेस चार्जिंग आहे. सगळ्यात महत्त्वाचं म्हणजे यात 200 मेगापिक्सलचा कॅमेरा आणि शाओमीचा स्वतःचा X-Ring O3 प्रोसेसर आहे.

Huawei Pura X Max हा फोनही सध्या चर्चेत आहे. याची किंमत जवळपास 1 लाख 57 हजार रुपये आहे. यात आतमध्ये 7.7 इंच आणि बाहेर 5.4 इंचाचा डिस्प्ले आहे. या फोनमध्ये 5300 mAh बॅटरी, 66W चार्जिंग आणि 50 मेगापिक्सलचा पेरिस्कोप टेलिफोटो कॅमेरा आहे. यात कंपनीची स्वतःची HarmonyOS 7 सिस्टीम वापरण्यात आली आहे.

एकूणच 3 लाख रुपये देऊन फक्त Appleचा लोगो घेण्यापेक्षा दीड लाख रुपयांमध्ये यापेक्षा भारी फीचर्स असलेले फोन मिळत असल्याचा दावा केला जात आहे. ब्रँड महत्त्वाचा की फीचर्स, हे ग्राहकांनीच ठरवायचं आहे.