रश्मी देसाईचं आठ वर्षांनी टीव्हीवर कमबॅक, 'सायोनी' मालिकेत जान्हवी सोनी-गौतम सिंह विगसोबत

टीव्हीवरच्या ओळखीच्या चेहऱ्यांपैकी एक असणारी रश्मी देसाई तब्बल आठ वर्षांच्या गॅपनंतर पुन्हा छोट्या पडद्यावर दिसणार आहे. 'सायोनी' नावाची नवी मालिका आज, 23 सप्टेंबरपासून सुरू होते आहे आणि ती संध्याकाळी 7:30 वाजता स्टार प्लस आणि जिओहॉटस्टारवर बघता येईल. या मालिकेत रश्मी देसाईसोबत जान्हवी सोनी आणि गौतम सिंह विग हे प्रमुख भूमिकांमध्ये आहेत.

मालिकेची कथा सानवी नावाच्या मुलीभोवती फिरते. आईचं प्रेम मिळावं म्हणून झुरणाऱ्या सानवीच्या आयुष्यात आदित्य येतो. पण आदित्य हा तिच्यासाठी सगळे निर्णय घेणारा किंवा तिच्या ऐवजी लढणारा माणूस नाही. उलट तो सानवीला तिच्या भावना मोकळेपणाने मांडायला आणि स्वतःचे निर्णय स्वतः घ्यायला बळ देतो. सानवीची भूमिका जान्हवी सोनी करते आहे, तर आदित्यच्या भूमिकेत गौतम सिंह विग दिसणार आहे. त्यामुळे या दोघांची प्रेमकहाणी पुढे कशी उलगडते, याची उत्सुकता प्रेक्षकांना लागून राहिली आहे.

रश्मी देसाई या मालिकेत माया ही व्यक्तिरेखा साकारते आहे. माया खंबीर आणि व्यवहारकुशल आहे, पण स्वतःच्या भावना ती मनातच दाबून ठेवते. रश्मीला इतक्या वर्षांनी पुन्हा टीव्हीवर बघायला तिचे चाहते आतुर झाले आहेत. सरगुन मेहता आणि रवी दुबे यांच्या ड्रीमियाता एंटरटेनमेंट या बॅनरखाली बनलेली ही मालिका विश्वास, बरोबरी आणि कोणत्याही परिस्थितीत एकमेकांच्या पाठीशी उभं राहणाऱ्या नात्याची गोष्ट सांगणार आहे.

आपल्या भूमिकेबद्दल बोलताना रश्मी देसाई म्हणाली की, माया ही फक्त एक कॅरेक्टर नाही, तर आयुष्यातलं वास्तव समजून घेणारी प्रॅक्टिकल बाई आहे. गेल्या काही काळात तिला बऱ्याच भूमिकांसाठी विचारणा झाली होती, पण त्या कथा किंवा कॅरेक्टरशी तिचं मन जुळलं नाही म्हणून तिने त्या स्वीकारल्या नाहीत. रश्मीच्या मते, तिला फक्त टीव्हीवर परत यायचं नव्हतं, तर तिच्या कामाला काहीतरी अर्थ असावा असं तिला वाटत होतं. त्यामुळे योग्य वेळेची वाट बघून तिने मायाची भूमिका स्वीकारली. निर्माते सरगुन मेहता आणि रवी दुबे, तसंच दिग्दर्शक उत्तम भेलावत यांच्या कामाचंही तिने कौतुक केलं. योग्य संधीची वाट बघितली आणि स्वतःच्या भावनांशी प्रामाणिक राहिले, याचं तिला समाधान आहे असं ती म्हणाली.

सानवीची भूमिका करणारी जान्हवी सोनी सांगते की, सानवी प्रेमळ आहे आणि सगळ्यांची काळजी घेणारी मुलगी आहे. पण तिच्या चांगुलपणाला तिचा वीकनेस समजू नये, कारण जे बरोबर वाटतं त्यासाठी ठाम उभं राहण्याची हिंमत तिच्यात आहे. रश्मी देसाईसोबत काम करण्याचा अनुभवही जान्हवीने शेअर केला. रश्मी खूप प्रेमळ आहे आणि को-अ‍ॅक्टर म्हणून ती नेहमी मदत करते, असं जान्हवी म्हणाली. त्यामुळे रश्मीसोबत काम करण्याचा अनुभव तिच्यासाठी खास असल्याचं तिने सांगितलं.

आता सानवी, आदित्य आणि माया यांच्या आयुष्यात पुढे कोणती वळणं येतात आणि त्यांच्या नात्यांची गोष्ट कुठे जाऊन पोहोचते, हे आजपासून प्रेक्षकांना बघता येणार आहे.