INS Trishul: फ्रान्समध्ये दाखल झाली आयएनएस त्रिशूल, 'वरुण' युद्धसरावात दिसणार भारतीय नौदलाची ताकद

भारतीय नौदलाची युद्धनौका आयएनएस त्रिशूल फ्रान्सच्या टूलॉन नौदल बंदरावर दाखल झाली आहे. भारत आणि फ्रान्स या दोन देशांमध्ये दर काही काळाने एक द्विपक्षीय समुद्री युद्धसराव घेतला जातो, ज्याचं नाव आहे 'वरुण'. यंदा या सरावाचा 24 वा उपक्रम होणार असून त्यात आयएनएस त्रिशूल ही युद्धनौका भाग घेणार आहे.

या सरावादरम्यान दोन्ही देशांचे नौसैनिक समुद्रात एकत्र सराव करणार आहेत. या वेळी ते एकमेकांना आपापला अनुभव सांगणार आहेत. तसेच समुद्रात वेगवेगळ्या परिस्थिती उद्भवल्या तर त्यावेळी एकमेकांसोबत ताळमेळ कसा राखायचा, यावरही या सरावात भर दिला जाणार आहे. भारतीय नौदलाने दिलेल्या माहितीनुसार, या सरावामागचा उद्देश म्हणजे दोन्ही नौदलांमधील सागरी सहकार्य वाढवणे, परस्पर समन्वय सुधारणे आणि दोन्ही नौदलांची कार्यक्षमता अधिक बळकट करणे हा आहे.

'वरुण' सरावातील उपक्रम केवळ समुद्रापुरते मर्यादित राहणार नाहीत, हे इथं लक्षात घ्यायला हवं. टूलॉन बंदरात दोन्ही देशांच्या नौसैनिकांमध्ये व्यावसायिक चर्चाही होणार आहे. यासोबतच एकमेकांच्या युद्धनौकांना भेट देऊन तिथल्या मोहिमांची माहिती घेणं आणि विविध क्रीडा उपक्रमांचा समावेशही या कार्यक्रमात असेल. हे सगळं झाल्यानंतर दोन्ही देशांचे सैन्य दल एकत्रितपणे प्रत्यक्ष युद्धसराव करतील, ज्यात एकमेकांचे अनुभव आणि कार्यपद्धती एकमेकांना समजावून सांगितली जाईल. या सरावाचं एक वैशिष्ट्य म्हणजे, बंदरापासून सुरू होऊन थेट खोल समुद्रापर्यंत दोन्ही नौदलांमधील संपर्क आणि प्रशिक्षणाची व्याप्ती यात वाढवली जाते. म्हणजे केवळ सराव एवढाच याचा हेतू नाही, तर दोन्ही सैन्य दलांनी एकमेकांची कार्यप्रणाली नीट समजून घेणे आणि पुढे संयुक्त मोहिमांदरम्यान उत्तम ताळमेळ विकसित करणे, हाही यामागचा उद्देश आहे.

टूलॉनमध्ये दाखल झालेली आयएनएस त्रिशूल ही तलवार श्रेणीतील गाइडेड मिसाइल युद्धनौका आहे. ही बहुउद्देशीय युद्धनौका असून तिच्यावर आधुनिक शस्त्रास्त्रे आणि सेन्सर बसवण्यात आले आहेत. या युद्धनौकेवर हेलिकॉप्टर चालवण्याचीही सुविधा उपलब्ध आहे. अलीकडच्या काही वर्षांत आयएनएस त्रिशूलमध्ये अनेक महत्त्वाची आधुनिकीकरणे करण्यात आली आहेत, ज्यात स्वदेशी प्रणाली आणि नवीन सेन्सरचा समावेश आहे. याशिवाय या युद्धनौकेवर आधुनिक इलेक्ट्रॉनिक सहाय्यक यंत्रणा आणि संचार प्रणालीही बसवण्यात आल्या आहेत.

या सरावादरम्यान फ्रान्सचे नौदल आपल्याकडील फोरबिन आणि ला फेयेत यांसारख्या युद्धनौका वापरणार आहे.