Aai Tulja Bhavani Serial: 'त्रिदल राजदंडा'साठी बालगणेश-कार्तिकेय देणार महापरीक्षा; शक्ती, युक्ती अन् भक्तीची

कलर्स मराठीवरच्या 'आई तुळजाभवानी' या लोकप्रिय मालिकेत सध्या एक वेगळाच सामना रंगताना दिसतोय. पार्वतीमातेला तिच्या तुळजाई रूपात भेटायला आलेले बालगणेश आणि कार्तिकेय यांच्यातला वाद आता एका महत्त्वाच्या टप्प्यावर पोहोचलाय. दोघांमधलं कोण श्रेष्ठ, हे ठरवण्यासाठी तुळजाईने या दोघांसमोर तीन परीक्षा ठेवल्या आहेत.

ही भांडण मिटवण्यासाठी तुळजाईने शक्ती, युक्ती आणि भक्ती अशा तीन कसोट्या दिल्यात. या तिन्ही परीक्षा जो जिंकेल, त्याला दैवी 'त्रिदल राजदंड' मिळणार आहे. बालतुळजाईच्या दैवी रूपात तिच्या हातातल्या तेजोवलयातून शक्तीचा राजदंड, युक्तीचं चक्र आणि भक्तीचं सुवर्णकमळ प्रकट होतं. ही तिन्ही दैवी चिन्हं मग एकत्र येऊन 'त्रिदल राजदंडा'चं रूप धारण करतात. या राजदंडाच्या दिव्य प्रकाशाने अख्खा राजवाडा उजळून निघतो, असं मालिकेत दाखवलंय.

या मोठ्या परीक्षेसाठी कार्तिकेय आक्रमकपणे तयारी करतोय. तो अचूक लक्षभेदाचा सराव तर करतोच, शिवाय गावातल्या बलदंड आणि ताकदवान सवंगड्यांनाही आपल्या बाजूने गोळा करतोय, म्हणजे परीक्षेच्या वेळी त्याला त्यांची मदत मिळावी अशी त्याची तयारी आहे. याउलट बालगणेश मात्र अगदी शांतपणे आणि निखळ, सहज भावनेने या स्पर्धेकडे बघतोय, कुठलीही आक्रमकता किंवा घाईगडबड न दाखवता. त्यामुळे शक्ती विरुद्ध शांतता हा सामना नेमका कुठल्या वळणावर जातो, याची उत्सुकता प्रेक्षकांमध्ये वाढलीय.

गणेश आणि कार्तिकेय यांच्यातल्या या चुरशीमुळे गावातली माणसंही दोन गटांत विभागली गेलीत. तारा आणि पद्मा यांच्यातही आपापल्या लाडक्या देवासाठी रस्सीखेच सुरू झालीय. यामुळे मालिकेतला हा दैवी सामना आता केवळ बालगणेश आणि कार्तिकेय यांच्यापुरता मर्यादित न राहता गावातलं वातावरणही बदलवताना दिसतोय.

पण या स्पर्धेच्या आडून एक मोठं असुरी कारस्थानही शिजतंय. शुक्राचार्य आणि भुजंग यांनी महिषासुराला मुक्त करण्यासाठी नवा डाव आखलाय. त्यामुळे बालगणेश आणि कार्तिकेयची ही स्पर्धा जितकी महत्त्वाची, तितकाच असुरांचा हा कटही कथेत महत्त्वाचा ठरणार आहे.

शक्ती, युक्ती आणि भक्तीच्या या तीन अवघड परीक्षा पार करून 'त्रिदल राजदंडा'चा खरा मानकरी कोण ठरणार, बालगणेश आणि कार्तिकेयच्या या सामन्याचा निकाल काय लागणार, तसंच बालगणेशाच्या भक्तांना जाळ्यात ओढण्याचा असुरांचा डाव यशस्वी होणार की भगवान महादेव तुळजाईच्या भक्तांच्या रक्षणासाठी नवी लीला घडवणार, हे पाहणं महत्त्वाचं ठरणार आहे.

या सगळ्या प्रश्नांची उत्तरं मालिकेच्या पुढच्या भागांमध्ये मिळणार आहेत. 'आई तुळजाभवानी' ही मालिका रोज रात्री ८.५० वाजता फक्त कलर्स मराठीवर बघता येते.