२०१० च्या आत्महत्या प्रकरणात राखी सावंतविरोधात अजामीनपात्र वॉरंट जारी

अभिनेत्री राखी सावंत पुन्हा एकदा कायदेशीर अडचणीत सापडली आहे. उत्तर प्रदेशातील एका न्यायालयाने २०१० मधील एका आत्महत्या प्रकरणात तिच्याविरोधात अजामीनपात्र वॉरंट जारी केले आहे. तिला वारंवार समन्स बजावण्यात आले, तरीही ती न्यायालयात हजर झाली नाही. त्यामुळे हा आदेश देण्यात आल्याची माहिती सरकारी वकिलांनी दिली. या प्रकरणाची पुढील सुनावणी १ डिसेंबर रोजी होणार आहे.

जिल्हा सरकारी वकील (फौजदारी) मृदुलकांत श्रीवास्तव यांनी सांगितले की, समन्स बजावूनही राखी सावंत न्यायालयात आली नाही. म्हणून दिवाणी न्यायाधीश (कनिष्ठ विभाग) अंजली यांनी शुक्रवारी तिच्याविरोधात अजामीनपात्र वॉरंट जारी केले.

हे प्रकरण १६ वर्षांपूर्वीचे आहे. झाशी येथील हन्सारी प्रेम नगर परिसरात राहणारे लक्ष्मण अहिरवार यांच्या आत्महत्येशी त्याचा संबंध आहे. आरोपानुसार, राखी सावंतच्या 'राखी का इन्साफ' या टीव्ही शोमध्ये तिने केलेल्या कथित अपमानास्पद टिप्पणीमुळे दुखावून लक्ष्मण अहिरवार यांनी १० नोव्हेंबर २०१० रोजी आत्महत्या केली होती.

लक्ष्मण यांच्या आई सावित्री यांनी प्रेम नगर पोलीस स्टेशनमध्ये या प्रकरणी तक्रार दाखल केली होती. ऑक्टोबर २०१० मध्ये प्रसारित झालेल्या शोच्या एका भागात राखी सावंतने आपल्या मुलाविषयी अपमानास्पद आणि आक्षेपार्ह भाषा वापरली, असा आरोप त्यांनी केला होता.

फिर्यादीच्या म्हणण्यानुसार, लक्ष्मण अहिरवार आणि त्यांची पत्नी अनिता यांना त्यांच्या वैवाहिक वादावर चर्चा करण्यासाठी 'राखी का इन्साफ' कार्यक्रमात बोलावण्यात आले होते. पती-पत्नीमधील वादानंतर अनिता माहेरी गेली होती. त्याच प्रकरणादरम्यान राखी सावंतने केलेल्या कथित वक्तव्यांमुळे लक्ष्मण दुखावले, असा आरोप तक्रारीत करण्यात आला आहे.

राखी सावंत यापूर्वी गायक मिका सिंगसोबतच्या वादामुळेही चर्चेत आली होती. सुमारे नऊ महिन्यांपूर्वी एका पॉडकास्टमध्ये बोलताना तिने मिका सिंगच्या आवाजाबद्दल टिप्पणी केली होती. "सुरुवातीला मिकाचा आवाज चांगला नव्हता, पण ज्या दिवशी त्याने मला किस केले, त्याचा आवाज मधुर झाला," असे ती म्हणाली होती. त्यामुळे जुन्या वादाची पुन्हा चर्चा सुरू झाली होती.

तो वाद २००६ मधील आहे. मिका सिंगने आयोजित केलेल्या वाढदिवसाच्या पार्टीत त्याने जबरदस्तीने किस केल्याचा आरोप राखी सावंतने केला होता. त्यानंतर ११ जून २००६ रोजी तिने मिका सिंगविरोधात एफआयआर दाखल केला. भारतीय दंड संहितेच्या कलम ३५४ आणि ३२३ अंतर्गत त्याच्यावर गुन्हा नोंदवण्यात आला होता. सुमारे १७ वर्षांनंतर हे प्रकरण परस्पर संमतीने मिटवण्यात आले.

आता २०१० मधील आत्महत्या प्रकरणात न्यायालयाने अजामीनपात्र वॉरंट जारी केल्याने राखी सावंत पुन्हा चर्चेत आली आहे. १ डिसेंबरला होणाऱ्या पुढील सुनावणीकडे सर्वांचे लक्ष लागले आहे.