मालेगावात तरुणाला चाकूने भोसकून ठार करणाऱ्या रहीम भजियाला जन्मठेप

मालेगावात २०२१ साली एका तरुणाची चाकूने भोसकून हत्या करण्यात आली होती. या प्रकरणात अप्पर सत्र न्यायालयाने शेख रहीम शेख रज्जाक उर्फ रहीम भजिया (वय ३५) याला दोषी ठरवले आहे. त्याला जन्मठेपेची शिक्षा सुनावण्यात आली आहे. अतिरिक्त जिल्हा व सत्र न्यायाधीश डी. वाय. गौड यांनी हा निकाल दिला.

जन्मठेपेबरोबरच न्यायालयाने रहीम भजिया याला दोन हजार रुपये दंडही ठोठावला आहे. हा दंड भरला नाही, तर त्याला आणखी एक महिना सश्रम कारावास भोगावा लागणार आहे. याच खटल्यातील दुसरा आरोपी शेख सलीम शेख याकुब उर्फ सलीम चमडा याच्याविरुद्ध पुरेसा पुरावा मिळाला नाही. म्हणून त्याची निर्दोष मुक्तता करण्यात आली आहे.

ही घटना २१ एप्रिल २०२१ रोजी कमालपुरा भागातील भिकू चौकाजवळ घडली होती. फिर्यादी इम्तियाज खान अमन उल्ला खान यांचा भाऊ फैसल खान याच्याशी रहीम भजिया याने जुन्या वादावरून हुज्जत घातली. वाद वाढत गेला. त्यानंतर आरोपी रहीम भजिया, त्याचा भाऊ मजीद भजिया आणि मित्र सलीम चमडा यांनी फैसल खान याला गाठले.

आरोपींनी फैसलच्या पोटावर धारदार चाकूने गंभीर वार केले. या जीवघेण्या हल्ल्यात फैसलच्या आतड्या बाहेर आल्या आणि तो रक्ताच्या थारोळ्यात कोसळला. फिर्यादी आणि प्रत्यक्षदर्शी मदतीसाठी धावले, तेव्हा आरोपी त्यांच्यावरही धावून गेले. उपस्थितांनी रहीम भजिया याला पकडण्याचा प्रयत्न केला, पण आरोपी तिथून पळून गेले.

गंभीर जखमी फैसलला आधी नूर हॉस्पिटलमध्ये आणि नंतर सिव्हिल हॉस्पिटलमध्ये नेण्यात आले. मात्र तिथे डॉक्टरांनी त्याला मृत घोषित केले.

मृताच्या भावाने, म्हणजे फिर्यादींनी, दिलेल्या तक्रारीवरून मालेगाव शहर पोलीस स्टेशनमध्ये गुन्हा दाखल करण्यात आला होता. पोलिसांनी आरोपींना अटक केली आणि न्यायालयात दोषारोपपत्र दाखल केले. खटला सुरू असताना आरोपी मजीद भजिया याचा मृत्यू झाला.

या खटल्याची सुनावणी अतिरिक्त जिल्हा व सत्र न्यायाधीश डी. वाय. गौड यांच्या न्यायालयात झाली. सरकारी पक्षातर्फे ज्येष्ठ अतिरिक्त सरकारी वकील अॅड. संजय कौतिकराव सोनवणे यांनी एकूण १० महत्त्वाच्या साक्षीदारांची तपासणी केली. त्यांनी केलेला ठोस युक्तिवाद आणि सादर केलेले पुरावे ग्राह्य धरून न्यायालयाने रहीम भजिया याला दोषी ठरवले आणि जन्मठेप सुनावली. कोर्ट पैरवी अधिकारी म्हणून पोलीस हवालदार मुकुंद परदेशी यांनी या प्रकरणात विशेष मेहनत घेतली.