डिझायर सीएनजी एएमटीवर 1 लाख डाऊन पेमेंट केल्यास ईएमआय किती?
मारुती सुझुकीने डिझायर सेडानचे सीएनजी ऑटोमॅटिक व्हर्जन बाजारात आणले असून त्याची किंमत, फीचर्स आणि कर्जाचा हप्ता किती बसेल याचा हा हिशोब.
मारुती सुझुकी इंडिया लिमिटेडने आपल्या लोकप्रिय सेडान डिझायरचे सीएनजी ऑटोमॅटिक (एएमटी) व्हर्जन भारतीय बाजारात लाँच केलंय. ही कार 8.53 लाख रुपये इतक्या सुरुवातीच्या एक्स-शोरूम किमतीपासून उपलब्ध आहे आणि VXi व ZXi या दोन ट्रिममध्ये विकली जाणार आहे. स्विफ्ट सीएनजी एएमटी आणि बलेनो सीएनजी एएमटी नंतर कंपनीच्या नव्या पॉवरट्रेन अपडेटमधली ही आणखी एक गाडी ठरलीये.
इंजिनबद्दल बोलायचं झालं तर नव्या डिझायर सीएनजी एएमटीमध्ये कंपनीचं 1.2-लीटरचं Z-सिरीज पेट्रोल इंजिन देण्यात आलंय. सीएनजी मोडवर हे इंजिन 68.7bhp पॉवर आणि 101Nm टॉर्क देतं. या व्हर्जनला 5-स्पीड ऑटोमॅटिक (AMT) गिअरबॉक्स मिळतो, तर स्टँडर्ड व्हर्जनमध्ये 5-स्पीड मॅन्युअल गिअरबॉक्स आहे. मायलेजच्या बाबतीत सीएनजी एएमटी व्हर्जन एआयआरएआय प्रमाणित 36.47km/kg इतकं मायलेज देतं, तर मॅन्युअल व्हर्जनचं मायलेज 33.73km/kg आहे. गाडीच्या डिग्गीत 55-लीटर क्षमतेचा सीएनजी टँक बसवलाय, आणि स्टँडर्ड व्हर्जनमध्ये 382-लीटरची बूट कॅपॅसिटी मिळते.
ऑन-रोड किमतीबद्दल सांगायचं झालं तर VXi CNG AMT चा एक्स-शोरूम दर 8,53,100 रुपये आहे, त्यावर 64,517 रुपये रजिस्ट्रेशन चार्जेस आणि 44,151 रुपये इन्शुरन्स धरून नवी दिल्लीतली ऑन-रोड किंमत 9,61,768 रुपये होते. टॉप मॉडेल असलेल्या ZXi CNG AMT चा एक्स-शोरूम दर 9,53,700 रुपये असून 71,559 रुपये रजिस्ट्रेशन आणि 47,853 रुपये इन्शुरन्स मिळून ऑन-रोड किंमत 10,73,112 रुपयांवर जाते.
फीचर्सच्या बाबतीत ही सीएनजी एएमटी मॉडेल्स नेहमीच्या पेट्रोल VXi आणि ZXi ट्रिम्ससारखीच आहेत. ZXi या टॉप मॉडेलमध्ये 15-इंच पेंटेड अलॉय व्हील्स, एलईडी हेडलाइट्स, मल्टी-इन्फॉर्मेशन डिस्प्ले, रिव्हर्स कॅमेरा, टायर प्रेशर मॉनिटरिंग सिस्टीम, वायरलेस फोन मिररिंग, वायरलेस चार्जरसह 7.0-इंच इन्फोटेनमेंट सिस्टीम, रिअर व्हेंट्ससह क्लायमेट कंट्रोल आणि रिअर USB-C फास्ट चार्जिंग पोर्ट्स असे फीचर्स मिळतात.
आता ईएमआयचा हिशोब बघू. 5 वर्षांचा (60 महिने) कालावधी आणि 9% वार्षिक व्याजदर गृहीत धरल्यास, 1 लाख रुपयांचं डाऊन पेमेंट केल्यावर VXi CNG AMT साठी 8,61,768 रुपयांच्या कर्जावर दरमहा अंदाजे 17,889 रुपये ईएमआय येईल. तर ZXi CNG AMT या टॉप मॉडेलसाठी 9,73,112 रुपयांच्या कर्जावर दरमहा अंदाजे 20,201 रुपये ईएमआय बसेल. ही ऑन-रोड किंमत दिल्लीतली असून तुमच्या शहरातल्या आरटीओ आकारणी, इन्शुरन्स, बँकेचा प्रत्यक्ष व्याजदर आणि क्रेडिट स्कोअरनुसार यात थोडा फरक पडू शकतो.
5 वर्षांचा ईएमआय जास्त वाटत असेल तर कर्जाचा कालावधी बदलूनही हप्ता कमी-जास्त करता येतो. VXi CNG AMT साठी 3 वर्षांचा (36 महिने) कालावधी घेतल्यास ईएमआय 27,411 रुपये, 5 वर्षांसाठी 17,889 रुपये आणि 7 वर्षांसाठी (84 महिने) 13,858 रुपये इतका येईल.
मारुतीने सीएनजी एएमटी सेगमेंटमध्ये यायला थोडा उशीर केला असला तरी डिझायर सीएनजी एएमटीच्या आगमनामुळे इतर कंपन्यांनाही या सेगमेंटमध्ये उतरण्यास प्रोत्साहन मिळेल असं मानलं जातंय. कमी इंधन खर्च आणि ड्रायव्हिंगची सोय हवी असणाऱ्या शहरी ग्राहकांमध्ये ही कार लोकप्रिय ठरेल असा अंदाज आहे. बाजारात डिझायर सीएनजी एएमटीची थेट स्पर्धा टाटा टिगोर सीएनजी एएमटीशी असेल, ज्याचं नवीन अपडेटेड व्हर्जन पुढील महिन्यात येण्याची शक्यता आहे.
